តុលាការក្រុងភ្នំពេញ បានបន្តបើកសវនាការលើសំណុំរឿងរបស់លោក កឹម សុខា នៅថ្ងៃពុធនេះ ពីបទ «សន្ទិដ្ឋិភាពជាមួយបរទេស» ឬគប់គិតជាមួយបរទេសដើម្បីផ្ដួលរំលំរដ្ឋាភិបាល តាមមាត្រា៤៤៣ នៃក្រមព្រហ្មទណ្ឌកម្ពុជា។
នៅថ្ងៃទី២ ខែកុម្ភៈនេះ គឺជាសប្ដាហ៍ទី៣នៃសវនាការលើសំណុំរឿងលោក កឹម សុខា ប្រធានគណបក្សសង្គ្រោះជាតិដែលតុលាការរំលាយ បន្ទាប់ពីតុលាការបានពន្យារពេលអស់រយៈពេលជិត២ឆ្នាំ។
លោក កឹម សុខា ត្រូវបានអាជ្ញាធរចាប់ខ្លួនកាលពីពាក់កណ្ដាលយប់ថ្ងៃទី៣ ខែកញ្ញា ឆ្នាំ២០១៧ យកទៅឃុំខ្លួននៅពន្ធនាគារត្រពាំងផ្លុង ខេត្តត្បូងឃ្មុំ រយៈពេល១ឆ្នាំ ក្រោមការចោទប្រកាន់ពីបទ «គប់គិតជាមួយរដ្ឋបរទេសដើម្បីផ្តួលរំលំរដ្ឋាភិបាលកម្ពុជា»។
មួយឆ្នាំក្រោយមក ពោលគឺនៅថ្ងៃទី៩ ខែកញ្ញា ឆ្នាំ២០១៨ លោកត្រូវបានបញ្ជូនចេញពីពន្ធនាគារត្រពាំងផ្លុង ដែលមានទីតាំងនៅជាប់ព្រំដែនវៀតណាម មកដាក់ឃុំនៅក្នុងផ្ទះ ក្នុងរាជធានីភ្នំពេញវិញ មុននឹងតុលាការអនុញ្ញាតឱ្យលោកអាចធ្វើដំណើរដោយសេរី និងអាចជួបនរណាក៏បាន រួមទាំងទូតបរទេស។ តែលោក កឹម សុខា មិនត្រូវបានអនុញ្ញាតឱ្យធ្វើដំណើរចាកចេញពីប្រទេសកម្ពុជានោះឡើយ រហូតមកទល់នឹងពេលនេះ៕