សហជីព និងសហព័ន្ធសហជីពសកលបានសម្តែងការគាំទ្រ ព្រមទាំងតវ៉ាប្រឆាំងចំពោះការចាប់ខ្លួន និងបញ្ឈប់កម្មករណាហ្គាវើលដ៍កាលពីដើមសប្តាហ៍នេះ ខណៈដែលការជួបជុំធ្វើកូដកម្មប្រចាំថ្ងៃរបស់ពួកគេឈានដល់ការផ្អាក បន្ទាប់ពីអាជ្ញាធរបានបញ្ជាឱ្យបុគ្គលិកទាំងអស់នៅដាច់ដោយឡែករយៈពេល៧ថ្ងៃ។
កូដកម្មត្រូវបានបញ្ឈប់កាលពីចុងសប្តាហ៍មុន បន្ទាប់ពីរដ្ឋាភិបាលកាលពីថ្ងៃសុក្របានបញ្ជាឱ្យអ្នកតវ៉ាទាំងអស់ធ្វើតេស្តរកកូវីដ-១៩។ ទោះបីជាពួកគេធ្វើតេស្តអវិជ្ជមាន ក៏ត្រូវបានស្នើសុំឱ្យនៅដាច់ដោយឡែករយៈពេល ៧ថ្ងៃដែរ។
អាជ្ញាធរបានចាប់ខ្លួនកម្មករដែលធ្វើកូដកម្មចំនួន ៣នាក់ ខណៈពួកគេកំពុងចេញពីកន្លែងធ្វើតេស្តនៅកោះពេជ្រ រាជធានីភ្នំពេញ ហើយតុលាការបានចេញដីកាហៅមនុស្សបួននាក់ទៀតដែលមិនទាន់ត្រូវបានគេឃុំខ្លួននៅឡើយ។ កូដករទាំងនោះ ត្រូវបានចោទប្រកាន់ពីបទបំពានច្បាប់កូវីដ-១៩ ហើយអាចប្រឈមមុខនឹងការជាប់ពន្ធនាគាររហូតដល់ ៥ឆ្នាំ ប្រសិនបើមានការស៊ើបអង្កេតរកឃើញកំហុសរបស់ពួកគេនោះ។
កញ្ញា សុភ័ក្រ ម៉ូលីកា ដែលជាបុគ្គលិកណាហ្គាវើលដ៍ម្នាក់ក្នុងចំណោមកម្មករដែលត្រូវបានកោះហៅឱ្យចូលខ្លួនបាននិយាយថា នាងភ្ញាក់ផ្អើលពេលឃើញដីកានេះ ហើយមានភាពស្រពិចស្រពិលថា តើនាងគួរបង្ហាញខ្លួននៅចំពោះមុខអាជ្ញាធរ ឬនៅដាច់ដោយឡែកតាមការណែនាំរបស់ក្រសួងសុខាភិបាល។
ម៉ូលីកា ថា៖ «ឥឡូវនេះខ្ញុំនៅដាច់ដោយឡែក។ បើគេចង់ឱ្យខ្ញុំបង្ហាញមុខ តុលាការគួរតែទូរសព្ទមកខ្ញុំ។ តើខ្ញុំអាចបង្ហាញមុខរបស់ខ្ញុំនៅពេលនេះយ៉ាងម៉េច? ពួកគេត្រូវតែធានាខ្ញុំថាខ្ញុំនឹងមិនបំពានលើវិធានការ កូវីដ-១៩ ទេ។ ខ្ញុំបានដាក់លេខទូរសព្ទរបស់ខ្ញុំរួចហើយ [ក្នុងហ្វេសប៊ុក]»។
ម៉ូលីកា មិនចង់បង្ហាញពីទីតាំងរបស់នាងទេ ប៉ុន្តែបានបង្ហោះតាមហ្វេសប៊ុកសួរថា តើនាងគួរចេញពីកន្លែងធ្វើចត្តាឡីស័កដើម្បីគោរពតាមដីកា ឬយ៉ាងណា? ម៉ូលីកា ជាកម្មករម្នាក់ក្នុងចំណោមកម្មករ ៧នាក់ ដែលនិយាយទៅកាន់ប្រព័ន្ធផ្សព្វផ្សាយក្នុងសន្និសីទកាសែតរបស់សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍(LRSU) កាលពីថ្ងៃទី២៨ ខែមករា។
មន្ត្រីសុខាភិបាលបានធ្វើតេស្តលើកម្មករប្រហែល ២៥០នាក់កាលពីថ្ងៃសៅរ៍ ដែលក្នុងនោះ ៤ នាក់បានធ្វើតេស្តរកឃើញវិជ្ជមានកូវីដ-១៩។ សេចក្តីថ្លែងការណ៍របស់សាលារាជធានីភ្នំពេញ មិនបានបញ្ជាក់ថា ការធ្វើតេស្តចំនួនប៉ុន្មាននាក់ត្រូវបានធ្វើកាលពីថ្ងៃអាទិត្យ ប៉ុន្តែបាននិយាយថា មនុស្ស ២៩ នាក់បានរកឃើញវិជ្ជមាន។
