នាយករដ្ឋមន្ត្រី ហ៊ុន សែន ថ្លែងថា ទំនិញឡើងថ្លៃក្នុងរយៈពេលប៉ុន្មានថ្ងៃក្នុងរដូវសែនចិននេះ គឺជារឿងធម្មតាទៅហើយ ប៉ុន្តែពលរដ្ឋមួយចំនួន ស្នើឱ្យមានការត្រួតពិនិត្យលើបញ្ហានេះ ដើម្បីជៀសវាងឈ្មួញកណ្តាលឆ្លៀតឱកាសតម្លើងថ្លៃទំនិញតាមចិត្ត។
ក្នុងពិធីបើកការដ្ឋានសាងសង់ស្ពានអាកាសថ្មីនៅផ្លូវជាតិលេខ៥ ក្នុងខណ្ឌឫស្សីកែវ រាជធានីភ្នំពេញ នៅព្រឹកថ្ងៃទី៣១ ខែមករា ឆ្នាំ២០២២នេះ លោកនាយករដ្ឋមន្ត្រី ហ៊ុន សែន ថ្លែងថា បច្ចុប្បន្នពលរដ្ឋកម្ពុជាភាគច្រើនមានប្រាក់ចំណូល ខណៈឆ្នាំនេះទំនិញឡើងថ្លៃជាងឆ្នាំមុន។
លោក ហ៊ុន សែន មានប្រសាសន៍បន្តថា៖ «ប្រជាពលរដ្ឋរបស់យើងមានប្រាក់ចំណូល បើទោះបីថាមិនមានប្រាក់គ្រប់ទាំងអស់គ្នា១០០% ក៏ប៉ុន្តែភាគច្រើនគឺមាន។ សូម្បីតែថ្ងៃហ្នឹង យើងពិនិត្យមើល ជ្រូកលក់តាមផ្សារ ពិតមែនហើយថ្ងូរថាឆ្នាំហ្នឹងថ្លៃជាងឆ្នាំទៅ! បើមិនថ្លៃអាម៉េច? ឆ្នាំទៅខ្លាចកូវីដ អត់សូវហ៊ានចូលឆ្នាំទេ»។
លោកអះអាងថា ទំនិញឡើងថ្លៃនារដូវសែនចិនជារឿងធម្មតា រវាងសេចក្តីត្រូវការ និងការផ្គត់ផ្គង់ទំនិញលើទីផ្សារ។
លោកនាយករដ្ឋមន្ត្រី គូសបញ្ជាក់ថា៖ «យើងពិនិត្យមើលនៅទីក្រុងភ្នំពេញប៉ុន្មានថ្ងៃនេះ មាននិន្នាការនៃទំនិញឡើងថ្លៃ បញ្ហានេះវាជាក្រឹត្យក្រមធម្មតាៗរវាងសេចក្តីត្រូវការ និងការផ្គត់ផ្គងអាហ្នឹងវាត្រូវស៊ីសង្វាក់គ្នាជានិច្ច។ រវាងសេចក្តីត្រូវការ និងការផ្គត់ផ្គង់ ស៊ីសង្វាក់គ្នា!»។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង លើកឡើងថា ក្នុងឱកាសមានបុណ្យទានម្តងៗ ក្រសួងស្ថាប័នពាក់ព័ន្ធ គួរមានវិធានការពិនិត្យលើការនាំចូលទំនិញឱ្យបានត្រឹមត្រូវ និងគួរបង្កើនបរិមាណនៃការនាំចូលទំនិញ នោះទើបអាចកាត់បន្ថយទំនិញឡើងថ្លៃបាន។
លោកថា៖ «បុណ្យទានទាំងអស់គ្នាបានសប្បាយ ប្រជាជនអីគ្នាបានសប្បាយទាំងអស់គ្នាហ្នឹង គួរតែកុំឡើងថ្លៃ ប៉ុន្តែបង្កើនបរិមាណវិញ។ នៅក្នុងខែចូលឆ្នាំឧបមាថា យើងប្រើបន្លែនៅក្នុងរាជធានីភ្នំពេញ ឧបមាថាជាធម្មតាយើងអស់ថាមួយថ្ងៃ ២ ០០០តោន ឬ៣ ០០០តោន ដល់ពេលចូលឆ្នាំចិនអីចឹង យើងបង្កើនដល់ ៨ ០០០តោនអីចឹង ឧទាហរណ៍ពីរដង ឬបីដងចឹងទៅ»។
មួយវិញទៀត លោក គិមអេង យល់ថា រដ្ឋាភិបាលគួរលើកទឹកចិត្តកសិករឱ្យដាំ និងជួយសម្របសម្រួលឱ្យផលិតផលកសិកម្មទាំងនោះចូលតាមទីផ្សារឱ្យបានគ្រប់គ្រាន់ ដើម្បីបំពេញតម្រូវការ និងត្រូវមានការគ្រប់គ្រងតាមដាននូវកង្វះខាត នោះទើបអាចធ្វើឱ្យតម្លៃទំនិញនៅលើទីផ្សារស្ថិរភាព។
