សាលាដំបូងរាជធានីភ្នំពេញ បានបញ្ជូនខ្លួនឧត្ដមសេនីយ៍ផ្កាយ៣ លោកឧកញ៉ា ឌួង ងៀប ទៅឃុំខ្លួននៅពន្ធនាគារភ្លាមៗនៅថ្ងៃចន្ទនេះ ក្រោយពីសមត្ថកិច្ចចាប់ខ្លួនបាន ដោយចោទប្រកាន់ពីបទ «ឆបោក និង មិនបំពេញកាតព្វកិច្ចចំពោះឧបករណ៍អាចជួញដូរបាន»។
ស្នងការរាជធានីភ្នំពេញ លោក ស ថេត បានអះអាងថា ចំណាត់ការចាប់ខ្លួនលោក ឌួង ងៀប នេះ ធ្វើឡើងតាមដីកាបង្គាប់របស់សាលាដំបូងរាជធានីភ្នំពេញ។
លោកថា៖ «អនុវត្តតាមដីការបស់តុលាការ យកបានហើយមុនហ្នឹងជិត១ម៉ោង ហើយបានបញ្ជូនទៅសាលាដំបូងរាជធានីភ្នំពេញ ឱ្យគេចាត់ចែងតាមច្បាប់ទម្លាប់របស់គេទៅ»។
សាលាដំបូងរាជធានីភ្នំពេញ កាលពីថ្ងៃទី១០ ខែកុម្ភៈ បានបង្ហាញជំហរថា នឹងបន្តនីតិវិធីលើឧត្ដមសេនីយ៍ផ្កាយ៣ លោកឧកញ៉ា ឌួង ងៀប ដោយសម្អាងថា កុំឱ្យជនត្រូវចោទរូបនេះគេចវេះពីការទទួលខុសត្រូវចំពោះមុខច្បាប់។
អ្នកនាំពាក្យក្រសួងយុត្តិធម៌ លោក ជិន ម៉ាលីន មានប្រសាសន៍ថា ករណីឃុំខ្លួនលោក ឌួង ងៀប ជានីតិវិធីធម្មតារបស់តុលាការ ដែលថាចៅក្រមសម្រេចឃុំខ្លួនបណ្ដោះអាសន្ន។ មួយវិញទៀត លោកថា ចំណាត់ការលើបញ្ហាពុករលួយ ក្រសួងពាក់ព័ន្ធធ្លាប់បានធ្វើជាហូរហែ បើមានភស្តុតាង។
លោកថា៖ «ចំណែកការស៊ើបអង្កេតភាពមិនប្រក្រតីនៅតុលាការហ្នឹង មិនបាច់ចាំអង្គការសង្គមស៊ីវិលស្នើ ឬក៏ទាមទារ ឬក៏ចោទប្រកាន់អីទេ ឱ្យតែមានមូលដ្ឋានច្បាស់លាស់ មានមូលដ្ឋានរឹងមាំ ថាមានភាពមិនប្រក្រតី ក្រសួងយុត្តិធម៌ ក៏ដូចជាឧត្ដមក្រុមប្រឹក្សានៃអង្គចៅក្រម គេនឹងធ្វើការអង្កេត គេនឹងធ្វើអធិការកិច្ចតាមនីតិវិធីដែលមានជាធរមានហើយ មិនចាំបាច់សង្គមស៊ីវិលស្នើឬចោទប្រកាន់អីទេ»។
ការបញ្ជាក់ជំហរបែបនេះរបស់សាលាដំបូង គឺក្រោយពីជនត្រូវចោទជាមន្ត្រីផ្កាយ៣រូបនេះបានប្រើប្រាស់បណ្ដាញសង្គមអត្ថាធិប្បាយពីអំពើពុករលួយរបស់ចៅក្រមនៅសាលាដំបូងរាជធានីភ្នំពេញ ពាក់ព័ន្ធសំណុំរឿងចោទប្រកាន់គាត់ពីបទ«ឆបោកជនជាតិតៃវ៉ាន់» និងបានអំពាវនាវរកជំនួយពីនាយករដ្ឋមន្ត្រីឱ្យជួយរកយុត្តិធម៌ ក្រោមហេតុផលមិនបានប្រព្រឹត្តកំហុសដូចការចោទប្រកាន់។
លោកថា៖ «ចូលតុលាការម្ដង យកលុយទៅម្ដង ពេលនេះខ្ញុំអស់លុយឱ្យទៀតហើយ»។
តាមរយៈវីដេអូឃ្លីបបង្ហោះលើហ្វេសប៊ុករបស់គាត់ដែលមានរយៈពេលជាង២០នាទី លោក ឌួង ងៀប បានបញ្ជាក់ថា លោកគ្មានប្រាក់៥លានដុល្លារយកទៅតម្កល់នៅតុលាការតាមការបង្គាប់របស់ចៅក្រម ជាថ្នូរនឹងការមិនឃុំខ្លួននៅពន្ធនាគារនោះទេ ហើយថា លោកសុខចិត្តដើរចូលពន្ធនាគារដោយខ្លួនឯង។
