សមត្ថកិច្ចបញ្ជូនក្រុមកូដករបុគ្គលិកក្រុមហ៊ុនណាហ្គាវើលដ៍ចំនួន៣នាក់ទៅសាលាដំបូងរាជធានីភ្នំពេញ ពាក់ព័ន្ធនឹងការចោទ «រារាំងដល់ការអនុវត្តវិធានការប្រយុទ្ធនឹងជំងឺកូវីដ-១៩» កាលពីចុងសប្ដាហ៍មុន។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា មានប្រសាសន៍ថា សមត្ថកិច្ចបានបញ្ជូនកូដករក្រុមហ៊ុនណាហ្គាវើលដ៍ចំនួន៣នាក់ រួមមាន លោក សេង វណ្ណារិទ្ធ លោក ជួន ចាន់ណាត និងលោក សៅរ៍ សម្បត្តិ ទៅតុលាការនាព្រឹកថ្ងៃអង្គារនេះ ដើម្បីចាត់វិធានការច្បាប់បន្ត ដោយសារតែពួកគេជាប់ពាក់ព័ន្ធនឹងការ «រារាំងដល់ការអនុវត្តវិធានការប្រយុទ្ធនឹងជំងឺកូវីដ-១៩» កាលពីថ្ងៃទី៥ ខែកុម្ភៈនេះ ។
លោកបន្តថា ចំពោះកូដករក្រុមហ៊ុនណាហ្គាវើលដ៍ចំនួន៤នាក់ទៀត រួមមាន ឈ្មោះ ម៉េង កាក់នីកា, អេង ស្រីបូ, អ៊ុក សុភ័ក្រមូលីកា និង ខឹង ចិន្ដា មិនចូលបំភ្លឺតាមដីកាកោះរបស់លោក សេង ហៀង តំណាងអយ្យការអមសាលាដំបូងរាជធានីភ្នំពេញ នៅថ្ងៃទី១៩ ខែកុម្ភៈនេះទេ សមត្ថកិច្ចនឹងអនុវត្តវិធានការច្បាប់ទៅលើពួកគេផងដែរ ពោលពួកគេអាចប្រឈមនឹងការចាប់ខ្លួន។
បើតាមក្រុមកូដករក្រុមហ៊ុនណាហ្គាវើលដ៍ដែលប្រាប់វីអូឌីថ្មីៗនេះ គឺអំឡុងពេលដែលពួកគាត់តវ៉ានៅថ្ងៃទី៥ ខែកុម្ភៈនោះ សមត្ថកិច្ចបានចាប់ខ្លួនកូដករចំនួន៦នាក់ ក្នុងនោះបានដោះលែងវិញ៣នាក់ ខណៈ៣នាក់ទៀតត្រូវបានបញ្ជូនទៅសួរនាំនៅស្នងការដ្ឋាននគរបាលរាជធានីភ្នំពេញ ដោយចោទថាបានរារាំងដល់ការអនុវត្តវិធានការប្រយុទ្ធនឹងជំងឺកូវីដ-១៩ ខណៈមន្ត្រីក្រសួងសុខាភិបាលចុះទៅយកសំណាកដើម្បីតេស្តរកវីរុសកូវីដ-១៩។
វីអូឌី មិនអាចសុំការបំភ្លឺពីអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ បានទេ នៅរសៀលថ្ងៃនេះ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត សង្កេតឃើញថា ការចាប់ខ្លួនកូដករណាហ្គាវើលដ៍ចំនួន៣នាក់នេះ សមត្ថកិច្ចហាក់មិនមានភស្តុតាងច្បាស់លាស់ក្នុងការចោទប្រកាន់ថា«ពួកគេរារាំងដល់ការអនុវត្តវិធានការប្រយុទ្ធនឹងជំងឺកូវីដ-១៩»នោះទេ ដោយសារក្រោយពីក្រសួងប្រកាសឱ្យក្រុមកូដករបានទៅធ្វើតេស្តរកវីរុសកូវីដ-១៩ ដែលមានន័យថា ពួកគេបានទៅធ្វើតាមការប្រកាសនោះ ហើយក៏មិនបានរារាំងកូដករណាមិនឱ្យទៅធ្វើតេស្តនោះដែរ។