ការតាមដានរកអ្នកពាក់ព័ន្ធឆ្លងត្រូវបានលុបចោលដោយលោកនាយករដ្ឋមន្ត្រី ហ៊ុន សែន នៅចុងខែកញ្ញា ឆ្នាំមុន ទោះបីជាក្រសួងសុខាភិបាលកាលពីចុងសប្តាហ៍បានចាប់ផ្តើមរាយការណ៍ពីការកើនឡើងនៃករណីអូមីក្រុងក៏ដោយ។
ម៉ូលីកា ថា កម្មករប្រហែល ៧០០នាក់ត្រូវបានធ្វើតេស្ត យោងទៅតាមទំនាក់ទំនងរបស់សហជីពជាមួយកម្មករ ទោះបីជាអ្នកយកព័ត៌មាន VOD បានឃើញកម្មករប្រហែល ២០០នាក់នៅកន្លែងធ្វើតេស្តនៅកោះពេជ្រកាលពីរសៀលថ្ងៃអាទិត្យក៏ដោយ ដោយការធ្វើតេស្តបានបញ្ចប់នៅម៉ោង ៦ និង ៣០នាទីល្ងាច។
មន្ត្រីនគរបាលក្នុងឯកសណ្ឋានជាច្រើននាក់មានវត្តមាននៅក្បែរកន្លែងធ្វើតេស្តនៅកោះពេជ្រ ប៉ុន្តែភាគច្រើនអង្គុយនៅតុមួយនៅខាងក្រៅហាងលក់នំប៉ាវ ហើយមិនចាប់អារម្មណ៍នឹងការចាប់ខ្លួននោះទេ។
បុរសជាច្រើននាក់ផ្សេងទៀត ដែលទំនងដូចជាមន្រ្តីប៉ូលិសស្លៀកពាក់ស៊ីវិលបានចំណាយពេលនៅខាងក្រៅកន្លែងធ្វើតេស្ត។ ពួកគេសកម្មខ្លាំងបំផុតពេលថតរូបកម្មករដែលបានធ្វើតេស្តរកឃើញវិជ្ជមានត្រូវបានគេដឹកតាមរថយន្តសង្គ្រោះ។
នាង ម៉េង កាក់នីកា ដែលជាកម្មករក្រុមហ៊ុនល្បែងមួយនេះម្នាក់ក្នុងចំណោមកម្មករ៤នាក់ ដែលប្រឈមមុខនឹងដីកាបញ្ជាឱ្យចូលខ្លួននោះ ផ្សាយផ្ទាល់តាមបណ្តាញសង្គមហ្វេសប៊ុក( Facebook) ពីមជ្ឈមណ្ឌលកម្សាន្តកោះពេជ្រកន្លែងធ្វើតេស្តជំងឺកូវីដ កាលពីថ្ងៃអាទិត្យ។ នាងនិយាយថា នាងមានការភ្ញាក់ផ្អើលដែលនាងត្រូវបានអាជ្ញាធរកំណត់គោលដៅ។
នាងបន្តថា៖ «ខ្ញុំមកទីនេះសម្រាប់ការធ្វើតេស្តរកកូវីដ។ ហេតុអ្វីបានជាកំណត់មុខសញ្ញាមកលើខ្ញុំ? ខ្ញុំមិនបានញុះញង់មនុស្សឱ្យរារាំងការធ្វើតេស្តនោះទេ។ ខ្ញុំក៏ជាកម្មករម្នាក់ដែលស្ម័គ្រចិត្តធ្វើតេស្តរកកូវីដ»។
អ្នកនាំពាក្យនគរបាលរាជធានីភ្នំពេញ លោក សាន សុខសីហា មិនបានឱ្យអ្នកសារព័ត៌មានសួរសំណួរថា តើដីកាថ្មីទាំង៤នឹងត្រូវអនុវត្ត ហើយគ្រាន់តែចាប់ខ្លួនកម្មករ៣នាក់ដដែលកាលពីថ្ងៃសៅរ៍ ឬយ៉ាងណា។
ជោគវាសនានៃកូដកម្មនៅតែមិនច្បាស់លាស់ សហព័ន្ធអន្តរជាតិ និងសហជីពបានបង្ហាញពីសាមគ្គីភាពជាមួយសហជីពណាហ្គាវើល មានសកម្មភាពដែលបានគ្រោងទុកនៅក្នុងប្រទេសយ៉ាងហោចណាស់ចំនួន ១១។ នេះបើតាមក្រុមសិទ្ធិមនុស្សនៃអង្គការសង់ត្រាល់(Central)។
