ប្រធានាធិបតីសហរដ្ឋអាមេរិក លោក ចូ បៃឌិន បានឱ្យដឹងបន្ទាប់ពីមានសំឡេងនៃការវាយប្រហារនៅទីក្រុងនានាក្នុងប្រទេសអ៊ុយក្រែន ថាសហរដ្ឋអាមេរិកនិងសម្ព័ន្ធមិត្តទាំងឡាយរបស់ខ្លួននឹងដាក់ទណ្ឌកម្មធ្ងន់ធ្ងរលើប្រទេសរុស្ស៊ី ខណៈកងកម្លាំងយោធារបស់ប្រទេសមួយនេះបានបើកការវាយប្រហារលើអ៊ុយក្រែន។
ប្រធានាធិបតីរូបនេះបានថ្លែងថា លោកក៏បានជួបពិភាក្សាជាមួយប្រធានាធិបតីអ៊ុយក្រែន លោក Volodymyr Zelenskiy និងបានរៀបរាប់ប្រាប់អំពីជំហានដែលអាមេរិកកំពុងអនុវត្ត ដើម្បីប្រមូលផ្ដុំការថ្កោលទោសជាអន្តរជាតិលើប្រទេសរុស្ស៊ីផងដែរ។
ទីភ្នាក់ងារសារព័ត៌មាន Reuters បានស្រង់សម្ដីលោក ចូ បៃឌិន ដែលបានថ្លែងឱ្យដឹងនៅក្នុងសេចក្ដីថ្លែងការណ៍មួយថា៖ «ថ្ងៃស្អែកនេះ [ថ្ងៃព្រហស្បតិ៍] ខ្ញុំនឹងជួបជាមួយមេដឹកនាំនៃក្រុមប្រទេស G7 ខណៈដែលសហរដ្ឋអាមេរិក សម្ព័ន្ធមិត្ត និងដៃគូរបស់យើងនានា នឹងដាក់ទណ្ឌកម្មធ្ងន់ធ្ងរលើប្រទេសរុស្ស៊ី»។
លោកបន្ថែមថា អាមេរិកនឹងបន្តផ្ដល់ការគាំទ្រនិងជំនួយដល់អ៊ុយក្រែន និងប្រជាជនរបស់ខ្លួន។
ជាមួយគ្នានេះ លោក ចូ បៃឌិន ក៏បានថ្កោលទោសចំពោះទង្វើរបស់ប្រធានាធិបតីរុស្ស៊ី លោក វ្លាឌីមៀរ ពូទីន ដែលបានថ្លែងប្រាប់ទូរទស្សន៍រដ្ឋថា លោកបានអនុញ្ញាតឱ្យមានប្រតិបត្តិការយោធាពិសេសមួយនៅភាគខាងកើតអ៊ុយក្រែនផងដែរ។
លោកថា៖ «ប្រធានាធិបតី លោក ពូទីន បានចាប់ផ្ដើមសង្រ្គាមដែលបានគិតទុកជាមុនមួយ ដែលនឹងនាំមកនូវការខាតបង់យ៉ាងធ្ងន់ធ្ងរដល់អាយុជីវិត និងការឈឺចាប់របស់មនុស្ស»។
ប្រធានាធិបតីអាមេរិកដដែលនេះបន្តថា៖ «រុស្ស៊ីតែម្នាក់ឯង គឺជាអ្នកទទួលខុសត្រូវចំពោះការស្លាប់និងការបំផ្លិចបំផ្លាញដែលបង្កឡើងដោយការវាយប្រហារនេះ។ ពិភពលោកនឹងធ្វើអ្វីគ្រប់បែបយ៉ាង ដើម្បីឱ្យរុស្ស៊ីទទួលខុសត្រូវចំពោះករណីនេះ»។
លោក ចូ បៃឌិន បានឱ្យដឹងទៀតថា លោកក៏នឹងបន្តតាមដានស្ថានការណ៍នេះពីសេតវិមាន មុនពេលជំនួបតាមតាមអនឡាញជាមួយក្រុមប្រទេសមានសេដ្ឋកិច្ចជឿនលឿនទាំង៧ (G7) នៅព្រឹកថ្ងៃព្រហស្បតិ៍ផងដែរ។
គួរបញ្ជាក់ថា រដ្ឋមន្ត្រីការបរទេសសហរដ្ឋអាមេរិក លោក Antony Blinken កាលពីពេលថ្មីៗនេះ ក៏បានសម្រេចលុបចោលកិច្ចប្រជុំជាមួយរដ្ឋមន្ត្រីការបរទេសរុស្ស៊ី លោក Sergey Lavrov ដែលគ្រោងធ្វើឡើងនៅថ្ងៃព្រហស្បតិ៍នេះផងដែរ បន្ទាប់ពីប្រទេសមួយនេះឈ្លានពានអ៊ុយក្រែន៕