សាលាដំបូងខេត្តកំពត សម្រេចឱ្យអ្នកសារព័ត៌មានម្នាក់នៅក្រៅឃុំ ប៉ុន្តែស្ថិតក្រោមការតាមដានតាមផ្លូវតុលាការរយៈពេល៦ខែ ពាក់ព័ន្ធការផ្សាយព័ត៌មានស្ដីពីជម្លោះដីធ្លីនៅខេត្តនេះ កាលពីចុងឆ្នាំ២០២១។
កាលពីថ្ងៃទី២៩ ខែធ្នូ ឆ្នាំ២០២១ ចៅក្រមស៊ើបសួរសាលាដំបូងខេត្តកំពត លោក អាំង សុភា បានបង្គាប់ឱ្យចាងហ្វាងកាសែត LSN លោក លួស សេង ឆ្លើយបំភ្លឺក្រោមបទចោទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍ និងប្រមាថ» នៅថ្ងៃទី២០ ខែមករា ឆ្នាំ២០២២ ក្រោយពីអ្នកសារព័ត៌មានរូបនេះផ្សាយរឿងជម្លោះដីធ្លី និងការចាប់ខ្លួនពលរដ្ឋ៤នាក់នៅខេត្តកំពត។
ចាងហ្វាងកាសែត LSN លោក លួស សេង ប្រាប់ វីអូឌី យ៉ាងខ្លីក្រោយចេញពីតុលាការថា រូបលោកត្រូវបានតុលាការសម្រេចឱ្យត្រលប់ទៅផ្ទះវិញ ប៉ុន្តែដាក់ស្ថិតក្រោមការតាមដានតាមផ្លូវតុលាការរយៈពេល៦ខែ។ លោក លួស សេង សុំមិនទាន់ផ្ដល់បទសម្ភាសន៍បន្ថែមច្រើនទេ ដោយថា បារម្ភពីសុវត្ថិភាព។
នាយកប្រតិបត្តិសមាគមអ្នកសារព័ត៌មានកម្ពុជា (ខេមបូចា) លោក ណុប វី ចាត់ទុកការប្ដឹងអ្នកសារព័ត៌មានទៅតុលាការនេះថា ជាការរំលោភលើសិទ្ធិសេរីភាព និងជាការគំរាមកំហែង ដែលធ្វើឱ្យប៉ះពាល់ដល់ការអនុវត្តការងារនិងតួនាទីរបស់អ្នកសារព័ត៌មាន។
លោក ណុប វី បន្តថា ប្រសិនបើអ្នកសារព័ត៌មានរាយការណ៍មានចំណុចខ្វះខាតនិងមិនគ្រប់ជ្រុងជ្រោយនៅត្រង់ចំណុចណាមួយនោះ ខាងសមត្ថកិច្ចត្រូវចេញសេចក្ដីបំភ្លឺ ឬបកស្រាយប្រាប់ទៅអ្នកសារព័ត៌មាននោះវិញ ដោយមិនត្រូវចាប់និងប្រើប្រាស់ប្រព័ន្ធតុលាការមកចាត់ការលើអ្នកសារព័ត៌មានបែបនេះទេ។
កាលពីថ្ងៃទី៨ ខែវិច្ឆិកា ឆ្នាំ២០២១ អ្នករាយការណ៍ព័ត៌មាន LSN TV ចំនួន២នាក់ គឺលោក សាយ សុភា និងលោក អ៊ីង ធឿង ត្រូវបានសមត្ថកិច្ចខេត្តកំពតចាប់ខ្លួននិងបញ្ជូនទៅតុលាការ បន្ទាប់ពីពួកគេបានផ្សាយព័ត៌មានរឿងជម្លោះដីធ្លី និងការចាប់ខ្លួនពលរដ្ឋ៤នាក់នៅខេត្តកំពត ប៉ុន្តែត្រូវបានដោះលែងវិញ ក្រោយពីតុលាការសាកសួរនិងចាប់ឃុំខ្លួនចំនួន៣យប់រួចមក។