នៅប្រទេសអូស្ត្រាលី មនុស្សប្រហែល ១៥ នាក់មកពីសហជីពចំនួន ៣ បានលើកបដា និងទង់ជាតិនៅខាងក្រៅស្ថានទូតកម្ពុជានៅទីក្រុងកង់បេរ៉ា ខណៈដែលសហជីពឥណ្ឌូណេស៊ីប្រហែល ៣០នាក់ បានតវ៉ានៅខាងក្រៅស្ថានទូតក្នុងទីក្រុងហ្សាការតា។ ការបង្ហោះតាមប្រព័ន្ធផ្សព្វផ្សាយសង្គមក៏បានបង្ហាញពីកម្មករនៅក្នុងប្រទេសបង់ក្លាដែស និងឥណ្ឌាបានកាន់បដាគាំទ្រការដោះលែងថ្នាក់ដឹកនាំសហជីពនិងសមាជិក LRSU ។
ការតវ៉ាក៏ត្រូវបានគ្រោងធ្វើនៅក្នុងចក្រភពអង់គ្លេស បារាំង ស្វីស និងសហរដ្ឋអាមេរិក ហើយសកម្មភាពជាសកលដែលផ្តោតលើយុទ្ធនាការដោះលែងកម្មករដែលជាប់ពន្ធនាគារ ទទួលយកកម្មករដែលត្រូវបានបញ្ឈប់ឱ្យចូលធ្វើការងារឡើងវិញ និងឱ្យក្រុមហ៊ុនណាហ្គាវើលដ៍ចរចាដោយស្មោះត្រង់ជាមួយសហជីពជុំវិញការរំលោភសិទ្ធិផ្សេងទៀតនៅក្រុមហ៊ុនល្បែងដ៏ស្មុគស្មាញនេះ។
លោកស្រី Nina Lau អ្នកសម្របសម្រួលកម្មវិធីនៅមជ្ឈមណ្ឌលធនធានអាស៊ីម៉ូនីទ័រក្នុងទីក្រុងហុងកុងបាននិយាយថា ក្រុមនេះបានរៀបចំសកម្មភាពនៃការគាំទ្រនៅខាងក្រៅស្ថានទូតកម្ពុជានៅកូរ៉េខាងត្បូង និងប្រទេសថៃ ខណៈដែលកំពុងសម្របសម្រួលយុទ្ធនាការរូបថតនៅក្នុងប្រទេសបង់ក្លាដែសផងដែរ។
លោកស្រីបាននិយាយតាមអ៊ីមែលថា៖ «ការបិទខ្ទប់យ៉ាងតឹងរ៉ឹង និងដាក់ទណ្ឌកម្ម ឬវិធានការរក្សាគម្លាតពីសង្គម គឺជាការបង្ហាញពីការពង្រីកអំណាចរដ្ឋ ដែលគាបសង្កត់ចលនាការងារមិនត្រឹមតែនៅក្នុងប្រទេសកម្ពុជាប៉ុណ្ណោះទេ ថែមទាំងនៅជុំវិញពិភពលោកផងដែរ»។
នៅរាជធានីភ្នំពេញ តំណាងអង្គការសិទ្ធិមនុស្សក្នុងស្រុក បានធ្វើលិខិតចំហរមួយច្បាប់ដាក់ទៅក្រសួងមហាផ្ទៃ បន្ទាប់មកពួកគេបានដើរទៅរដ្ឋសភាដើម្បីដាក់ឯកសារដូចគ្នានេះទៅកាន់តំណាងរាស្ត្រ។
លិខិតនោះចុះហត្ថលេខាដោយបុគ្គល ក្រុម និងសហគមន៍ចំនួន ១៣៣ ដោយបានលើកឡើងអំពីអ្វីដែលពួកគេហៅថាការរំលោភបំពានអំណាចដោយអាជ្ញាធរកម្ពុជាក្នុងការចាប់ខ្លួនសមាជិកសហជីព LRSU ដែលពួកគេបាននិយាយថាអាចបង្កើតជា «គំរូដ៏គ្រោះថ្នាក់» មួយ។
លិខិតសរសេរថា៖ «ការចោទប្រកាន់ពីបទញុះញង់ឱ្យប្រព្រឹត្តបទឧក្រិដ្ឋដែលកាត់ទោសមេដឹកនាំសហជីព និងសកម្មជន ជាសារទៅកាន់កូដករណាហ្គាវើលដ៍ថា សិទ្ធិការងាររបស់ពួកគេអាចត្រូវបានរំលោភបំពានដោយនិទណ្ឌភាព ខណៈដែលពួកគេនឹងត្រូវប្រឈមមុខនឹងវិធានការផ្លូវច្បាប់ ដោយគ្រាន់តែអំពាវនាវឱ្យមានវិធានការលើសកម្មភាពរំលោភលើការងារពីសំណាក់ក្រុមហ៊ុនរបស់ពួកគេ និងស្វែងរកការដោះស្រាយ»៕
ប្រែសម្រួលពីអត្ថបទដើមភាសាអង់គ្លេស៖ «Health Order Shuts Down NagaWorld Rallies, Global Unions Show Support» ដោយកញ្ញា ប៉ា សុខេង