រដ្ឋមន្ត្រីការបរទេសសហរដ្ឋអាមេរិក លោក Antony Blinken បានឱ្យដឹងនៅថ្ងៃអង្គារម្សិលមិញថា ខ្លួនបានសម្រេចលុបចោលកិច្ចប្រជុំជាមួយរដ្ឋមន្ត្រីការបរទេសរុស្ស៊ី លោក Sergey Lavrov ដែលគ្រោងធ្វើឡើងនៅថ្ងៃព្រហស្បតិ៍ស្អែកនេះហើយ បន្ទាប់ពីប្រទេសមួយនេះទទួលស្គាល់តំបន់ផ្ដាច់ខ្លួនចំនួនពីរនៅភាគខាងកើតអ៊ុយក្រែនជារដ្ឋឯករាជ្យ។
រដ្ឋមន្ត្រីការបរទេសអាមេរិករូបនេះក៏បានបញ្ជាក់ផងដែរថា រូបលោកយល់ព្រមជួបជាមួយលោក Sergey Lavrov គឺនៅក្នុងករណីដែលរុស្ស៊ីមិនឈ្លានពានអ៊ុយក្រែនប៉ុណ្ណោះ។
ទីភ្នាក់ងារសារព័ត៌មាន Reuters បានស្រង់សម្ដីលោក Antony Blinken ដែលបានថ្លែងប្រាប់អ្នកយកព័ត៌មានបន្ទាប់ពីជំនួបជាមួយរដ្ឋមន្ត្រីការបរទេសអ៊ុយក្រែន លោក Dmytro Kuleba ថា៖ «បច្ចុប្បន្ននេះ យើងឃើញថាការឈ្លានពានកំពុងតែចាប់ផ្ដើមហើយ ដែលរុស្ស៊ីបញ្ជាក់យ៉ាងច្បាស់ពីការបដិសេធផ្នែកការទូតរបស់ខ្លួន។ វាគ្មានហេតុផលអ្វីដែលត្រូវបន្តកិច្ចប្រជុំនៅពេលនេះនោះទេ»។
ទោះជាយ៉ាងណា រដ្ឋមន្ត្រីការបរទេសដដែលនេះបន្តថា ខ្លួននៅតែប្ដេជ្ញាចិត្តចំពោះដំណោះស្រាយផ្នែកការទូតក្នុងករណីដែលរុស្ស៊ីមានការផ្លាស់ប្ដូរ ខណៈដែលលោកក៏នឹងព្យាយាមធ្វើអ្វីគ្រប់បែបយ៉ាងតាមដែលអាចធ្វើទៅបាន ដើម្បីបញ្ចៀសនូវរូបភាពដែលកាន់តែអាក្រក់ជាងនេះលើអ៊ុយក្រែនផងដែរ។
គួរបញ្ជាក់ថា បណ្ដាប្រទេសលោកខាងលិចមួយចំនួន កាលពីថ្ងៃអង្គារ ក៏បានសម្រេចដាក់ទណ្ឌកម្មថ្មីជាបន្តបន្ទាប់លើរុស្ស៊ីផងដែរ បន្ទាប់ពីប្រធានាធិបតី លោក វ្លាឌីមៀរ ពូទីន កាលពីថ្ងៃចន្ទ បានប្រកាសទទួលស្គាល់តំបន់ផ្ដាច់ខ្លួនចំនួនពីរនៅភាគខាងកើតអ៊ុយក្រែន និងបញ្ជាឱ្យដាក់ពង្រាយកងទ័ពទៅកាន់តំបន់ទាំងនេះ។
ទាក់ទិននឹងករណីនេះ លោក Antony Blinken បន្ថែមថា សហរដ្ឋអាមេរិក និងសម្ព័ន្ធមិត្តនានារបស់ខ្លួន ក៏នឹងបង្កើនការដាក់ទណ្ឌកម្មបន្ថែមទៀតលើរុស្ស៊ីផងដែរ ប្រសិនបើប្រទេសមួយនេះនៅតែបន្តបង្កើនការឈ្លានពានរបស់ខ្លួនលើអ៊ុយក្រែន៕
