ក្រុមអង្គការសង្គមស៊ីវិលទាមទារឱ្យរដ្ឋាភិបាលចាត់វិធានការលុបបំបាត់អំពើពុករលួយក្នុងប្រព័ន្ធតុលាការឱ្យមានប្រសិទ្ធភាព ដើម្បីធានាយុត្តិធម៌សង្គម ខណៈមានមន្ត្រីផ្កាយ៣ម្នាក់ទម្លាយពីបញ្ហានេះ។
ឧត្តមសេនីយ៍ផ្កាយមាស៣ លោកឧកញ៉ា ឌួង ងៀប ថ្មីៗនេះបានទម្លាយពីអំពើពុករលួយរបស់ចៅក្រមទាំងមិនបញ្ចេញឈ្មោះ ខណៈរូបលោកត្រូវបានចោទពីបទ «ឆបោកជនជាតិតៃវ៉ាន់»។
លោក ឌួង ងៀប កាលពីថ្ងៃទី៧ ខែមករា បាននិយាយក្នុងវីដេអូបង្ហោះលើបណ្ដាញហ្វេសប៊ុករបស់លោកថា បន្ទាប់ពីមានការចោទប្រកាន់ លោកបានអង្វរតុលាការឱ្យជួយ ដោយសម្អាងថា លោកមិនដែលបោកអ្នកណាសូម្បីតែមួយរៀល។ ប៉ុន្តែលោកថា ពេលលោកទៅតុលាការម្ដងៗ លោកត្រូវបង់លុយឱ្យមន្ត្រីតុលាការរហូត ទោះបីលោកមិនមានកំហុសក៏ដោយ ដែលការណ៍នេះ លោកថាលោកទ្រាំលែងបាន ហើយលុយក៏អស់ដែរ។
ឧកញ៉ា ឌួង ងៀប បានគូសបញ្ជាក់ថា៖ «ខ្ញុំទ្រាំជាមួយចៅក្រមលែងបានហើយ ពេលនេះខ្ញុំអស់លុយហើយ ខ្ញុំគ្មានលុយឯណាឱ្យចៅក្រមតទៅទៀតទេ»។
បញ្ហានេះ អ្នកសម្របសម្រួលគម្រោងសិទ្ធិទទួលបានការជំនុំជម្រះយុត្តិធម៌ នៅមជ្ឈមណ្ឌលសិទ្ធិមនុស្សកម្ពុជា លោក ហ៊ុន សាងហាក់ មានប្រសាសន៍ថា ប្រព័ន្ធយុត្តិធម៌នៅកម្ពុជាត្រូវបានអ្នកជំនាញសិទ្ធិមនុស្សជាតិនិងអន្តរជាតិមើលឃើញថា មិនទាន់ផ្ដល់ទំនុកចិត្តដល់គ្រប់ភាគីពាក់ព័ន្ធនៅឡើយទេពីសេវាផ្ដល់យុត្តិធម៌នោះ ហើយថា អំពើពុករលួយក្នុងប្រព័ន្ធនេះក៏គេបានឮច្រើនឆ្នាំណាស់មកហើយដែរ។
លោកចាត់ទុកករណីលោក ឌួង ងៀប ថាជាវិញ្ញាសាមួយចោទសួរទៅភាគីពាក់ព័ន្ធរបស់រដ្ឋាភិបាលឱ្យពិចារណាឡើងវិញ ថាតើត្រូវចាត់វិធានការបែបណាទៅលើប្រព័ន្ធតុលាការ ដើម្បីការពារមុខមាត់ប្រព័ន្ធយុត្តិធម៌នៅកម្ពុជា។
យ៉ាងណា លោក ហ៊ុន សាងហាក់ បារម្ភថា បើជំងឺនេះមិនត្រូវបានព្យាបាលទេ នឹងធ្វើឱ្យកម្ពុជាខាតបង់ ព្រោះបញ្ហានេះបានជំរុញឱ្យមានវិវាទសង្គមកាន់តែខ្លាំង រួមទាំងការបាត់បង់ទំនុកចិត្តពីអ្នកវិនិយោគ។