អាជីវករលក់បន្លែក្នុងរាជធានីភ្នំពេញ អ្នកស្រី ម៉ុង ស៊ីម៉ុន ថ្លែងថា រដូវសែនចិនឆ្នាំនេះ អ្នកស្រីលក់បន្លែមិនសូវដាច់ដូចមុនពេលមានវិបត្តិកូវីដ-១៩នោះទេ ខណៈបន្លែឆ្នាំនេះមានតម្លៃហក់ឡើងខ្ពស់ ហើយប្រជាពលរដ្ឋអាចនឹងចាយវាយត្បិតត្បៀតក្នុងអំឡុងមានវិបត្តិកូវីដ-១៩។
អ្នកស្រីថា៖ «អីវ៉ាន់ឡើងថ្លៃ ខ្ញុំឆ្ងល់ដែរ! ដល់ពេលហ្នឹង ខ្ញុំថាអាហ្នឹងមកពីអ្នករកស៊ីទីផ្សារហ្នឹងគេឡើង[ថ្លៃ]ពេលហ្នឹង ដើម្បីចំណេញពេលហ្នឹងដឹង? គេមានឱកាសពេលហ្នឹង។ ចឹងកុំឱ្យថ្លៃ យើងទិញ[របស់ណាទិញទុកបាន] ទុកពីមុនទៅ ដូចក្រដាសសែនអី យើងទិញទុកក៏វាមិនខូចដែរ»។
បែបនេះក្តី អ្នកស្រី ស៊ីម៉ុន ស្នើឱ្យរដ្ឋាភិបាលធ្វើយ៉ាងណាជួយឱ្យទីផ្សារនាំចូលមានតម្លៃសមរម្យ ដើម្បីឱ្យអាជីវករអាចលក់បន្តដោយយកចំណេញបន្តិចបន្តួច និងមិនធ្វើឱ្យអ្នកទិញចំណាយប្រាក់កាសច្រើនក្នុងការទិញទំនិញ។
ពលរដ្ឋរស់នៅខេត្តសៀមរាប លោក រិន សុខរឿង និយាយថា បើទោះលោកមិនជាប់សែស្រឡាយចិន និងមិនបានសែនព្រេនក៏ពិតមែន ប៉ុន្តែលោកក៏ត្រូវការទិញគ្រឿងសម្រាប់បរិភោគ ដូចជាបន្លែ ត្រី សាច់ និងផ្លែឈើជាដើម ប៉ុន្តែតម្លៃទំនិញទាំងនោះសុទ្ធតែឡើងថ្លៃក្នុងឱកាសបុណ្យចូលឆ្នាំចិននេះ និងបុណ្យផ្សេងៗទៀត។
លោកថា៖ «គួរតែរដ្ឋមានអ្នកត្រួតពិនិត្យ ឬក៏សំខាន់ជាងគេឱ្យរដ្ឋអ្នកចាត់ចែងក្នុងការរៀបចំលក់ ឬក៏ទិញដូចប្រទេសគេខាងៗ ដូចជាប្រទេសថៃជាដើម អាហ្នឹងបានយើងតម្លៃថេរ។ បើយើង នៅប្រទេសយើងដូចជាថាសេរីផងក៏បាន មិនសេរីផងក៏បាន ដោយសារអីស្រេចតែអ្នកលក់ ឬក៏ហៅថាឈ្មួញកណ្តាល បើគាត់ចង់ឡើងប៉ុណ្ណា[គឺ]ប៉ុណ្ណោះ គាត់ចុះប៉ុណ្ណា[គឺ]ប៉ុណ្ណោះ»។
យ៉ាងណា អ្នកតាមដានសង្គម សង្កេតឃើញថា បញ្ហាទំនិញឡើងថ្លៃខ្ពស់នៅកម្ពុជា ក្នុងឱកាសបុណ្យទាននេះ កើតឡើងស្ទើររាល់ឆ្នាំ ប៉ុន្តែរដ្ឋាភិបាលនៅតែមិនអាចដោះស្រាយបញ្ហានេះបាន ក្រៅពីការអំពាវនាវកុំឱ្យមានការតម្លើងថ្លៃ ក្រោមហេតុផលថា កម្ពុជាអនុវត្តរបបសេដ្ឋកិច្ចទីផ្សារសេរី។
រដ្ឋធម្មនុញ្ញកម្ពុជាមាត្រា៣៥ ចែងថា សេចក្តីស្នើទាំងឡាយរបស់ប្រជាពលរដ្ឋ ត្រូវបានទទួលការពិនិត្យ និងដោះស្រាយដោយយ៉ាងហ្មត់ចត់ពីអង្គការរដ្ឋ។ ដោយឡែកមាត្រា៦៣វិញ ចែងថា រដ្ឋត្រូវយកចិត្តទុកដាក់គ្រប់គ្រងទីផ្សារ ជួយឱ្យជីវភាពរបស់ពលរដ្ឋមានកម្រិតសមរម្យ៕
