អង្គភាពប្រឆាំងអំពើពុករលួយ ឬ ACU បានបញ្ជូនមន្រ្តីខ្លួនម្នាក់ទៅសាលាដំបូងរាជធានីភ្នំពេញ ដើម្បីចាត់វិធានការច្បាប់បន្ត ក្រោយពីរកឃើញថាមន្ត្រីរូបនោះជាប់ពាក់ព័ន្ធនឹងអំពើពុករលួយ។
សេចក្ដីប្រកាសរបស់អង្គភាពប្រឆាំងអំពើពុករលួយ (អ.ប.ព) បានបញ្ជាក់ថា កាលពីថ្ងៃទី២៨ ខែមករា ឆ្នាំ២០២២នេះ ក្រុមស៊ើបអង្កេតផ្ទៃក្នុងនៃអង្គភាពប្រឆាំងអំពើពុករលួយ បានប្រមូលព័ត៌មាន ភស្តុតាងជាបន្តបន្ទាប់ ព្រមទាំងស្ដាប់ចម្លើយរបស់ឈ្មោះ ទូច ទិត្យវឌ្ឍនា អាយុ២៧ឆ្នាំ មន្ត្រីនាយកដ្ឋានកិច្ចការគតិយុត្ត ពាក្យប្ដឹង និងអន្ដរជាតិ រួចមក អង្គភាពនេះរកឃើញថា បុគ្គលឈ្មោះ ទូច ទិត្យវឌ្ឍនា ជាប់សង្ស័យប្រព្រឹត្តអំពើពុករលួយដែលប្បញ្ញាតក្នុងមាត្រា៥៩២ ឬបទវិតិក្រម នៃក្រមព្រហ្មទណ្ឌ និងមាត្រា៣២ នៃច្បាប់ស្ដីពីការប្រឆាំងអំពើពុករលួយ។
សេចក្ដីប្រកាសរបស់ ACU ឱ្យដឹងទៀតថា៖ «ជនសង្ស័យឈ្មោះ ទូច ទិត្យវឌ្ឍនា បានប្រើប្រាស់វិធីនានាក្នុងពេលដែលខ្លួនកំពុងទទួលខុសត្រូវ ទទួលពិនិត្យពាក្យប្ដឹង ដើម្បីរកប្រយោជន៍ផ្ទាល់ខ្លួនខុសច្បាប់ ហើយពេលដែលខ្លួនត្រូវបញ្ឈរជើងផ្អាកការងារហើយក្ដី ក៏ឈ្មោះនេះមិនបានបញ្ឈប់សកម្មភាពខុសច្បាប់របស់ខ្លួន ហើយទាញយកផលប្រយោជន៍ពីពាក្យប្ដឹងដែលខ្លួនមិនទទួលបន្ទុកទៀតផង»។
ករណីនេះ អង្គភាពប្រឆាំងអំពើពុករលួយ លើកទឹកចិត្តដល់សាធារណជនចូលរួមផ្ដល់ព័ត៌មានមកអង្គភាពនេះជាបន្ទាន់ ក្នុងករណីដែលមានជនខិលខូចណាម្នាក់អះអាងថា ខ្លួនអាចប្រើប្រាស់តួនាទីរបស់ខ្លួនជាមន្ត្រី អ.ប.ព ដើម្បីជួយសម្រួលដល់កិច្ចការល្មើសច្បាប់ណាមួយ។
វីអូឌី មិនអាចសុំការបញ្ជាក់ពីអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ និងប្រធានអង្គភាពប្រឆាំងអំពើពុករលួយ លោក ឱម យ៉ិនទៀង បានទេ នៅថ្ងៃនេះ។
ដោយឡែក អនុប្រធាន ACU លោក ឃាង សេង មិនអាចបកស្រាយរឿងនេះឡើយ ដោយរុញឱ្យទាក់ទងទៅអ្នកនាំពាក្យអង្គភាពមួយនេះ គឺលោក សយ ចាន់វិចិត្រ ប៉ុន្តែវីអូឌីមិនអាចរកប្រភពទាក់ទងបានទេនៅរសៀលថ្ងៃអង្គារនេះ។
ទាក់ទិនបញ្ហាពុករលួយនេះដែរ ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង កាលពីថ្ងៃទី២៦ ខែមករា ឆ្នាំ២០២២ បានចេញលិខិតអញ្ជើញ ឬកោះហៅ លោក ឯក ច័ន្ទពន្លឹក សាកលវិទ្យាធិការរងសាកលវិទ្យាល័យការពារជាតិ ដើម្បីឱ្យចូលខ្លួនទៅបំភ្លឺពាក់ព័ន្ធភាពមិនប្រក្រតីមួយចំនួននៅក្នុងសកម្មភាពបំពេញតួនាទីភារកិច្ចរបស់ខ្លួន តាមពាក្យបណ្ដឹងដែលអង្គភាពមួយនេះទទួលបានកាលពីថ្ងៃទី១៨ ខែមករា ឆ្នាំ២០២២។
