អ្នកភូមិអះអាងថា សមត្ថកិច្ចខេត្តកោះកុងបានដាក់ពង្រាយកម្លាំងព័ទ្ធប្រជាពលរដ្ឋជាង១០០គ្រួសារដែលកំពុងសង់រោងនៅលើដីមានជម្លោះមួយកន្លែង ស្ថិតក្នុងឃុំកណ្ដោល ស្រុកបទុមសាគរ ក្រោយការព្រមានឱ្យរុះរើ ប៉ុន្តែពលរដ្ឋមិនអនុវត្តតាម។
កាលពីថ្ងៃទី៧ ខែកុម្ភៈនេះ រដ្ឋបាលស្រុកបទុមសាគរ ខេត្តកោះកុង បានចេញសេចក្ដីណែនាំមួយដោយប្រាប់ឱ្យប្រជាពលរដ្ឋ១៥០គ្រួសាររុះរើរោងដែលសង់ដោយខុសច្បាប់នៅលើដីរដ្ឋជាបន្ទាន់ បើពុំនោះទេ អាជ្ញាធរនឹងអនុវត្តវិធានការរដ្ឋបាល។
ពលរដ្ឋម្នាក់រស់នៅឃុំកណ្ដោល អ្នកស្រី ភាព តេង ប្រាប់វីអូឌីថា នៅថ្ងៃសុក្រនេះ កម្លាំងសមត្ថកិច្ចជាច្រើននាក់មានទាំងប៉ូលិស និងអាវុធហត្ថ អមដោយរថយន្តបាញ់ទឹក២គ្រឿងផង ត្រូវបានដាក់ពង្រាយព័ទ្ធកន្លែងពលរដ្ឋបោះតង់និងសង់រោងនៅលើដីកំពុងមានជម្លោះ ប៉ុន្តែនៅរសៀលម៉ោង៤នេះ កម្លាំងសមត្ថកិច្ចទាំងនោះបានដកថយវិញ ក្រោយមានការតវ៉ាពីក្រុមពលរដ្ឋ។
អ្នកស្រីបន្ថែមថា៖ «ឥលូវពេលនេះ សមត្ថកិច្ចទាំងហ្នឹងបានចូលសម្ងំក្នុងព្រៃអស់ហើយ។ អត់ដឹងគេចូលសម្ងំក្នុងព្រៃធ្វើអីទេ ប្រហែលចាំចាត់វិធានការលើពលរដ្ឋនៅពេលយប់ហើយ»។
បើតាមអ្នកស្រី ភាព តេង ខាងអាជ្ញាធរបានព្យាយាមតាមចាប់អ្នកស្រី និងតំណាងពលរដ្ឋ១២ផ្សេងទៀតដែលសកម្មចេញមុខតវ៉ា។ អ្នកស្រីថា រូបអ្នកស្រី និងពលរដ្ឋទាំងនោះកំពុងបារម្ភពីសុវត្ថិភាព។
តំណាងប្រជាពលរដ្ឋរស់នៅឃុំកណ្ដោល អះអាងថា កាលពីថ្ងៃទី២៩ ខែមករា ឆ្នាំ២០២២ ពលរដ្ឋ១៥០គ្រួសារដែលបាត់បង់ដីធ្លីដោយសារក្រុមហ៊ុន «កោះកុងស៊ូហ្គើ» និង «កោះកុងផ្លេនថេសិន» របស់ឧកញ៉ា លី យ៉ុងផាត់ សមាជិកព្រឹទ្ធសភា តាំងពីឆ្នាំ២០០៦ បានចូលទៅរស់នៅលើដីកំពុងមានជម្លោះវិញ ក្រោយគ្មានដំណោះស្រាយពីអាជ្ញាធរពាក់ព័ន្ធ។
វីអូឌី មិនអាចសុំការអត្ថាធិប្បាយជុំវិញករណីនេះពីអភិបាលស្រុកបទុមសាគរ លោក ហាក់ ឡេង បានទេនៅថ្ងៃនេះ។
ប៉ុន្តែលោក ហាក់ ឡេង ប្រាប់វីអូឌីកាលពីថ្ងៃម្សិលមិញថា អាជ្ញាធរពាក់ព័ន្ធបានដោះស្រាយសំណងផលប៉ះពាល់ជូនពលរដ្ឋទាំងនោះរួចជាច្រើនឆ្នាំមកហើយ។ លោកថា ក្រសួងរៀបចំដែនដី និងរដ្ឋបាលខេត្តកោះកុង បានចេញលិខិតបដិសេធមិនដោះស្រាយឱ្យពួកគេជាច្រើនដងហើយដែរ ប៉ុន្តែពលរដ្ឋទាំងនោះមិនស្ដាប់ និងនៅតែបន្តតវ៉ា។
យ៉ាងណា អ្នកភូមិបានច្រានចោលការលើកឡើងរបស់អាជ្ញាធរនេះ ដោយអះអាងថា ពួកគេមិនទាន់ទទួលបានសំណងដូចការលើកឡើងរបស់អាជ្ញាធរនេះឡើយ។
មន្ត្រីការពារសិទ្ធិមនុស្សប្រចាំខេត្តកោះកុង បានជំរុញឱ្យអាជ្ញាធរពាក់ព័ន្ធស្រាវជ្រាវ និងដោះស្រាយជូនពលរដ្ឋដោយសន្តិវីធី ជាជាងការចាត់វិធានការ ការគំរាមកំហែង និងការប្រើប្រាស់ប្រព័ន្ធតុលាការទៅលើពលរដ្ឋមានជម្លោះដីធ្លី ដោយថា ការធ្វើបែបនេះមិនអាចដោះស្រាយបញ្ហាបានឡើយ ហើយក៏មិនអាចធ្វើឱ្យពលរដ្ឋឈប់តវ៉ានោះដែរ៕