អាជ្ញាធរស្រុកបទុមសាគរ ខេត្តកោះកុង ព្រមានចាត់វិធានការរដ្ឋបាលចំពោះពលរដ្ឋជាង១០០គ្រួសារ និងឱ្យរុះរើរោងជាបន្ទាន់ ដោយថា ពលរដ្ឋទាំងនោះបានសាងសង់រោងលើដីរដ្ឋដោយខុសច្បាប់ ស្ថិតក្នុងឃុំកណ្ដោល ស្រុកបទុមសាគរ។
ការព្រមាននេះធ្វើឡើងក្រោយពីតំណាងប្រជាពលរដ្ឋរស់នៅឃុំកណ្ដោល បានលើកឡើងថា កាលពីថ្ងៃទី២៩ ខែមករា ឆ្នាំ២០២២ ពលរដ្ឋ១៥០គ្រួសារដែលបាត់បង់ដីធ្លីដោយសារក្រុមហ៊ុន «កោះកុងស៊ូហ្គើ» និង «កោះកុងផ្លេនថេសិន» របស់ឧកញ៉ា លី យ៉ុងផាត់ សមាជិកព្រឹទ្ធសភា តាំងពីឆ្នាំ២០០៦ បានចូលទៅរស់នៅលើដីកំពុងមានជម្លោះវិញ ក្រោយគ្មានដំណោះស្រាយពីអាជ្ញាធរពាក់ព័ន្ធ។
ក្នុងសេចក្ដីជូនដំណឹងមួយចុះថ្ងៃទី៩ ខែកុម្ភៈនេះ រដ្ឋបាលស្រុកបទុមសាគរអះអាងថា ដីដែលក្រុមពលរដ្ឋកំពុងសង់រោងរស់នៅនោះ ជាដីឯកជនរបស់រដ្ឋ ស្ថិតក្រោមការគ្រប់គ្រងរបស់ក្រសួងកសិកម្ម រុក្ខាប្រមាញ់ និងនេសាទ។
សេចក្ដីជូនដំណឹងដដែលបន្តថា ក្រោយពលរដ្ឋចូលទៅសង់រោងនោះ ខាងអាជ្ញាធរតែងតែចុះពន្យល់ពលរដ្ឋថា ការសាងសង់រោងនោះគឺខុសច្បាប់ និងសុំឱ្យរុះរើរោងទាំងនោះចេញ ប៉ុន្តែក្រុមពលរដ្ឋមិនអនុវត្តតាមឡើយ។
រដ្ឋបាលស្រុកបទុមសាគរ ព្រមានថា ប្រសិនបើពលរដ្ឋទាំងនោះមិនព្រមអនុវត្តតាមសេចក្ដីជូនដំណឹងនេះទេ រដ្ឋបាលស្រុកមិនទទួលខុសត្រូវចំពោះការខូចខាតទ្រព្យសម្បត្តិឡើយ ពេលអាជ្ញាធរចុះអនុវត្តវិធានការរដ្ឋបាល។
អ្នកស្រី ភាព តេង ដែលអះអាងថាជាតំណាងពលរដ្ឋ និងកំពុងជាប់បណ្ដឹងនៅតុលាការពាក់ព័ន្ធករណីជម្លោះដីធ្លីនេះ បានប្រាប់វីអូឌីនៅថ្ងៃព្រហស្បតិ៍នេះថា អ្នកភូមិបានរក្សាជំហរមិនរុះរើរោង និងមិនចាកចេញពីដីនោះទេ ប្រសិនបើពុំមានដំណោះស្រាយសម្រាប់ពួកគេ។
អ្នកស្រីបន្តថា រូបអ្នកស្រី និងពលរដ្ឋកំពុងព្រួយបារម្ភពីសុវត្ថិភាព ខណៈអាជ្ញាធរបានគំរាមកំហែង និងប៉ុនប៉ងចាប់ពលរដ្ឋ។
អ្នកស្រីបន្ថែមថា៖ «ប្រជាពលរដ្ឋគាត់ប្ដេជ្ញាចិត្តថា ពួកគាត់អត់ចុះចេញពីលើដីហ្នឹងទេ ពីព្រោះគាត់បានបាត់បង់ដីពិតប្រាកដ។ គាត់ឈឺចិត្តដែលអាជ្ញាធរយកដីរបស់ពួកគាត់ទៅឱ្យក្រុមហ៊ុន ដោយមិនបានផ្ដល់សំណងជូនគាត់ ហើយចោទប្រកាន់ពួកគាត់ថាទទួលបានសំណងហើយទៅវិញ»។
ពលរដ្ឋម្នាក់ទៀត លោក ទូច ង៉ាន់ ដែលបានចូលទៅរស់នៅលើដីចាស់របស់ខ្លួនវិញនោះ និយាយថា គ្រួសារលោកបានបាត់បង់ដីចម្ការទំហំទទឹង១០០ម៉ែត្រ និងបណ្ដោយ៣០០ម៉ែត្រ ដោយសារក្រុមហ៊ុនរបស់លោក លី យ៉ុងផាត់ បានរំលោភយកដោយមិនបានដោះស្រាយសំណងជូនឡើយ។
