ក្រសួងការបរទេសកម្ពុជា ច្រានចោលរបាយការណ៍មួយដែលលើកឡើងថា កម្ពុជាជាកន្លែងដែលចារកម្មកូរ៉េខាងជើងបានបើកដំណើរការសណ្ឋាគារ កាស៊ីណូនិងភ្នាក់ងារទេសចរណ៍ ក្រោយពីរបាយការណ៍នោះត្រូវបានចុះផ្សាយដោយទីភ្នាក់ងារសារព័ត៌មាន NK News កាលពីដើមសប្ដាហ៍នេះ។
សេចក្ដីបំភ្លឺរបស់អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជា ចុះថ្ងៃទី១៧ ខែកុម្ភៈ ឆ្នាំ២០២២ បានលើកឡើងថា កម្ពុជាបានអនុវត្តស្របតាមគ្រប់សេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ (UNSC) ដោយបានបិទគ្រប់អាជីវកម្មនិងគណនីធនាគាររបស់សាធារណរដ្ឋប្រជាមានិតប្រជាធិបតេយ្យកូរ៉េ (ស.ប.ប.ក) នៅក្នុងប្រទេសកម្ពុជា និងបានបញ្ឈប់ការផ្ដល់បណ្ណការងារដល់កម្មករមកពី ស.ប.ប.ក ផងដែរ។
សេចក្ដីបំភ្លឺរបស់អ្នកនាំពាក្យបានអះអាងថា កម្ពុជាតែងតែប្រកាន់ខ្ជាប់នូវជំហរម៉ឺងម៉ាត់របស់ខ្លួន ចំពោះការគាំទ្រការមិនរីកសាយភាយអាវុធមហាប្រល័យ ដើម្បីឆ្ពោះទៅរកការលុបបំបាត់ទាំងស្រុងនូវអាវុធទាំងនេះ។
អ្នកនាំពាក្យបានគូសបញ្ជាក់ថា៖ «ក្នុងនាមជាសមាជិកមួយរូបរបស់អង្គការសហប្រជាជាតិដែលមានការទទួលខុសត្រូវ កម្ពុជាបានបំពេញទាំងស្រុងនូវកាតព្វកិច្ចអន្តរជាតិរបស់ខ្លួន ក្រោមធម្មនុញ្ញអង្គការសហប្រជាជាតិ ហើយបានអនុវត្តយ៉ាងស្មោះត្រង់នូវសេចក្ដីសម្រេចរបស់ UNSC ស្ដីពីការដាក់ទណ្ឌកម្មលើ ស.ប.ប.ក»។
ក្រសួងការបរទេសកម្ពុជា បានបន្ថែមថា កន្លងមក ក្រសួងការបរទេសក៏បានជូនដំណឹងដល់ក្រសួងនិងស្ថាប័នពាក់ព័ន្ធទាំងអស់អំពីសេចក្ដីសម្រេចទាំងអស់របស់ UNSC ទាក់ទងនឹង ស.ប.ប.ក ដើម្បីចាត់វិធានការជាក់ស្ដែង ហើយនៅដើមខែមីនា ឆ្នាំ២០១៨ រាជរដ្ឋាភិបាលកម្ពុជាបានបង្កើតក្រុមការងារចំពោះកិច្ចអន្តរក្រសួង និងរៀបចំកិច្ចប្រជុំ ដើម្បីធ្វើការត្រួតពិនិត្យរាល់ឯកសារ និងការស៊ើបអង្កេតលើបណ្ដាក្រុមហ៊ុននិងអាជីវកម្មរបស់ ស.ប.ប.ក ផងដែរ។
អ្នកនាំពាក្យបានបន្តទៀតថា ជាលទ្ធផល គណនីធនាគារចំនួន៧នៅក្នុងស្ថាប័នហិរញ្ញវត្ថុ២ផ្សេងគ្នា ត្រូវបានបិទចាប់តាំងពីឆ្នាំ២០១៧មក ហើយកម្ពុជាក៏បានបិទគ្រប់អាជីវកម្មរបស់ ស.ប.ប.ក ទាំងអស់ រួមទាំងភោជនីយដ្ឋាន និងសារមន្ទីរដែលធ្វើប្រតិបត្តិការនៅកម្ពុជា។