ភាពមិនប្រក្រតីរបស់លោក ឯក ច័ន្ទពន្លឹក រួមមាន កិបកេងប្រាក់អន្តរាគមន៍របស់ក្រសួងជាប្រយោជន៍ផ្ទាល់ខ្លួន នៅក្នុង១ខែ ចំនួន៣០លានរៀល និងប្រាក់ហ្វឹកហ្វឺន ១ខែ ចំនួន១០០លានរៀល ពីមហាវិទ្យាល័យការពារជាតិដែលខ្លួនកំពុងគ្រប់គ្រង។
ចំណែកករណីយោធាចារ្យបង្រៀនមួយម៉ោងទទួល៥ ០០០រៀល សរុប១០៧នាក់ ក្នុងមួយត្រីមាស សរុបប្រាក់ជាង៤ ០០លានរៀល គុណនឹងបួនត្រីមាស សរុបទឹកប្រាក់ជាង១ ៦០០លានរៀល ដែលជាប្រាក់របស់ក្រសួងការពារជាតិផ្ដល់ឱ្យការឡើងថ្នាក់របស់យោធាចារ្យ ក៏ត្រូវឪពុកនិងកូនទាំង៣នាក់របស់លោក ច័ន្ទពន្លឹក បានកិបកេងចាប់តាំងពីខែមេសា ឆ្នាំ២០២១ រហូតមកដល់បច្ចុប្បន្ននេះផងដែរ។
នាយកប្រតិបត្តិអង្គការតម្លាភាពកម្ពុជា (TI) លោក ប៉ិច ពិសី គាំទ្រចំពោះវិធានការរបស់អង្គភាពប្រឆាំងអំពើពុករលួយទៅលើមន្ត្រីរបស់ខ្លួនដែលល្មើសច្បាប់ ដើម្បីជាគំរូល្អក្នុងការទប់ស្កាត់កុំឱ្យមានបទល្មើសបែបនេះកើតឡើងបន្តទៀត។
លោកមានប្រសាសន៍ថា៖ «ខ្ញុំគិតថា នេះជាដំណើរវិជ្ជមានមួយដែលរដ្ឋាភិបាលកំពុងធ្វើ ក្នុងការជំរុញក្នុងការប្រយុទ្ធប្រឆាំងអំពើពុករលួយ។ អ៊ីចឹងខ្ញុំគិតថា ជាករណីមួយល្អ អាចជាសញ្ញាបង្ហាញទៅឱ្យអ្នកផ្សេងដែលអាចប្រព្រឹត្តខុសក្ដី ឬចង់ប្រព្រឹត្តខុសក្ដី គាត់អាចខ្លាច»។
លោកបន្ថែមថា៖ «បើសិនជា អ.ប.ព ធ្វើការស៊ើបអង្កេតឱ្យបានទូលំទូលាយ អាចស្វែងរកអ្នកដែលពាក់ព័ន្ធនៅក្នុងករណីហ្នឹងទាំងអស់ ក៏ជារឿងចាំបាច់ដែរ ដើម្បីធានាថា អ្នកដែលគប់គិតគ្នាក៏បានបញ្ហាដែរ។ អ៊ីចឹងយើងគ្រាន់តែអនុវត្តច្បាប់ឱ្យត្រឹមត្រូវ បានន័យថា ច្បាប់បង្គាប់ឱ្យដាក់ទោសប៉ុន្មានឆ្នាំ យើងដាក់តាមហ្នឹង! កុំឱ្យមានការរើសអើងថាគាត់មានខ្សែស្រឡាយ មានបក្ខពួក ហើយបន្ថយ! ធ្វើម៉េចឱ្យស្មើភាពគ្នា»។
កាលពីថ្ងៃទី២៥ ខែមករា អង្គការតម្លាភាពអន្តរជាតិ បានចេញរបាយការណ៍ស្ដីពីសន្ទស្សន៍អំពើពុករលួយនៅកម្ពុជា ឆ្នាំ២០២១ បង្ហាញថា កម្ពុជាទទួលបានពិន្ទុ២៣ ក្នុងចំណោមពិន្ទុពេញ១០០ ដែលស្ថិតនៅចំណាត់ថ្នាក់ទី១៥៧ លើ១៨០ប្រទេសនិងដែនដី។
បើទោះជាពិន្ទុនេះកើនឡើង២ពិន្ទុ បើធៀបទៅឆ្នាំ២០២០ក្ដី ប៉ុន្តែអង្គការអន្តរជាតិមួយនេះនៅតែរកឃើញថា កម្ពុជានៅតែជាប់ចំណាត់ថ្នាក់ជាប្រទេសដែលមានអំពើពុករលួយអាក្រក់ជាងគេក្នុងចំណោមប្រទេសអាស៊ាន។
សម្រាប់នៅក្នុងតំបន់អាស៊ីប៉ាស៊ីហ្វិកវិញ កម្ពុជាឈរនៅលេខ៣ បើគេរាប់ពីបាតតារាងវិញ ពោលគឺស្ថានភាពអំពើពុករលួយល្អជាងប្រទេសអាហ្វហ្គានីស្ថាន និងកូរ៉េខាងជើងតែប៉ុណ្ណោះ។ តែយ៉ាងណា របាយការណ៍នេះត្រូវបានមន្ត្រីជាន់ខ្ពស់រដ្ឋាភិបាល លោក ផៃ ស៊ីផាន ច្រានចោល៕
