រដ្ឋមន្ត្រីការពារជាតិអ៊ុយក្រែន លោក Oleksii Yuriyovych Reznikov បានឱ្យដឹងនៅថ្ងៃអាទិត្យម្សិលមិញថា ប្រទេសរបស់ខ្លួនបានទទួលសព្វាវុធពីសហរដ្ឋអាមេរិកជាលើកទី២ ដែលជាផ្នែកមួយនៃកញ្ចប់ជំនួយការពារជាតិក្នុងទំហំទឹកប្រាក់សរុបចំនួន២០០លានដុល្លារ។
អាមេរិកបានឱ្យដឹងថា ខ្លួននឹងបន្តគាំទ្រអ៊ុយក្រែន ស្របពេលដែលមានការព្រួយបារម្ភជុំវិញករណីដែលរុស្ស៊ីប្រមូលផ្ដុំទ័ពប្រមាណជា១០ម៉ឺននាក់នៅក្បែរព្រំដែនរបស់អ៊ុយក្រែន បើទោះបីជារុស្ស៊ីកាលពីពេលកន្លងទៅ ធ្លាប់បានបដិសេធគម្រោងរៀបចំការវាយប្រហារណាមួយលើប្រទេសមួយនេះយ៉ាងណាក៏ដោយ។
ទីភ្នាក់ងារសារព័ត៌មាន Reuters បានស្រង់សម្ដីរដ្ឋមន្ត្រីការពារជាតិអ៊ុយក្រែន បានសរសេរលើបណ្ដាញសង្គមធ្វីតធ័រ (Twitter) ថា៖ «កញ្ចប់ជំនួយទី២បានមកដល់អ៊ុយក្រែនហើយ ដែលក្នុងនោះមានសព្វាវុធជាង៨០តោន ដើម្បីពង្រឹងសមត្ថភាពការពាររបស់អ៊ុយក្រែនពីមិត្តរបស់យើងនៅសហរដ្ឋអាមេរិក។ សកម្មភាពនេះនឹងមានជាបន្តបន្ទាប់ទៀត ដោយមិនបញ្ចប់ត្រឹមនេះនោះទេ»។
គួរបញ្ជាក់ថា អាមេរិក រួមនឹងប្រទេសមួយចំនួនទៀត កាលពីពេលកន្លងទៅ ក៏ធ្លាប់បានព្រមានដាក់វិធានការសេដ្ឋកិច្ចធ្ងន់ធ្ងរនិងចំណាត់ការផ្សេងទៀតលើរុស្ស៊ី ក្នុងករណីដែលប្រទេសមួយនេះឈ្លានពានអ៊ុយក្រែនផងដែរ៕
The 1st bird arrived.All Ukrainians highly appreciate 🇺🇸 help in strengthening 🇺🇦 defense capabilities.Thanks to our strategic partner&personally to @secdef Lloyd Austin III for the unwavering support. To be continued @WhiteHouse @congressdotgov @USEmbassyKyiv @UKRintheUSA pic.twitter.com/6iPcpHtmc7
— Oleksii Reznikov (@oleksiireznikov) January 22, 2022