នៅក្នុងវីដេអូឃ្លីបមួយដែលត្រូវបានផ្សព្វផ្សាយតាមបណ្ដាញសង្គមហ្វេសប៊ុក លោក ម៉ៅ ធនិន អភិបាលខេត្តកំពត បានបញ្ជាឱ្យមន្ទីរព័ត៌មាន ត្រួតពិនិត្យការចូលមកយកព័ត៌មានរបស់អ្នកសារព័ត៌មានក្នុងភូមិសាស្រ្តខេត្តកំពត។ អភិបាលខេត្តដែលត្រូវជាក្មួយប្រសាថ្លៃរបស់លោកនាយករដ្ឋមន្ត្រី ហ៊ុន សែន រូបនេះ ក៏បានព្រមានអ្នកសារព័ត៌មានទាំងឡាយណា ដែលលោកថា ផ្សព្វផ្សាយព័ត៌មានណាដែលធ្វើឱ្យប៉ះពាល់ដល់កិត្តិយសនិងកិច្ចខំប្រឹងប្រែងរបស់ថ្នាក់ដឹកនាំផងដែរ។
លោកមានប្រសាសន៍ថា៖ «បងសុំបញ្ជាត្រង់ទៅមន្ទីរព័ត៌មាន គ្រប់ស្ថាប័ននៅក្នុងស្ថាប័នព័ត៌មានទាំងអស់ ចុះធ្វើការនៅក្នុងខេត្ត ត្រូវឆ្លងកាត់ការត្រួតពិនិត្យរបស់មន្ទីរព័ត៌មាន គ្រប់គ្រងឱ្យបាន តើមានស្ថាប័នព័ត៌មានប៉ុន្មាន? ប៉ុន្មានស្ថាប័នដែលចុះមកធ្វើការនៅក្នុងខេត្ត? ទាន់? អត់មានចេះតែសរសេរ ហើយមកនិយាយ មកបោក! ស្ដាប់មួយយប់ៗក៏ខ្ញុំចង់វិលដែរ»។
លោក ម៉ៅ ធនិន បន្តថា៖ «អ្នកដែលមានសិទ្ធិមកប្រើប្រាស់ ធ្វើការងារយកព័ត៌មាននៅក្នុងខេត្ត ត្រូវឆ្លងកាត់មន្ទីរព័ត៌មាន គ្រប់គ្រងឱ្យបានមុខសញ្ញានេះ! ទាន់ហ្អេ? ចុះទៅណា? កន្លែងណា? ត្រូវតែដឹង ទាន់ទេ? ហើយត្រូវមានការទំនាក់ទំនងផ្ទាល់ទៅអាជ្ញាធរដែនដីរបស់យើង ថាថ្ងៃនេះព័ត៌មានមានប៉ុន្មានស្ថាប័នចុះទៅស្រុកនេះ»។
កាលពីថ្ងៃទី១៦ ខែវិច្ឆិកា ឆ្នាំ២០២១ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ មានប្រសាសន៍ថា ករណីសមត្ថកិច្ចចាប់ខ្លួនអ្នកសារព័ត៌មាន២នាក់នៅខេត្តកំពតនេះ ជារឿងមិនត្រឹមត្រូវឡើយ។ លោកថា អ្នកសារព័ត៌មានមានសិទ្ធិពេញលេញក្នុងការចុះយកព័ត៌មានទូទាំងប្រទេស ដោយពុំចាំបាច់ជូនដំណឹងឬសុំការអនុញ្ញាតពីអាជ្ញាធរឡើយ។
លោកបានគូសបញ្ជាក់ថា៖ «អភិបាលខេត្តមួយ [លោក ម៉ៅ ធនិន] អ្នកកាសែតទៅណា ត្រូវរាយការណ៍ ត្រូវជូនដំណឹងទៅអាជ្ញាធរ មិនមែនអ៊ីចឹងទេ! មាត្រា៤០ បាននិយាយពីសិទ្ធិដើរហើរបស់ពលរដ្ឋ គេទៅណា គេមានសិទ្ធិរបស់គេ គេមិនបាច់ជូនដំណឹងយើងទេ»៕
