រដ្ឋមន្ត្រីក្រសួងមហាផ្ទៃ លោក ស ខេង បារម្ភអំពីការគ្រប់គ្រងសន្តិសុខនៅក្នុងពន្ធនាគារ ដោយសារអ្នកទោសគ្រឿងញៀនមានការកើនឡើង ខណៈហេដ្ឋារចនាសម្ព័ន្ធក្នុងពន្ធនាគារមួយចំនួនមានសភាពចាស់ទ្រុឌទ្រោម។
ក្នុងពិធីសន្និបាតត្រួតពិនិត្យលទ្ធផលការងារឆ្នាំ២០២១ និងលើកទិសដៅការងារឆ្នាំ២០២២ នៅក្រសួងមហាផ្ទៃ នាព្រឹកថ្ងៃពុធនេះ រដ្ឋមន្ត្រីក្រសួងមហាផ្ទៃ លោក ស ខេង ថ្លែងថា ការកើនឡើងនៃជនជាប់ឃុំបានធ្វើឱ្យពន្ធនាគារមានភាពចង្អៀតណែន ស្របពេលដែលអគារនិងហេដ្ឋារចនាសម្ព័ន្ធនៅពន្ធនាគារមួយចំនួនមានសភាពទ្រុឌទ្រោម។
លោកបន្តថា ភាពយឺតយ៉ាវអំពីចំណាត់ការរបស់តុលាការបានធ្វើឱ្យពន្ធនាគារកាន់តែមានភាពចង្អៀតណែនដែរ ដោយជាក់ស្ដែងអ្នកជាប់ឃុំជាង៣៧ ០០០នាក់ ក្នុងនោះ អ្នកដែលមានសាលក្រមនិងសាលដីកាពីតុលាការជាង១០ ១០០នាក់ប៉ុណ្ណោះ។
លោក ស ខេង បន្តថា ក្នុងចំណោមអ្នកជាប់ឃុំជាង៣៧ ០០០នាក់ គឺមានអ្នកជាប់ឃុំដែលពាក់ព័ន្ធគ្រឿងញៀនមានជាង៥៤ភាគរយ (៥៤,៤៤%) ដែលស្ថានភាពនេះកំពុងបង្កឱ្យមានការព្រួយបារម្ភពីការគ្រប់គ្រង និងការរក្សាសុវត្ថិភាពនៅតាមពន្ធនាគារ។
លោកថា៖ «ដើម្បីដោះស្រាយបញ្ហានេះ ខ្ញុំសូមផ្ដល់នូវការណែនាំអំពីវិធានការសំខាន់ៗមួយចំនួនដូចតទៅនេះ ត្រូវខិតខំបន្តអភិវឌ្ឍហេដ្ឋារចនាសម្ព័ន្ធ ជាពិសេសពន្ធនាគារដែលមានអគារចាស់ទ្រុឌទ្រោមខ្លាំងដែលអាចបង្កហានិភ័យដល់សន្តិសុខសុវត្ថិភាពនៅតាមពន្ធនាគារទាំងនោះ។ ចំពោះជនជាប់ឃុំហើយធ្លាប់បានប្រើប្រាស់គ្រឿងញៀនខុសច្បាប់ អគ្គនាយកដ្ឋានពន្ធនាគារត្រូវសហការជាមួយក្រសួងស្ថាប័នពាក់ព័ន្ធធ្វើការពិនិត្យនិងព្យាបាល និងបង្កើតកម្មវិធី ដើម្បីធានាស្ដារនីតិសម្បទាដល់ជនជាប់ឃុំទាំងនោះ»។
ទន្ទឹមនឹងនេះ លោកក៏បានណែនាំដល់មន្ត្រីជំនាញ ត្រូវរៀបចំមជ្ឈមណ្ឌលគ្រប់គ្រងទណ្ឌិតបទល្មើសគ្រឿងញៀន ដើម្បីរៀបចំអប់រំឱ្យអ្នកជាប់ឃុំទាំងនោះកែប្រែខ្លួនទៅជាពលរដ្ឋល្អនៅក្នុងសង្គមវិញ ខណៈខេត្តផ្សេងៗដែលមានលទ្ធភាពអាចនឹងត្រូវរៀបចំបែបនេះដែរ។