លោកថា៖ «បើយើងទុករឿងអស់ទាំងហ្នឹងឱ្យបន្តទៀត អារម្មណ៍របស់សាធារណជនទាំងអស់ ទាំងអ្នកតូចអ្នកធំហ្នឹង គិតថាប្រព័ន្ធយុត្តិធម៌នៅស្រុកយើងហ្នឹង វាមានបញ្ហាមែនទែន ដល់ថ្នាក់មន្ត្រីឧកញ៉ាហើយ គាត់នៅទទួលរងអយុត្តិធម៌បែបហ្នឹង ហើយមិនមានអន្តរាគមន៍។ អាហ្នឹងហើយវាធ្វើឱ្យបញ្ហារីកធំឡើងៗ វាប៉ះពាល់យ៉ាងខ្លាំងទៅដល់សង្គមទាំងមូល»។
នាយកប្រតិបត្តិអង្គការអភិវឌ្ឍន៍ផ្នត់គំនិត លោកបណ្ឌិត សេក សុជាតិ មើលឃើញថា ករណីលោក ឌួង ងៀប ជាសាក្សីរស់ដែលបានលាតត្រដាងអាថ៌កំបាំងអំពើពុករលួយនៅក្នុងប្រព័ន្ធតុលាការ ហើយថាករណីនេះមានលក្ខណៈធ្ងន់ធ្ងរ។
លោក សុជាតិ ចាត់ទុកថា នេះជាពន្លឺរបស់អង្គភាពប្រឆាំងអំពើពុករលួយ ក្នុងការស្វែងរកអ្នកពាក់ព័ន្ធដើម្បីលាងជម្រះមន្ទិលសង្ស័យរបស់មហាជនដែលបានឮជាច្រើនឆ្នាំមកហើយនោះ ហើយថាករណីនេះក៏ជាឱកាសនៃការស្ដារមុខមាត់រដ្ឋាភិបាលឡើងវិញផងដែរ។
លោកថា៖ «យើងគិតថា ជាឱកាសល្អមែនទែនសម្រាប់អង្គភាពប្រឆាំងអំពើពុករលួយក្នុងការស្វែងរកការពិតថា តើនៅក្នុងប្រព័ន្ធតុលាការពិតជាមានអំពើពុករលួយមែនអត់?»
វីអូឌី មិនអាចសុំអត្ថាធិប្បាយពីប្រធានអង្គភាពប្រឆាំងអំពើពុករលួយ លោក ឱម យ៉ិនទៀង បានទេ នៅថ្ងៃនេះ។
ប៉ុន្តែអ្នកនាំពាក្យក្រសួងយុត្តិធម៌ លោក ជិន ម៉ាលីន បានអះអាងថា លោក ឌួង ងៀប បានប្ដឹងករណីនេះទៅក្រសួងហើយ ហើយក្រសួងកំពុងពិនិត្យមើលករណីនេះតាមនីតិវិធី។
លោកថា៖ «មិនមែនតែ ឌួង ងៀប ទេ! នរណាក៏ដោយឱ្យតែមានមូលដ្ឋានថាខ្លួនរងភាពអយុត្តិធម៌ដោយសារភាពមិនប្រក្រតី ក្រសួងគេនឹងពិនិត្យ ឧត្ដមក្រុមប្រឹក្សានៃអង្គចៅក្រម គេនឹងពិនិត្យមើលតាមហ្នឹងហើយ។ បើមានមូលដ្ឋានច្បាស់លាស់ គេនឹងចាត់[ចំណាត់ការ]ហើយ ជានីតិវិធីច្បាប់គឺអ៊ីចឹង»។
របាយការណ៍ថ្មីមួយរបស់អង្គការតម្លាភាពអន្តរជាតិ ដែលមានមូលដ្ឋាននៅទីក្រុងប៊ែរឡាំង ប្រទេសអាល្លឺម៉ង់ ចេញផ្សាយនៅថ្ងៃទី២៥ ខែមករា ឆ្នាំ២០២២ រកឃើញថា អំពើពុករលួយនៅកម្ពុជា២ឆ្នាំជាប់គ្នាមកនេះនៅតែស្ថិតក្នុងលំដាប់ថ្នាក់ខ្ពស់ជាងគេ បើធៀបទៅនឹងប្រទេសជាសមាជិកអាស៊ាន។
បើតាមការវាយតម្លៃរបស់អង្គការអន្តរជាតិនោះ ប្រព័ន្ធយុត្តិធម៌ជាផ្នែកមួយទាញទម្លាក់ពិន្ទុនៃការវាយតម្លៃពីកម្រិតអំពើពុករលួយនេះ៕