ផ្សោតមួយក្បាលដែលនៅសេសសល់ចុងក្រោយតែមួយគត់នៅអន្លង់ឈើទាល ក្នុងខេត្តស្ទឹងត្រែង ដែលជាប្រភេទផ្សោតឈ្មោះ «អ៊ីរ៉ាវ៉ាឌី» ត្រូវបានស្លាប់ហើយ ដោយសារកន្ទុយរបស់វារុំជាប់ទៅដោយមង ម្យ៉ាងវាមានវ័យចំណាស់ផង។
ក្រុមសត្វផ្សោតដែលរស់នៅក្នុងតំបន់អន្លង់ឈើទាល ក្នុងខេត្តស្ទឹងត្រែង ដែលជាប្រភេទផ្សោតឈ្មោះ «អ៊ីរ៉ាវ៉ាឌី» ឬពលរដ្ឋខ្មែរ ហៅថា «ផ្សោតក្បាលត្រឡោក» នោះ គឺជាក្រុមផ្សោតរស់នៅដាច់ដោយឡែកពីក្រុមសត្វផ្សោតដទៃទៀត ដែលអ្នកស្រុកចាត់ទុកថាជាសត្វដ៏ពិសិដ្ឋ។
យោងតាមគណនី Facebook របស់លោកស្រី ជា សិលា អ្នកសម្របសម្រួលគម្រោង អច្ឆរិយភាពនៃទន្លេមេគង្គ បានបង្ហាញថា៖ «ពិតជាគួរឱ្យសោកសង្រេងខ្លាំងណាស់ ដែលមិត្តផ្សោតឯការបស់យើងបានស្លាប់បាត់បង់ជីវិតពីអន្លង់ឈើទាល នាព្រឹកព្រហាមថ្ងៃទី១៥ ខែកុម្ភៈ ឆ្នាំ២០២២នេះហើយ។ សូមមិត្តទាំងអស់គ្នាកុំភ្លេចបណ្ដាំគាត់ជាចុងក្រោយឱ្យសោះ «សូមផ្ដាំការពារពូជពង្សខ្ញុំផង»។
ប្រភពដដែលលើកឡើងថា ការស្លាប់របស់ផ្សោតដែលនៅសេសសល់ចុងក្រោយនេះ អាចដោយសារជាប់មងនេសាទ ព្រោះកន្ទុយរបស់វាជាប់មង។
ទីភ្នាក់ងារសារព័ត៌មានកម្ពុជា AKP ចុះផ្សាយកាលពីម្សិលមិញ បានឱ្យដឹងថា បើតាមការប៉ាន់ស្មានរបស់រដ្ឋបាលជលផល សត្វផ្សោតមួយក្បាលនេះអាចស្លាប់តាំងពីថ្ងៃទី១២ ខែកុម្ភៈ មកម្ល៉េះ ប៉ុន្តែក្រុមការងាររដ្ឋបាលជលផលទើបតែឃើញសាកសពអណ្ដែតកាលពីម្សិលមិញនេះ។
ផ្សោតប្រភេទនេះធ្លាប់បានរស់នៅតាមដងទន្លេមេគង្គក្នុងប្រទេសកម្ពុជា ត្រូវបានរកឃើញថាមានតិចតួចបំផុត គឺចំនួនតែ៦ក្បាលកាលពីឆ្នាំ២០១២ ក្រោយមកធ្លាក់ចុះមកនៅ៣ក្បាល កាលពីឆ្នាំ២០១៨ និងសល់ត្រឹមតែ១ក្បាលប៉ុណ្ណោះនៅឆ្នាំ២០២១កន្លងទៅនេះ។
AKP បានស្រង់ប្រសាសន៍របស់នាយខណ្ឌស្ដីទីនៃខណ្ឌរដ្ឋបាលជលផលស្ទឹងត្រែង លោក ស្រី សមវិចិត្រ ឱ្យដឹងថា សត្វផ្សោតដែលស្លាប់នេះមានវ័យជាង២០ឆ្នាំ មានទំងន់ប្រមាណ១១០គីឡូក្រាម មានប្រវែងជាង២ម៉ែត្រ។
លោកថា តាមការបញ្ជាក់ពីឆ្មាំទន្លេអំពីមូលហេតុនៃស្លាប់នេះ គឺដោយសារកន្ទុយផ្សោតមានរុំជាប់មងរហែក តាំងពីថ្ងៃទី២២ ខែធ្នូ ឆ្នាំ២០២១ ដែលឆ្មាំទន្លេអភិរក្សសត្វផ្សោតបានព្យាយាមជួយសង្រ្គោះដើម្បីដោះមងចេញពីកន្ទុយ ប៉ុន្តែជួយមិនបានសម្រេចឡើយ ដែលជាហេតុបណ្ដាលឱ្យផ្សោតមួយក្បាលនេះមិនអាចផ្លាស់ទីនិងដេញចាប់ចំណីដោយប្រើកន្ទុយមិនបានលឿន ម្យ៉ាងផ្សោតនេះក៏មានវ័យចាស់ផងដែរ។
ក្នុងសេចក្ដីប្រកាសព័ត៌មានរួមមួយរបស់អង្គការមូលនិធិសកលសម្រាប់អភិរក្សធម្មជាតិ (WWF) អង្គការសហភាពអន្តរជាតិ ដើម្បីអភិរក្សធម្មជាតិ (IUCN) និងរដ្ឋបាលជលផលកម្ពុជា កាលពីថ្ងៃទី២៤ ខែតុលា ឆ្នាំ២០២១ បានបង្ហាញពីមូលហេតុមួយចំនួនដែលគំរាមកំហែងដល់ចំនួនសត្វផ្សោតទន្លេមេគង្គ រស់នៅអន្លង់ឈើទាល នៃអន្តរព្រំដែនរវាងកម្ពុជានិងឡាវ បណ្ដាលឱ្យមានការធ្លាក់ចុះជាបន្តបន្ទាប់។ មូលហេតុទាំងនោះមានដូចជា បញ្ហាងាប់ដោយសារជាប់មងប្រជានេសាទ ការនេសាទលើសកម្រិត ការប្រើប្រាស់ឧបករណ៍នេសាទខុសច្បាប់ ការសាងសង់ទំនប់វារីអគ្គិសនី ការរាំងស្ទះរំហូរទឹកជាធម្មជាតិ ជាដើម។
ក្នុងសេចក្ដីប្រកាសព័ត៌មានរួមពេលនោះ ប្រតិភូរាជរដ្ឋាភិបាលទទួលបន្ទុកជាប្រធានរដ្ឋបាលជលផល លោក ពុំ សុថា និងលោក សេង ទៀក នាយកអង្គការ WWF ប្រចាំប្រទេសកម្ពុជា ធ្លាប់បានឯកភាពគ្នាថា ប្រសិនបើសត្វផ្សោតមួយក្បាលដែលរស់នៅក្នុងអន្លង់ឈើទាលនេះបានបាត់បង់បន្ថែមទៀត រដ្ឋបាលជលផល និងអង្គការ WWF នឹងរៀបចំធ្វើរូបសំណាកសត្វផ្សោតដាក់តាំងនៅលើច្រាំងទន្លេមេគង្គនៃអន្លង់ឈើទាល។ ពួកគេថា ការធ្វើរូបសំណាកនេះ ដើម្បីរម្លឹកដល់សាធារណជននិងកូនចៅជំនាន់ក្រោយបានចងចាំនូវវត្តមានសត្វផ្សោត «អ៊ីរ៉ាវ៉ាឌី» ដែលធ្លាប់រស់នៅតំបន់នោះ៕