ធនាគារអភិវឌ្ឍន៍អាស៊ី (ADB) បានផ្តល់ជំនួយជិត ៧លានដុល្លារ ជួយស្តារវិស័យទេសចរណ៍ និងផលិតកម្មស្រូវនៅកម្ពុជាក្រោយពីរងផលប៉ះពាល់ដោយសារការរាតត្បាតនៃជំងឺកូវីដ-១៩។
ក្នុងសេចក្តីប្រកាសព័ត៌មាន នៅថ្ងៃទី៣១ ខែមករានេះ ADB បានសម្រេចផ្តល់ជំនួយចំនួនពីរដល់កម្ពុជា ដែលមានតម្លៃសរុប ៦,៨លានដុល្លារ ដើម្បីជួយស្តារវិស័យទេសចរណ៍ និងលើកស្ទួយគុណភាព និងផលិតកម្មស្រូវ ព្រមទាំងពង្រឹងខ្សែសង្វាក់ផ្គត់ផ្គង់ស្រូវនៅកម្ពុជា ដែលរងផលប៉ះពាល់ដោយសារការរាតត្បាតនៃជំងឺកូវីដ-១៩។
សេចក្ដីប្រកាសព័ត៌មានដដែល បញ្ជាក់ថា ជំនួយទី១ មានតម្លៃ ៣,៧លានដុល្លារ ត្រូវបានរំពឹងថា នឹងជួយដល់ប្រជាសហគមន៍ចំនួន៤ ០០០នាក់ តាមរយៈគម្រោងស្តារសហគមន៍ទេសចរណ៍ដែលគ្របដណ្តប់តំបន់ក្បែរប្រាសាទបេតិកភណ្ឌព្រះវិហារក្នុងខេត្តព្រះវិហារ និងប្រាសាទភ្នំដា ក្នុងខេត្តតាកែវ ដែលប្រាក់ប្រមាណ ៣លានដុល្លារ នៃជំនួយនេះ ត្រូវបានផ្តល់ដោយមូលនិធិជប៉ុនសម្រាប់ភាពរុងរឿង និងភាពធន់នៅអាស៊ី និងប៉ាស៊ីហ្វិក (the Japan Fund for Prosperous and Resilient Asia and the Pacific)។
សេចក្តីប្រកាសព័ត៌មាននេះ បញ្ជាក់ទៀតថា កញ្ចប់ជំនួយចំនួន ៣,៩លានដុល្លារ នឹងជួយដល់កសិករខ្នាតតូចចំនួន ២២ ០០០នាក់ ដែលជាការផ្តល់ហិរញ្ញប្បទានបន្ថែមសម្រាប់កម្មវិធីអភិវឌ្ឍន៍វិស័យពាណិជ្ជកម្មស្រូវធន់នឹងអាកាសធាតុនៅក្នុងខេត្តបាត់ដំបង កំពង់ធំ និងព្រៃវែង ហើយថវិកាប្រមាណ ៣,៨លានដុល្លារ នៃជំនួយនេះ បានមកពីកម្មវិធីកសិកម្មនិងសន្តិសុខស្បៀងសកល (the Global Agriculture and Food Security Program) ដែលជាមូលនិធិសកលមានគោលបំណងកាត់បន្ថយភាពអត់ឃ្លាន និងកែលម្អអាហារូបត្ថម្ភនៅក្នុងប្រទេសមានចំណូលទាប។
នាយកស្តីទីធនាគារអភិវឌ្ឍន៍អាស៊ីប្រចាំប្រទេសកម្ពុជា លោក Anthony Gill ដែលបានស្រង់សម្តីដាក់ក្នុងសេចក្តីប្រកាសព័ត៌មាន បានថ្លែងថា កញ្ចប់ជំនួយទី១ នឹងជួយសហគមន៍កែលម្អហេដ្ឋារចនាសម្ព័ន្ធ ទេសចរណ៍ និងសេវាកម្ម អតិថិជន ដើម្បីទាក់ទាញភ្ញៀវទេសចរកាន់តែច្រើន និងជំរុញសេដ្ឋកិច្ចក្នុងតំបន់។ ដោយឡែក កញ្ចប់ជំនួយទី២ នឹងជួយកសិករដំណាំស្រូវនៅកម្ពុជា បង្កើនប្រាក់ចំណូល និងភាពធន់នឹងអាកាសធាតុតាមរយៈការដោះស្រាយ បញ្ហារំខានផ្នែកដឹកជញ្ជូន និងសង្វាក់ផ្គត់ផ្គង់ ដែលបណ្តាលមកពីជំងឺកូវីដ-១៩។
សេចក្តីប្រកាសព័ត៌មាន បន្ថែមថា៖ «ធនាគារអភិវឌ្ឍន៍អាស៊ី ប្តេជ្ញាថា នឹងសម្រេចឱ្យបាននូវវិបុលភាព បរិយាប័ន្ន ភាពធន់ និងនិរន្តរភាព ក្នុងតំបន់អាស៊ីនិងប៉ាស៊ីហ្វិក ស្របជាមួយនឹងការខិតខំប្រឹងប្រែង ដើម្បីលុបបំបាត់ភាពក្រីក្រខ្លាំង»៕
