មន្ត្រីជាន់ខ្ពស់ក្រសួងមហាផ្ទៃអះអាងថា រដ្ឋាភិបាលបានចាត់វិធានការដាក់បំរាមជនជាតិសហរដ្ឋអាមេរិកម្នាក់ដែលត្រូវជាមិត្តរបស់កញ្ញា សេង ធារី មិនឱ្យចូលកម្ពុជាជារៀងរហូត ក្រោមហេតុផលថាបានធ្វើសកម្មភាពប៉ះពាល់កិត្តិយសកម្ពុជា។
អ្នកនាំពាក្យក្រសួងមហាផ្ទៃ លោក ខៀវ សុភ័គ ប្រាប់វីអូឌីនៅថ្ងៃព្រហស្បតិ៍នេះថា ក្រសួងមហាផ្ទៃបានស្នើសុំគោលការណ៍ឱ្យប្រមុខរដ្ឋាភិបាលប្រាប់ដល់គ្រប់ស្ថានទូតស្ថាន និងស្ថានកុងស៊ុលរបស់កម្ពុជានៅបរទេសមិនឱ្យផ្តល់ទិដ្ឋាការដល់ជនជាតិអាមេរិកឈ្មោះ JARED GENSER ចូលមកកម្ពុជាទេ។
លោក ខៀវ សុភ័គ ថ្លែងថា៖ «យើងសុំទៅប្រមុខរដ្ឋាភិបាលដើម្បីជម្រាបដល់ស្ថានទូតរបស់យើង ស្ថានកុងស៊ុលនៅបរទេស សុំកុំឱ្យផ្តល់ទិដ្ឋាការឱ្យជនហ្នឹងទៀត»។
ការដាក់បំរាមយ៉ាងដូច្នេះ ធ្វើឡើងក្រោយមន្ត្រីក្រសួងមហាផ្ទៃរូបនេះអះអាងថា ជនជាតិអាមេរិកឈ្មោះ លោក JARED GENSER បានល្មើសនឹងច្បាប់ស្តីពីអន្តោប្រវេសន៍ ដោយបានប្រើប្រាស់ទិដ្ឋាការស្នើសុំចូលមកកម្ពុជាដើម្បីទេសចរ ប៉ុន្តែមិនបានគោរពនូវទិដ្ឋាការទេសចរទេ តែតាំងខ្លួនជាមេធារីអន្តរជាតិល្បីឈ្មោះទៅវិញ។ លោកថា ជនបរទេសរូបនេះ បានធ្វើឱ្យប៉ះពាល់ដល់កិត្តិយសកម្ពុជា ដោយចូលរួមសវនាការតាមដានរឿងក្តីកញ្ញា សេង ធារី និងបានផ្តល់បទសម្ភាសន៍ជាមួយសារព័ត៌មានអំពីនីតិវិធីក្នុងតុលាការ។
លោកបន្តថា៖ «មិនត្រឹមតែប៉ុណ្ណឹង គាត់និយាយម៉ាក់ងាយដល់តុលាការទាំងមូល និយាយរួមមើលងាយជនជាតិខ្មែរតែម្តង។ (គាត់) ថា រដ្ឋាភិបាលតែហ៊ានឱ្យយាយ (កញ្ញា សេង ធារី) ហ្នឹងជាប់ទោស ប្រយ័ត្នតែ…! វាព្រមានមកយើង ហើយក្នុងនាមយើងជាជនជាតិមួយដែរ ថ្វីត្បិតតែយើងមិនមានដូចគេអាមេរិកាំងអី យើងមានសិទ្ធិដូចគ្នាតើ»។
លោក ខៀវ សុភ័គ ថានាពេលនេះជនជាតិអាមេរិកខាងលើមិនស្នាក់នៅកម្ពុជាទៀតទេ។ លោកថា លោក JARED GENSER ជាជនជាតិអាមេរិកទី១ក្នុងឆ្នាំ២០២២នេះ ដែលត្រូវបានដាក់បំរាមមិនឱ្យចូលកម្ពុជាជារៀងរហូត។
វីអូឌី បានព្យាយាមទាក់ទងទៅកញ្ញា សេង ធារី ជាច្រើនលើកនៅល្ងាចថ្ងៃទី២០ ខែមករា ប៉ុន្តែមិនមានការឆ្លើយតប។
យ៉ាងនេះក្តី នាយករងទទួលបន្ទុកកម្មវិធីឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត ចាត់ទុកការសម្រេចមិនឱ្យលោក JARED GENSER ចូលកម្ពុជារហូតបែបនេះ ជាការសម្រេចលឿនពេក និងមិនគ្រប់ជ្រុងជ្រោយ ខណៈកន្លងមកសហរដ្ឋអាមេរិកបានដាក់ទណ្ឌកម្មទៅលើមន្ត្រីជាន់ខ្ពស់របស់កម្ពុជាមួយចំនួនទាក់ទងនឹងបញ្ហារំលោភសិទ្ធិមនុស្សផងដែរ។
លោក អំ សំអាត បន្ថែមថា៖ «ខ្ញុំបារម្ភខ្លាចគេរិះគន់ថា ការមិនអនុញ្ញាតឱ្យគាត់ចូលមកស្រុកខ្មែរជារៀងរហូតនេះ វាជាការមួយឆ្លើយតបទៅនឹងការដាក់ទណ្ឌកម្មពីមុនមកចំពោះមន្ត្រីជាន់ខ្ពស់រាជរដ្ឋាភិបាលមួយចំនួននោះ»។
លោកថា បើសិនជាការបញ្ចេញមតិ ឬករណីរបស់លោក JARED GENSER មានប៉ះពាល់ដល់ប្រព័ន្ធយុត្ថាធិការកម្ពុជាយ៉ាងណានោះ គួរតែមានការជជែកគ្នាផ្សេងទៀតដើម្បីស្វែងយល់ពីភាគីកម្ពុជា និងភាគីលោក JARED GENSER។
លោក JARED GENSER បានចូលរួមឃ្លាំមើលដំណើរការសវនាការលើកញ្ញា សេង ធាវី និងបានផ្ដល់បទសម្ភាសន៍លើបណ្តាញសារព័ត៌មានមួយចំនួននៅមុខសាលាដំបូងរាជធានីភ្នំពេញ ដោយបានហៅសវនាការនោះថាជា «សវនាការឆាកល្ខោន»៕