ពលរដ្ឋរូបនេះអះអាងថា កាលពីអំឡុងឆ្នាំ២០០៦ ក្រុមហ៊ុនបានដាក់គ្រឿងចក្រឈូសឆាយដី និងផលដំណាំរបស់គាត់អស់ជាច្រើន ហើយអាជ្ញាធរបានគំរាមកំហែងមិនឱ្យពួកគាត់ប្រឆាំង និងគំរាមចាប់ដាក់ពន្ធនាគារថែមទៀត។
លោកបន្ថែមថា៖ «ខ្ញុំបានកាប់ឆ្ការដាំដំណាំបានធំៗអស់ហើយ។ ពេលដាក់គ្រឿងចក្រឈូសឆាយដំណាំរបស់ពួកខ្ញុំអស់ហើយ អត់ដោះស្រាយសំណងជូនពួកខ្ញុំទៀត។ ដេញពួកខ្ញុំចេញហើយ គំរាមពួកខ្ញុំចាប់ដាក់គុក។ ហើយកាលនោះពួកខ្ញុំក្រីក្រពេក អត់ហ៊ានតវ៉ា។ ឥលូវនេះ ពួកខ្ញុំតវ៉ាទាមទារដីខ្ញុំវិញ បើអត់ដោះស្រាយសមរម្យសម្រាប់ពួកខ្ញុំទេ។ ពួកខ្ញុំមិនរើចេញពីដីនេះឡើយ។ ពួកខ្ញុំនឹងប្រឈមមុខជាមួយអាជ្ញាធរ»។
អភិបាលស្រុកបទុមសាគរ លោក ហាក់ ឡេង ប្រាប់វីអូឌីកាលពីថ្ងៃម្សិលមិញថា អាជ្ញាធរពាក់ព័ន្ធបានដោះស្រាយសំណងផលប៉ះពាល់ជូនពលរដ្ឋទាំងនោះរួចជាច្រើនឆ្នាំមកហើយ។ លោកថា ក្រសួងរៀបចំដែនដី និងរដ្ឋបាលខេត្តកោះកុង បានចេញលិខិតបដិសេធមិនដោះស្រាយឱ្យពួកគេជាច្រើនដងហើយដែរ ប៉ុន្តែពលរដ្ឋទាំងនោះមិនស្ដាប់ និងនៅតែបន្តតវ៉ា។
លោកបន្ថែមថា៖ «ក្រុមពលរដ្ឋហ្នឹងតាំងពីឆ្នាំ២០០៦មក មិនដែលដាក់ពាក្យតវ៉ាដែរ ហើយការដើរតវ៉ាទាមទារពីអាជ្ញាធរស្ថាប័នក៏អត់មានដែរ។ ហើយក្នុងយុទ្ធនាការរយៈពេល៣០ថ្ងៃ ដើម្បីដាក់ពាក្យឱ្យជួយដោះស្រាយបញ្ចប់វិវាទដីធ្លីនៅកោះកុង ក៏អត់ឃើញពួកគាត់ដែរ។ អ៊ីចឹងក្រោយពីឃើញក្រុមគេផ្សេងៗគេតវ៉ាទៅបានលុយបានកាក់បានដី ពួកគាត់ចាប់ប្រមូលផ្ដុំតវ៉ាដែរ»។
យ៉ាងណា មន្ត្រីការពារសិទ្ធិមនុស្សប្រចាំខេត្តកោះកុង លើកឡើងថា ការចាត់វិធានការ ការគំរាមកំហែង និងការប្រើប្រាស់ប្រព័ន្ធតុលាការទៅលើពលរដ្ឋមានជម្លោះដីធ្លីនោះ ជារឿងមិនត្រឹមត្រូវ និងមិនអាចដោះស្រាយបញ្ហាបានឡើយ ហើយក៏មិនអាចធ្វើឱ្យពលរដ្ឋឈប់តវ៉ានោះដែរ។
កាលពីថ្ងៃទី៨ ខែកុម្ភៈនេះ សមាគមការពារសិទ្ធិមនុស្សអាដហុក បានចេញរបាយការណ៍មួយដោយរកឃើញថា ក្នុងឆ្នាំ២០២១ ប្រជាពលរដ្ឋចំនួន១៧ ០៣៣គ្រួសារ បានរងផលប៉ះពាល់ដោយសារវិវាទដីធ្លីដែលមានទំហំជាង៥០ ០០០ហិកតា (៥២ ៦០១,៨៧ហិកតា)។
សមាគមមួយនេះបញ្ជាក់ថា ការរំលោភដីធ្លីរបស់ប្រជាពលរដ្ឋដែលលេចធ្លោជាងគេនាពេលនោះ គឺបុគ្គលមានអំណាចចំនួន៦៦ករណី និងបុគ្គលអ្នកមានទ្រព្យចំនួន២៧ករណី។
អាដហុក ឱ្យដឹងទៀតថា មានពលរដ្ឋរងគ្រោះដីធ្លី១៥៧នាក់កំពុងជាប់បណ្ដឹងអាជ្ញា និងដាក់ឱ្យស្ថិតក្រោមការត្រួតពិនិត្យពីតុលាការ ខណៈជនរងគ្រោះ១៧នាក់ទៀតកំពុងឃុំខ្លួនបណ្ដោះអាសន្ន ដោយសារការតវ៉ាទាមទារដីធ្លីរបស់ខ្លួន៕
