សមាជិកសភាសហរដ្ឋអាមេរិក២រូប បានសរសេរលិខិតទៅកាន់រដ្ឋមន្ត្រីការបរទេសរបស់ខ្លួនឱ្យដាក់សម្ពាធមកលើរដ្ឋាភិបាលកម្ពុជា ខណៈតុលាការកម្ពុជាបានបើកសវនាការកាត់ទោសលោក កឹម សុខា កាលពីថ្ងៃទី១៩ ខែមករា ម្សិលមិញ។
សមាជិកសភាអាមេរិកមកពីគណបក្សប្រជាធិបតេយ្យប្រចាំរដ្ឋកាលីហ្វ័រញ៉ា លោក ALAN LOWENTHAL និងសមាជិកសភាអាមេរិកមកពីគណបក្សសាធារណរដ្ឋប្រចាំរដ្ឋអូហៃយូ (Ohio) លោក STEVE CHABOT បានសរសេរលិខិតរួមគ្នាមួយកាលពីថ្ងៃទី១៨ ខែមករា ដោយស្នើឱ្យរដ្ឋមន្ត្រីការបរទេសអាមេរិក លោក Antony Blinken ជំរុញទៅរដ្ឋាភិបាលកម្ពុជាឱ្យទម្លាក់ចោលការចោទប្រកាន់ទៅលើលោក កឹម សុខា និងជំរុញឱ្យរដ្ឋាភិបាលកម្ពុជាវិលត្រលប់មករកគន្លងប្រជាធិបតេយ្យឡើងវិញ។
សមាជិកសភាអាមេរិកទាំង២រូបបានប្រាប់រដ្ឋមន្ត្រីការបរទេសរបស់ខ្លួនថា លោក កឹម សុខា ប្រធានគណបក្សសង្គ្រោះជាតិដែលត្រូវបានតុលាការរំលាយ ត្រូវបានចាប់ខ្លួននៅខែកញ្ញា ឆ្នាំ២០១៧ ដោយអាជ្ញាធរកម្ពុជា ក្រោមការចោទប្រកាន់ពីបទគប់គិតជាមួយសហរដ្ឋអាមេរិកដើម្បីផ្ដួលរំលំរដ្ឋាភិបាលកម្ពុជា ហើយត្រូវបើកសវនាការឡើងវិញនៅថ្ងៃទី១៩ ខែមករា ឆ្នាំ២០២២ បន្ទាប់ពីបានពន្យារពេលអស់២ឆ្នាំ។
លិខិតនោះសរសេរថា៖ «សកម្មភាពដែលកំពុងប្រព្រឹត្តដោយរដ្ឋាភិបាលលោក ហ៊ុន សែន គឺជាការឆ្លុះបញ្ចាំងពីការដាក់ទណ្ឌកម្មពីសហរដ្ឋអាមេរិក និងការព្យួរប្រព័ន្ធអនុគ្រោះពន្ធពីសហភាពអឺរ៉ុប។ សកម្មភាពបន្ថែម [ទណ្ឌកម្ម] គឺជាការចាំបាច់ ដើម្បីជាការផ្ញើសារឱ្យកាន់តែច្បាស់ទៅកាន់លោកនាយករដ្ឋមន្ត្រី ហ៊ុន សែន និងរដ្ឋាភិបាលរបស់គាត់ថា សហរដ្ឋអាមេរិក និងសហគមន៍អន្តរជាតិ នៅតែបន្តឃ្លាំមើលពីបញ្ហារបស់កម្ពុជា»។
យ៉ាងណាក្ដី សមាជិកសភាអាមេរិកទាំង២រូបបានសរសេរដែរថា លោកនាយករដ្ឋមន្ត្រី ហ៊ុន សែន អាចងាកក្រោយវិញបាន តាមរយៈការដោះលែងនិងទម្លាក់រាល់ការចោទប្រកាន់ទៅលើលោក កឹម សុខា និងសមាជិកគណបក្សប្រឆាំងដែលត្រូវបានតុលាការរំលាយដទៃទៀត រួចបើកឱ្យគណបក្សសង្គ្រោះជាតិអាចវិលមកប្រឡូកក្នុងឆាកនយោបាយនៅកម្ពុជាឡើងវិញ។
ប្រធានអង្គភាពអ្នកនាំពាក្យរដ្ឋាភិបាលកម្ពុជា លោក ផៃ ស៊ីផាន មិនចាប់អារម្មណ៍ចំពោះលិខិតរបស់សមាជិកសភាសហរដ្ឋអាមេរិកទាំងពីរនេះទេ។ បន្ថែមលើនេះ លោកថា សហរដ្ឋអាមេរិកមិនអាចលូកដៃចូលក្នុងកិច្ចការតុលាការកម្ពុជាបានទេ។
លោកថា៖ «ខ្ញុំអត់បានឃើញពីគេដាក់ [ទណ្ឌកម្ម] ពីរឿងឯកឧត្ដម កឹម សុខា ហ្នឹងថាដាក់នៅក្នុងរឿងអ្វីទេ! តែការកាត់ទោសជាអធិបតេយ្យភាពរបស់តុលាការកម្ពុជា អាហ្នឹងតែប៉ុណ្ណឹងទេ! ហើយបរទេសដែលមកលូកលាន់ក្នុងអធិបតេយ្យភាពរបស់តុលាការកម្ពុជា គឺមិនអាចទៅរួចទេ។ បើគេដាក់ទណ្ឌកម្មអី អាហ្នឹងជារឿងរបស់គាត់»។
កាលពីខែសីហា ឆ្នាំ២០២០ សហភាពអឺរ៉ុបបានសម្រេចដកប្រព័ន្ធអនុគ្រោះពន្ធ (EBA) ២០% ពីកម្ពុជា បន្ទាប់ពីសហភាពអឺរ៉ុបបានបរាជ័យក្នុងការជំរុញឱ្យរដ្ឋាភិបាលកម្ពុជាស្ដារលទ្ធិប្រជាធិបតេយ្យនៅកម្ពុជាឡើងវិញ នៅក្រោយការរំលាយគណបក្សសង្គ្រោះជាតិ ការចាប់ខ្លួន និងការចោទប្រកាន់ទៅលើលោក កឹម សុខា ជាដើម។
ចំណែករដ្ឋសភាសហរដ្ឋអាមេរិក កាលពីខែកញ្ញា ឆ្នាំ២០២១ ក៏បានអនុម័តច្បាប់ស្ដីពីលទ្ធិប្រជាធិបតេយ្យកម្ពុជា (Cambodia Democracy Act) ឆ្នាំ២០២១ ឬ H.R 4686 ដែលសំដៅដាក់ទណ្ឌកម្មមកលើបុគ្គលសំខាន់ៗដែលធ្វើឱ្យខូចដល់ដំណើរការលទ្ធិប្រជាធិបតេយ្យនៅកម្ពុជាផងដែរ។ ច្បាប់ដែលផ្ដួចផ្ដើមឡើងដោយតំណាងរាស្ត្រសហរដ្ឋអាមេរិកទាំង២នេះ កំពុងស្ថិតនៅក្នុងដៃព្រឹទ្ធសភាអាមេរិកនៅឡើយ៕
