ធនាគារពិភពលោក (World Bank) បានអនុម័តជំនួយហិរញ្ញប្បទានសរុបចំនួនជិត៧០លានដុល្លារសហរដ្ឋអាមេរិក (៦៩,២៥) ដើម្បីជួយកម្ពុជាក្នុងការធ្វើឱ្យកាន់តែប្រសើរឡើងនូវលទ្ធភាពប្រកបដោយសមធម៌ ក្នុងការទទួលបានការអប់រំជាមូលដ្ឋាន និងក្នុងការឆ្លើយតបឱ្យបានរហ័សទៅនឹងវិបត្តិនានាដែលប៉ះពាល់ដល់ប្រព័ន្ធអប់រំនៅកម្ពុជា។
កញ្ចប់មូលនិធិថ្មីនេះ រួមមាន ទឹកប្រាក់ចំនួន៦០លានដុល្លារអាមេរិកដែលធនាគារពិភពលោកនឹងផ្ដល់ជាឥណទានតាមរយៈសមាគមអភិវឌ្ឍន៍អន្តរជាតិ (International Development Association/IDA) និង ៩,២៥លានដុល្លារអាមេរិកទៀតដែលជាជំនួយឥតសំណងពីអង្គការភាពជាដៃគូសកលដើម្បីការអប់រំ។
បើតាមសេចក្ដីប្រកាសព័ត៌មានរបស់ធនាគារពិភពលោក កាលពីថ្ងៃទី១៨ ខែមករា ហិរញ្ញប្បទាននេះនឹងជួយទ្រទ្រង់ដល់គម្រោងកែលម្អការអប់រំទូទៅ (GEIP) ដែលមានរយៈពេល៥ឆ្នាំ ជាមួយគោលបំណងជួយកម្ពុជាក្នុងការឈានទៅសម្រេចចក្ខុវិស័យនៃផែនការយុទ្ធសាស្ត្រនៃការអប់រំ ឆ្នាំ២០១៩-២០២៣។
ចក្ខុវិស័យនេះគឺឆ្ពោះទៅ «បង្កើតនិងអភិវឌ្ឍធនធានមនុស្សប្រកបដោយគុណភាពខ្ពស់និងសីលធម៌ល្អ ដើម្បីអភិវឌ្ឍឱ្យបានសង្គមមួយដែលមានចំណេះដឹងជាមូលដ្ឋាន»។
ប្រភពដដែលបន្តថា គម្រោងនេះក៏មានសកម្មភាពធំៗជាច្រើនទៀតដូចជា ការអនុវត្តកម្មវិធីគ្រប់គ្រងនៅតាមសាលារៀន ការផ្ដល់ការអភិវឌ្ឍសមត្ថភាពរបស់គ្រូបង្រៀន ថ្នាក់ដឹកនាំសាលា គ្រូបណ្ដុះបណ្ដាល និងបុគ្គលិកសិក្សា និងការកែលម្អបរិយាកាសរៀនឱ្យប្រសើរឡើងថែមទៀត។
បន្ថែមពីនេះ មានការសាងសង់និងស្ដារជួសជុលឡើងវិញនូវអគារសិក្សា មន្ទីរពិសោធន៍វិទ្យាសាស្ត្រ ស្ថាប័នបណ្ដុះបណ្ដាលគ្រូ និងសាលាអប់រំពិសេស ព្រមទាំងតម្រូវការទិញគ្រឿងបរិក្ខារបច្ចេកទេសសម្រាប់ការអប់រំ និងការជួយដល់សិស្សមានពិការភាព រាប់ទាំងការវាយតម្លៃលើសភាពនៃពិការភាពនីមួយៗផង។ ក្រៅពីនេះ គម្រោងនៅមានការសាកល្បងកម្មវិធីអប់រំបច្ចេកវិទ្យាមួយ (EdTech) សម្រាប់មុខវិជ្ជាគណិតវិទ្យា៕