លោកបញ្ជាក់ថា បើរដ្ឋាភិបាលមិនជួយអន្តរាគមន៍ទៅស្ថាប័នពាក់ព័ន្ធឱ្យពន្លឿនការដោះស្រាយបញ្ចប់វិវាទការងារនេះ និងដោះលែងតំណាងកូដករឱ្យមានសេរីភាព រួមទាំងទម្លាក់ចោលការចោទប្រកាន់លើពួកគេទេ នឹងធ្វើឱ្យបញ្ហានេះកាន់តែរីកធំឡើងៗជាងមុន។
លោកមានប្រសាសន៍ថា៖ «បើបញ្ហារបស់ពួកគាត់មិនត្រូវបានដោះស្រាយទេ កូដកម្មអាចមានបន្តទៅទៀត អត់អាចចប់បានទេ។ អ៊ីចឹងបញ្ហាសំខាន់ ឫសគល់ហ្នឹង ត្រូវដោះស្រាយបញ្ចប់វិវាទការងាររវាងក្រុមហ៊ុនណាហ្គាវើលដ៍ ឬជាមួយនឹងអតីតឬក៏បុគ្គលិកក្រុមហ៊ុនណាហ្គាវើលដ៍ដែលកំពុងធ្វើកូដកម្ម ហើយដោះលែងតំណាងរបស់ពួកគេ ដើម្បីឱ្យក្លាយទៅជាប្រតិភូចរចាតាមការបោះឆ្នោតរបស់ពួកគេ ដើម្បីបញ្ចប់[វិវាទការងារ] អាហ្នឹងបានជាដំណោះស្រាយ»។
បុគ្គលិកក្រុមហ៊ុនកាស៊ីណូណាហ្គាវើលដ៍ជិត១ ០០០នាក់ បាននាំគ្នាធ្វើកូដកម្មអហិង្សាអស់រយៈពេលជិត៥០ថ្ងៃមកហើយ ដើម្បីទាមទារឱ្យដោះលែងតំណាងសហជីពរបស់ពួកគេ៨នាក់ពីពន្ធនាគារ និងទាមទារឱ្យដោះស្រាយវិវាទការងារនៅក្នុងក្រុមហ៊ុនល្បែងមួយនេះដែលបានអូសបន្លាយអស់រយៈពេលជិតមួយឆ្នាំមកហើយ។
ក្នុងពិធីមួយកាលពីថ្ងៃទី២៥ ខែមករា រដ្ឋមន្ត្រីក្រសួងមហាផ្ទៃ លោក ស ខេង ជំរុញទៅភាគីពាក់ព័ន្ធឱ្យដោះស្រាយបញ្ចប់វិវាទការងារនៅក្រុមហ៊ុនណាហ្គាវើលដ៍ឱ្យបានឆាប់ ដោយលោកចាត់ទុកការតវ៉ារបស់បុគ្គលិកណាហ្គាវើលដ៍ ដោយសារវិវាទការងារ។ លោកបន្ថែមថា ក្រសួងការងារ និងអាជ្ញាធរពាក់ព័ន្ធ ភាគីក្រុមហ៊ុន រួមទាំងកូដករដែលកំពុងតវ៉ា ត្រូវរក្សាភាពអត់ធ្មត់ និងប្រកាន់ជំហរសម្របសម្រួល ដើម្បីដោះស្រាយវិវាទការងារនេះឱ្យបានឆាប់។
កាលពីថ្ងៃទី១៨ ខែមករា ឆ្នាំ២០២២ សហជីពអន្តរជាតិបានផ្ញើលិខិតមួយទៅកាន់លោកនាយករដ្ឋមន្ត្រី ហ៊ុន សែន ដោយលើកឡើងថា វិវាទការងារនៅក្រុមហ៊ុនណាហ្គាវើលដ៍បានកើតចេញពីការបរាជ័យជាយូរណាស់មកហើយរបស់ភាគីក្រុមហ៊ុន ក្នុងការគោរពសិទ្ធិកម្មករ និងសហជីព ចំពោះកិច្ចចរចាដោយសមូហភាព ដើម្បីទទួលបានប្រាក់ឈ្នួល និងលក្ខខណ្ឌការងារកាន់តែល្អប្រសើរ។
លិខិតនោះបន្តថា ក្រុមហ៊ុនណាហ្គាវើលដ៍ មិនបានគោរពតាមគោលការណ៍របស់រដ្ឋាភិបាលលើការងារ សុវត្ថិភាព និងការការពារសុខភាពក្នុងអំឡុងពេលមានជំងឺកូវីដ-១៩នោះទេ។
ផ្ទុយទៅវិញ បុគ្គលិកនិយោជិតចំនួន១ ៣២៩នាក់ត្រូវបានបញ្ឈប់ពីការងារ ដោយមិនបានពិគ្រោះយោបល់ក្រោមច្បាប់ការងារកម្ពុជាឡើយ ដោយក្នុងចំណោមនោះ មានបុគ្គលិក១ ១០០នាក់ គឺជាសមាជិកសហជីព៕