លោក ស ខេង ក៏បានស្នើទៅក្រសួងពាក់ព័ន្ធចំនួន៥ ក្នុងនោះ មានក្រសួងមហាផ្ទៃ ក្រសួងយុត្តិធម៌ ក្រសួងសេដ្ឋកិច្ច ក្រសួងសុខាភិបាល និងក្រសួងសង្គមកិច្ច ត្រូវធ្វើការងាររួមគ្នា ដើម្បីដោះស្រាយបញ្ហាប្រឈមចំពោះអ្នកជាប់ឃុំដែលប្រើប្រាស់គ្រឿងញៀន និងកាត់បន្ថយភាពចង្អៀតណែនក្នុងពន្ធនាគារផងដែរ។
បើតាមអគ្គលេខានៃអគ្គលេខាធិការដ្ឋានក្រសួងមហាផ្ទៃ លោក ប៉ោ ភក្តិ ដែលឡើងបញ្ជាក់ពីរបាយការណ៍ក្នុងសន្និបាតបូកសរុបការងារក្រសួងមហាផ្ទៃនាថ្ងៃនេះ បញ្ហាប្រឈមដែលខាងពន្ធនាគារជួបប្រទះ គឺកង្វះហេដ្ឋារចនាសម្ព័ន្ធ ដែលករណីនេះធ្វើឱ្យមណ្ឌលអប់រំកែប្រែមិនទាន់អនុវត្តមុខងារក្នុងការគ្រប់គ្រងជនជាប់ឃុំស្ថិតនៅនីតិវិធីតុលាការ ដើម្បីជួយសម្រួលភាពចង្អៀត ខណៈមន្ត្រីអប់រំផ្លូវចិត្តតាមពន្ធនាគារនៅខ្វះខាតនៅឡើយ។
បញ្ហាប្រឈមមួយចំនួនទៀត លោកថា នៅតាមប៉ុស្តិ៍សុខភាពពន្ធនាគារខ្វះខាតមន្ត្រីពេទ្យ ខ្វះឧបករណ៍ និងបរិក្ខារពេទ្យ រួមទាំងឱសថ ខណៈអគារពន្ធនាគារមួយចំនួនមានសភាពចាស់ទ្រុឌទ្រោម ហើយជួសជុលច្រើនដង ហើយការបែងចែកអ្នកជាប់ឃុំពាក់ព័ន្ធនឹងគ្រឿងញៀននៅក្នុងពន្ធនាគារក៏មិនទាន់មានដែរ។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង មានប្រសាសន៍ថា ដើមចមដែលនាំឱ្យមានជនជាប់ឃុំច្រើន ដោយសារបញ្ហាគ្រឿងញៀន។ ករណីនេះ លោកជំរុញដល់រដ្ឋាភិបាលត្រូវពង្រឹងការទប់ស្កាត់បទល្មើសគ្រឿងញៀនឱ្យមានប្រសិទ្ធភាពជាងពេលបច្ចុប្បន្ន។
លោកថា៖ «ទប់ស្កាត់បទល្មើសគ្រឿងញៀន កុំឱ្យវាកើតឡើង! រឿងទី២ទៀត កាត់បន្ថយ ធ្វើម៉េចកុំឱ្យគ្រឿងញៀនអាចចូលមកកម្ពុជាបាន ឬអត់អាចផលិតនៅកម្ពុជាបាន ឬឆ្លងកាត់កម្ពុជាបាន។ រឿងទាំងអស់នេះសំខាន់ អ៊ីចឹងបើទប់ស្កាត់អាហ្នឹងបាន អាចកាត់បន្ថយបទល្មើសបានមួយចំនួន។ កាលណាកាត់បន្ថយបទល្មើស វាក៏កាត់បន្ថយភាពចង្អៀតណែនក្នុងពន្ធនាគារដែរ»។
របាយការណ៍ក្រសួងមហាផ្ទៃ បង្ហាញថា ការបង្ក្រាបគ្រឿងញៀននៅឆ្នាំ២០២១ រឹបអូសបានគ្រឿងញៀនជាង៨០តោន និងម៉ាស៊ីនផលិតកែច្នៃគ្រឿងញៀនទំនើបៗជាច្រើនគ្រឿងទៀត។ ចំណែកនៅដើមខែកុម្ភៈ ឆ្នាំ២០២២នេះ ក្រសួងមហាផ្ទៃ និងសមត្ថកិច្ចជំនាញក៏បានបង្ក្រាបករណីនាំចូលសារធាតុញៀនចំនួនជាង១០០តោនចូលកម្ពុជាផងដែរ៕
