ប្រធានក្រុមការងារគណបក្សប្រជាជនកម្ពុជា (CPP) ចុះមូលដ្ឋាន ស្រុកចំការលើ ខេត្តកំពង់ចាម បានសម្រេចបញ្ចប់តួនាទីលោក ឌួង ឆាយ ពីអនុប្រធានក្រុមការងារចុះមូលដ្ឋានឃុំបុសខ្នុរ។
នៅក្នុងសេចក្ដីសម្រេចរបស់ប្រធានក្រុមការងារគណបក្សចុះមូលដ្ឋានស្រុកចំការលើ លោក ហ៊ុន ម៉ានិត ចុះថ្ងៃទី១៧ ខែកុម្ភៈ ឆ្នាំ២០២២ បានសម្រេចបញ្ចប់តួនាទីលោក ឌួង ឆាយ ពីអនុប្រធានក្រុមការងារចុះមូលដ្ឋានឃុំបុសខ្នុរ ស្រុកចំការលើ ខេត្តកំពង់ចាម ចាប់ពីថ្ងៃចុះហត្ថលេខានេះតទៅ។ តែយ៉ាងណា ក្នុងសេចក្ដីសម្រេចនោះមិនបានបញ្ជាក់មូលហេតុជុំវិញការបញ្ចប់តួនាទីរបស់លោក ឌួង ឆាយ នេះទេ។
គួរបញ្ជាក់ថា ការបញ្ចប់តួនាទីរបស់លោក ឌួង ឆាយ នេះបានធ្វើឡើងក្រោយប៉ុន្មានថ្ងៃប៉ុណ្ណោះ បន្ទាប់ពីឧកញ៉ា ឌួង ងៀប ដែលត្រូវជាឪពុករបស់លោក ឌួង ឆាយ ត្រូវបានតុលាការសម្រេចបញ្ជូនទៅឃុំខ្លួនជាបណ្ដោះអាសន្ននៅពន្ធនាគារ កាលពីថ្ងៃទី១៤ ខែកុម្ភៈ ឆ្នាំ២០២២ ដោយចោទប្រកាន់ពីបទ «ឆបោក និងមិនបំពេញកាតព្វកិច្ចចំពោះឧបករណ៍អាចជួញដូរបាន»។
កាលពីខែមីនា ឆ្នាំ២០២១ ព្រះមហាក្សត្របានត្រាស់បង្គាប់បញ្ចប់គោរមងារ «ឧកញ៉ា» ពីលោក ឌួង ឆាយ តាមសំណើរបស់នាយករដ្ឋមន្ត្រី ក្រោយពីអតីតភរិយារបស់លោក ឌួង ឆាយ បង្ហោះវីដេអូដែលស្វាមីខ្លួនប្រើហិង្សាទៅលើរូបនាងនាពេលកន្លងមក៕
