សេតវិមានបានប្រកាសឱ្យដឹងនៅថ្ងៃអាទិត្យម្សិលមិញថា ប្រធានាធិបតីសហរដ្ឋអាមេរិក លោក ចូ បៃឌិន គ្រោងនឹងជួបពិភាក្សាជាមួយនាយករដ្ឋមន្ត្រីជប៉ុន លោក Fumio Kishida ដែលធ្វើឡើងតាមរយៈប្រព័ន្ធវីដេអូ នៅថ្ងៃសុក្រសប្ដាហ៍នេះ។
ទីភ្នាក់ងារសារព័ត៌មាន Reuters បានស្រង់ការលើកឡើងរបស់សេតវិមាននៅក្នុងសេចក្ដីថ្លែងការណ៍មួយថា ជំនួបរវាងថ្នាក់ដឹកនាំទាំងពីរនេះនឹងធ្វើការពិភាក្សាអំពីសេដ្ឋកិច្ចរបស់ប្រទេសទាំងពីរ បញ្ហាសន្តិសុខ ការប្រែប្រួលអាកាសធាតុ និងបញ្ហាទ្វេភាគីផ្សេងទៀតផងដែរ។
សេតវិមានដដែលបានបន្តថា៖ «កិច្ចប្រជុំនេះនឹងបង្ហាញពីភាពរឹងមាំនៃសម្ព័ន្ធភាពអាមេរិក-ជប៉ុន ដែលជាមូលដ្ឋានគ្រឹះដ៏សំខាន់នៃសន្តិភាព សន្តិសុខ និងស្ថិរភាពនៅក្នុងតំបន់ឥណ្ឌូ-ប៉ាស៊ីហ្វិក និងជុំវិញពិភពលោក»។
គួរបញ្ជាក់ថា សម្ព័ន្ធមិត្តទាំងពីរ កាលពីពេលកន្លងទៅ ក៏ធ្លាប់បានបញ្ជាក់ពីកិច្ចសហប្រតិបត្តិការរបស់ពួកគេ ដើម្បីសម្រេចបាននូវតំបន់ឥណ្ឌូ-ប៉ាស៊ីហ្វិកដោយសេរីនិងបើកចំហផងដែរ៕