មន្រ្តីការទូតកំពូលមួយរូបរបស់ប្រធានាធិបតីសហរដ្ឋអាមេរិក លោក ចូ បៃឌិន នឹងព្យាយាមដោះស្រាយវិបត្តិដែលកើតឡើងរវាងរុស្ស៊ី និងអ៊ុយក្រែន ខណៈដែលរូបលោកនឹងជួបជាមួយរដ្ឋមន្ត្រីការបរទេសរុស្ស៊ី នៅទីក្រុងហ្សឺណែវ ក្នុងសប្ដាហ៍នេះ បន្ទាប់ពីជួបជាមួយមេដឹកនាំអ៊ុយក្រែននៅទីក្រុង Kyiv និងមន្ត្រីអឺរ៉ុបនានា នៅទីក្រុងប៊ែរឡាំង។
ដំណើររបស់រដ្ឋមន្ត្រីក្រសួងការបរទេសសហរដ្ឋអាមេរិក លោក អេនតូនី ប្លីនខេន (Antony Blinken) ធ្វើឡើងស្របពេលដែលមានការព្រួយបារម្ភដែលលើកឡើងដោយអ៊ុយក្រែន និងសម្ព័ន្ធមិត្តលោកខាងលិចរបស់ខ្លួន ទាក់ទងនឹងករណីទាហានរុស្ស៊ីរាប់ម៉ឺននាក់បានប្រមូលផ្ដុំនៅក្នុងនិងក្បែរទឹកដីអ៊ុយក្រែន។
ទីភ្នាក់ងារសារព័ត៌មាន Reuters បានស្រង់សម្ដីមន្ត្រីជាន់ខ្ពស់ក្រសួងការបរទេសអាមេរិកមួយរូបដែលបានថ្លែងឱ្យដឹងនៅថ្ងៃអង្គារម្សិលមិញថា៖ «សហរដ្ឋអាមេរិកមិនចង់ឱ្យមានជម្លោះកើតឡើងនោះទេ។ យើងចង់បានសន្តិភាព»។
មន្ត្រីដដែលបន្តថា៖ «ប្រធានាធិបតីរុស្ស៊ី លោក វ្លាឌីមៀរ ពូទីន មានអំណាចរបស់ខ្លួនក្នុងការចាត់វិធានការដើម្បីកាត់បន្ថយវិបត្តិនេះ ដូច្នេះសហរដ្ឋអាមេរិក និងរុស្ស៊ី អាចបន្តទំនាក់ទំនងជាមួយគ្នាបានដោយរលូន»។
ទោះជាយ៉ាងណា រុស្ស៊ីកាលពីពេលកន្លងទៅ ក៏ធ្លាប់បានបដិសេធគម្រោងរៀបចំការវាយប្រហារណាមួយលើអ៊ុយក្រែន ខណៈដែលពួកគេបានលើកឡើងថា កងទ័ពទាំងឡាយរបស់ពួកគេគឺមិនបានបង្កការគំរាមកំហែងដល់នរណាម្នាក់ឡើយ។
គួរបញ្ជាក់ថា លោក អេនតូនី ប្លីនខេន នឹងជួបជាមួយប្រធានាធិបតីអ៊ុយក្រែន លោក Volodymyr Zelenskiy និងរដ្ឋមន្ត្រីការបរទេសលោក Dmytro Kuleba នៅថ្ងៃពុធនេះ។
បន្ទាប់មកទៀត រូបលោកនឹងបន្តដំណើរទៅកាន់ទីក្រុងប៊ែរឡាំង ដែលលោកនឹងជួបជាមួយរដ្ឋមន្ត្រីការបរទេសអាល្លឺម៉ង់ អ្នកស្រី Annalena Baerbock មុនពេលជួបជាមួយនឹងក្រុមប្រទេស Quad ដែលរួមមានសហរដ្ឋអាមេរិក អង់គ្លេស បារាំង និងអាល្លឺម៉ង់។
រដ្ឋមន្ត្រីការបរទេសអាមេរិករូបនេះក៏នឹងទៅជួបជាមួយរដ្ឋមន្ត្រីការបរទេសរុស្ស៊ី លោក Sergei Lavrov នៅទីក្រុងហ្សឺណែវ នៅថ្ងៃសុក្រនេះ ដើម្បីស្វែងរកដំណោះស្រាយការទូតជាមួយប្រទេសមួយនេះផងដែរ៕