នាយករងទទួលបន្ទុកឃ្លាំមើលសិទ្ធិមនុស្សអង្គការលីកាដូ លោក អំ សំអាត មើលឃើញថា ការដែលលោក ឌួង ងៀប ស្វែងរកកិច្ចអន្តរាគមន៍ពីលោកនាយករដ្ឋមន្ត្រីឱ្យជួយរកយុត្តិធម៌នោះ មិនខុសគ្នាទៅនឹងសកម្មជនដីធ្លីមួយដែលត្រូវបានគេចាប់ខ្លួននោះទេ។ ប៉ុន្តែលោកថា ចំណាត់ការលើលោក ឌួង ងៀប ជារឿងល្អមួយ តែបើអំពើពុករលួយក្នុងប្រព័ន្ធតុលាការដូចដែលលោក ឌួង ងៀប ធ្លាប់លើកឡើង មិនត្រូវបានចាត់ការ នោះវានៅតែបង្ហាញឱ្យឃើញពីកម្រិតធ្លាក់ចុះនៃការធានាយុត្តិធម៌សង្គម ហើយថាបញ្ហានេះនឹងបង្កផលប៉ះពាល់ធ្ងន់ធ្ងរដល់ការធានាសន្តិសុខសង្គមជាតិទាំងមូល។
លោកថា៖ «បើសិនជារឿងនេះ យើងមិនបានបង្ហាញអំពីតម្លាភាពទេ យើងដឹងហើយមន្ត្រីជាន់ខ្ពស់រាជរដ្ឋាភិបាល [លោក ស ខេង] ធ្លាប់លើកឡើងហើយថា ភាពអយុត្តិធម៌ក្នុងសង្គមវានឹងបង្កើតឱ្យមានការបែកបាក់ជាតិនិងឯកភាពជាតិ»។
មួយវិញទៀត នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី ចាត់ទុកថា ករណីលោកឧកញ៉ា ឌួង ងៀប អាចជាការឆ្លើយតបទៅនឹងរបាយការណ៍រកឃើញពីអំពើពុករលួយខ្ពស់នៅកម្ពុជា បើក្រសួងពាក់ព័ន្ធខ្វះឆន្ទៈចាត់វិធានការមន្ត្រីតុលាការដែលត្រូវបានលើកឡើងដោយជនត្រូវចោទ មុនគាត់ត្រូវបានចាប់ឃុំខ្លួន។
លោកថា៖ «បើសិនជាយើងធានាបានយុត្តិធម៌ យើងនឹងធានាបានជាវិជ្ជមានដែលជះទៅលើវិស័យទាំងអស់នៅក្នុងសង្គមយើង ទាំងវិស័យសេដ្ឋកិច្ច ទាំងវិស័យសង្គម ទាំងការបែងចែងទ្រព្យសម្បត្តិសង្គមដែលកម្ពុជាទទួលបានហ្នឹង ទាំងអ្នកមាន ទាំងអ្នកក្រ ឱ្យស្មើគ្នាទាំងសិទ្ធិសេរីភាពផ្សេងទៀត។ អ៊ីចឹងខ្ញុំគិតថា មកដល់ពេលនេះ ក្នុងដំណើរដែលកម្ពុជាឈ្ពោះទៅមុខហ្នឹង យើងគួរជំរុញឱ្យកម្ពុជាជាដែនដីមួយដែលមានភាពជឿជាក់នៅក្នុងប្រព័ន្ធយុត្តិធម៌»។
សាលាដំបូងរាជធានីភ្នំពេញ ធ្លាប់បានបញ្ជាក់ថា លោក ឌួង ងៀប ពាក់ព័ន្ធនឹងករណីលក់ដីមួយកន្លែងដែលអ្នកទិញជាដើមបណ្ដឹងរដ្ឋប្បវេណី ឈ្មោះ CHIH YU និងឈ្មោះ YAO CHING KING បានប្រគល់ប្រាក់ថ្លៃដីគ្រប់ចំនួនជាង៧លានដុល្លារ (៧ ៣០៥ ០០០ដុល្លារ) រួចរាល់អស់ហើយ តែថាជនត្រូវចោទ ពុំមានដីប្រគល់ឱ្យម្ចាស់លុយឡើយ។
មួយវិញទៀត តុលាការបញ្ជាក់ថា ប្រាក់ជាង៥លានដុល្លារ (៥ ៣០៥ ០០០ដុល្លារ) ដែលចៅក្រមស៊ើបសួរតម្រូវឱ្យយកមកតម្កល់នៅសាលាដំបូងនោះ ធ្វើតាមដីកាសម្រេចចុះថ្ងៃទី១៣ ខែសីហា ឆ្នាំ២០២១ ដែលថាមានកាតព្វកិច្ចតម្រូវឱ្យជនត្រូវចោទដាក់ប្រាក់ធានាមិនឃុំខ្លួន។
របាយការណ៍ថ្មីមួយរបស់អង្គការតម្លាភាពអន្តរជាតិ ដែលមានមូលដ្ឋាននៅទីក្រុងប៊ែរឡាំង ប្រទេសអាល្លឺម៉ង់ ចេញផ្សាយនៅថ្ងៃទី២៥ ខែមករា ឆ្នាំ២០២២ រកឃើញថា អំពើពុករលួយនៅកម្ពុជា២ឆ្នាំជាប់គ្នាមកនេះនៅតែស្ថិតក្នុងលំដាប់ថ្នាក់ខ្ពស់ជាងគេ បើធៀបទៅនឹងប្រទេសជាសមាជិកអាស៊ាន។ បើតាមការវាយតម្លៃរបស់អង្គការអន្តរជាតិនោះ ប្រព័ន្ធយុត្តិធម៌ជាផ្នែកមួយទាញទម្លាក់ពិន្ទុនៃការវាយតម្លៃពីកម្រិតអំពើពុករលួយនេះ៕