កាលពីថ្ងៃទី១២ ខែមិថុនា ឆ្នាំ២០១៩ ក្រសួងពាណិជ្ជកម្មបានលុបឈ្មោះក្រុមហ៊ុន Glory Worldwide Glow Co. Ltd របស់ ស.ប.ប.ក ចេញពីបញ្ជីពាណិជ្ជកម្ម។ ក្រសួងពាណិជ្ជកម្ម បានស្រាវជ្រាវក្រុមហ៊ុននានាដែលបានចុះបញ្ជីក្នុងប្រព័ន្ធរបស់ខ្លួន និងបានរកឃើញក្រុមហ៊ុនចំនួន១២ រួមទាំងក្រុមហ៊ុន Mansudae New Tech Corporation Ltd. ផង ដែលបានជាប់ពាក់ព័ន្ធជាមួយ ស.ប.ប.ក។ ក្រុមហ៊ុនទាំងនេះត្រូវបានលុបឈ្មោះចេញពីបញ្ជីកាលពីថ្ងៃទី៣០ ខែធ្នូ ឆ្នាំ២០១៩ ខណៈភោជនីយដ្ឋានចំនួន៨ត្រូវបានដកហូតអាជ្ញាបណ្ណនិងបិទទ្វារ កាលពីថ្ងៃទី៥ ខែធ្នូ ឆ្នាំ២០១៩ ។
កាលពីថ្ងៃទី១៥ ខែកុម្ភៈ ឆ្នាំ២០២២ ទីភ្នាក់ងារសារព័ត៌មានកូរ៉េខាងជើង NK News បានស្រង់របាយការណ៍បឋមមួយរបស់ក្រុមអ្នកជំនាញអង្គការសហប្រជាជាតិ មកចុះផ្សាយថា ចារកម្មកូរ៉េខាងជើងបានបើកដំណើរការអាជីវកម្មមួយចំនួននៅកម្ពុជា រួមមាន សណ្ឋាគារ កាស៊ីណូ ភោជនីយដ្ឋាន រង្គសាល និងភ្នាក់ងារទេសចរណ៍ ជាដើម ចាប់ពីពាក់កណ្ដាលឆ្នាំ២០២០។
ប្រភពដដែលបន្តថា ក្រុមអ្នកជំនាញរបស់អង្គការសហប្រជាជាតិ រកឃើញថា ភ្នាក់ងារចារកម្មម្នាក់ឈ្មោះ គឹម ចុលសុខ (Kim Chol Sok) បានបើកដំណើរការអាជីវកម្ម ដោយប្រើឈ្មោះហៅក្រៅថា សុខា (Sok Kha) តាមការបញ្ជារបស់ការិយាល័យស៊ើបអង្កេតទូទៅ (RGB) ដែលជាភ្នាក់ងារចារកម្មកំពូលរបស់កូរ៉េខាងជើង។ ប្រភពព័ត៌មានដដែលបានបន្តទៀតថា យោងតាមសេចក្ដីព្រាងនៃរបាយការណ៍ក្រុមអ្នកជំនាញរបស់អង្គការសហប្រជាជាតិ អាជីវកម្មមួយក្នុងចំណោមអាជីវកម្មដែលលោក Kim បានបើកដំណើរការនោះ ក្រុមហ៊ុនទេសចរណ៍ C.H. Word Travel Co.Ltd មានទីតាំងនៅក្នុងរាជធានីភ្នំពេញ ដែលសម្របសម្រួលការដើរលេងកម្សាន្តនៅតំបន់អាស៊ីបូព៌ា និងអាស៊ីអាគ្នេយ៍។
តែយ៉ាងណា បើតាមសេចក្ដីបំភ្លឺរបស់អ្នកនាំពាក្យក្រសួងការបរទេសកម្ពុជា ចាប់តាំងពីឆ្នាំ២០១៧មក កម្ពុជាបានបញ្ឈប់ទាំងស្រុងការផ្ដល់បណ្ណការងារដល់ពលករមកពី ស.ប.ប.ក ហើយគិតត្រឹមថ្ងៃទី៣០ ខែវិច្ឆិកា ឆ្នាំ២០១៩ កម្ពុជាបានសម្រេចមិនពន្យារទិដ្ឋាការដល់ប្រជាជន ស.ប.ប.ក ដែលបានធ្វើការនៅកម្ពុជាទៀតទេ។
