រដ្ឋមន្ត្រីក្រសួងហិរញ្ញវត្ថុជប៉ុន លោក ស៊ុនីហ្ស៊ី ស៊ុយហ្ស៊ុគី (Shunichi Suzuki) បានឱ្យដឹងនៅថ្ងៃអង្គារនេះថា ប្រទេសរបស់លោកនឹងសម្របសម្រួលជាមួយក្រុមប្រទេសមានសេដ្ឋកិច្ចជឿនលឿនទាំង៧ (G7) ក្នុងការដោះស្រាយស្ថានភាពនៅអ៊ុយក្រែន ខណៈដែលខ្លួនក៏កំពុងតែឃ្លាំមើលយ៉ាងយកចិត្តទុកដាក់ពីផលប៉ះពាល់ដែលអាចកើតមានឡើងលើសេដ្ឋកិច្ចរបស់ខ្លួន។
ទីភ្នាក់ងារសារព័ត៌មាន Reuters បានស្រង់សម្ដីរដ្ឋមន្ត្រីក្រសួងហិរញ្ញវត្ថុរូបនេះដែលបានថ្លែងប្រាប់អ្នកសារព័ត៌មានបន្ទាប់ពីកិច្ចប្រជុំគណៈរដ្ឋមន្ត្រីមួយថា លោកនឹងឃ្លាំមើលយ៉ាងដិតដល់នូវរាល់ផលប៉ះពាល់ទាំងឡាយណាដែលកើតមានឡើងពីការកើនឡើងនៃអត្រាការប្រាក់នៅក្នុងប្រទេសលោកខាងលិចមកលើសេដ្ឋកិច្ចរបស់ប្រទេសជប៉ុន។
យោងតាមកាសែត Yomiuri របស់ជប៉ុន ក៏បានរាយការណ៍ឱ្យដឹងនៅថ្ងៃអង្គារនេះថា ប្រទេសជប៉ុនក៏ទំនងជានឹងចូលរួមក្នុងការដាក់ទណ្ឌកម្មនានាដែលដឹកនាំដោយសហរដ្ឋអាមេរិកលើប្រទេសរុស្ស៊ីផងដែរ ដែលក្នុងនោះរួមមានការហាមឃាត់លើការនាំចេញបន្ទះឈីប និងបច្ចេកវិទ្យាសំខាន់ៗមួយចំនួនផ្សេងទៀត។
គួរបញ្ជាក់ថា ប្រទេសមួយចំនួន កាលពីពេលកន្លងទៅ ក៏ធ្លាប់បានព្រមានដាក់វិធានការសេដ្ឋកិច្ចធ្ងន់ធ្ងរនិងចំណាត់ការផ្សេងទៀតលើរុស្ស៊ី ក្នុងករណីដែលប្រទេសមួយនេះឈ្លានពានអ៊ុយក្រែនផងដែរ៕
