ប្រធានាធិបតីអ៊ុយក្រែន លោក Volodymyr Zelensky បានធ្វើការប្ដេជ្ញានៅថ្ងៃសុក្រនេះថា រូបលោកនឹងបន្តស្នាក់នៅក្នុងទីក្រុង Kyiv ខណៈដែលកងទ័ពរបស់លោកកំពុងព្យាយាមប្រយុទ្ធពីការឈ្លានពានរបស់រុស្ស៊ី ដែលកំពុងតែឆ្ពោះមកកាន់រដ្ឋធានីមួយនេះ។
រុស្ស៊ីបានបើកការឈ្លានពានរបស់ខ្លួនទៅលើអ៊ុយក្រែនតាមផ្លូវគោក ផ្លូវអាកាស និងសមុទ្រ កាលពីថ្ងៃព្រហស្បតិ៍ ពោលគឺបន្ទាប់ពីការប្រកាសសង្រ្គាមមួយដែលធ្វើឡើងដោយប្រធានាធិបតីរុស្ស៊ី លោក វ្លាឌីមៀរ ពូទីន ដែលក្នុងនោះមនុស្សប្រមាណជា១០ម៉ឺននាក់ក៏បានព្យាយាមភៀសខ្លួនចេញ ស្របពេលដែលមានការផ្ទុះ និងស្នូរកាំភ្លើងក្នុងទីក្រុងធំៗមួយចំនួនផងដែរ។
ទាក់ទិននឹងករណីនេះ មន្ត្រីអាមេរិក និងអ៊ុយក្រែន បានឱ្យដឹងថា រុស្ស៊ីមានបំណងចូលមកកាន់ទីក្រុង Kyiv ហើយផ្ដួលរំលំរដ្ឋាភិបាលដែលលោក ពូទីន ចាត់ទុកថាជាអាយ៉ងរបស់អាមេរិក ខណៈដែលទាហានរុស្ស៊ីក៏បានរឹបអូសយកអតីតរោងចក្រថាមពលនុយក្លេអ៊ែរ Chernobyl ភាគខាងជើងនៃទីក្រុង Kyiv ផងដែរ។
ទីភ្នាក់ងារសារព័ត៌មាន Reuters បានស្រង់សម្ដីលោក Volodymyr Zelensky ដែលបានថ្លែងព្រមាននៅក្នុងសារជាវីដេអូមួយថា៖ «សត្រូវ [កងទ័ពរុស្ស៊ី] បានកំណត់ខ្ញុំគឺជាគោលដៅទី១ ហើយគ្រួសាររបស់ខ្ញុំគឺជាគោលដៅទី២។ ពួកគេចង់កម្ទេចអ៊ុយក្រែនតាមវិធីសាស្រ្តនយោបាយ តាមរយៈការបំផ្លាញប្រមុខរដ្ឋ»។
ទោះជាយ៉ាង ប្រធានាធិបតីរូបនេះបន្ថែមថា៖ «ខ្ញុំនឹងស្នាក់នៅក្នុងរដ្ឋធានីមួយនេះ ហើយគ្រួសាររបស់ខ្ញុំក៏នៅក្នុងអ៊ុយក្រែនផងដែរ»។
គួរបញ្ជាក់ថា លោក ពូទីន បានលើកឡើងថា រុស្ស៊ីកំពុងតែអនុវត្ត «ប្រតិបត្តិការយោធាពិសេសមួយ» ដើម្បីបញ្ឈប់រដ្ឋាភិបាលអ៊ុយក្រែនពីការប្រព្រឹត្តអំពើប្រល័យពូជសាសន៍ប្រឆាំងនឹងប្រជាជនរបស់ខ្លួន ខណៈដែលការចោទប្រកាន់នេះត្រូវបានប្រទេសលោកខាងលិចចាត់ទុកថាជាការលើកឡើងដោយគ្មានមូលដ្ឋានច្បាស់លាស់។
ប្រធានាធិបតីរុស្ស៊ីរូបនេះក៏បានបន្ថែមឱ្យដឹងទៀតថា អ៊ុយក្រែនជារដ្ឋមិនស្របច្បាប់មួយ ដែលដំបូងឡើយជាទឹកដីរបស់រុស្ស៊ី៕