អ្នកនាំពាក្យក្រសួងការបរទេសកម្ពុជាបានឱ្យដឹងថា ពលរដ្ឋខ្មែរចំនួន ២៣នាក់ និងគ្រួសាររបស់ពួកគេដែលកំពុងរស់នៅក្នុងប្រទេសអ៊ុយក្រែនកំពុងស្ថិតនៅកន្លែងមានសុវត្ថិភាព ប៉ុន្តែមានការព្រួយបារម្ភចំពោះអនាគតទៅមុខ។
អ្នកនាំពាក្យក្រសួងការបរទេសកម្ពុជា លោក ជុំ សុន្ទរី បានជូនដំណឹងខ្លីមួយនៅថ្ងៃសៅរ៍នេះថា បច្ចុប្បន្ននេះ កម្ពុជាមិនមាននិស្សិតខ្មែរកំពុងសិក្សានៅក្នុងប្រទេសអ៊ុយក្រែននោះទេ។ ក៏ប៉ុន្តែមានអតីតនិស្សិតខ្មែរដែលបានទៅសិក្សានៅក្នុងជំនាន់អតីតសហភាពសូវៀត ក្នុងរង្វង់ទសវត្សរ៍ទី៨០ និងដើមទសវត្សរ៍ទី៩០ ចំនួន ២៣នាក់ កំពុងរស់នៅលើទឹកដីប្រទេសអ៊ុយក្រែន ជាមួយគ្រួសាររបស់ពួកគេ។
ប្រភពដដែលបានឱ្យដឹងថា ក្រសួងការបរទេសកម្ពុជា រួមទាំងស្ថានទូតកម្ពុជាប្រចាំនៅទីក្រុងមូស្គូប្រទេសរុស្ស៊ី កំពុងខិតខំទំនាក់ទំនងជាមួយពលរដ្ឋខ្មែរទាំងអស់នោះ ដើម្បីទទួលបានព័ត៌មានលំអិតអំពីស្ថានភាពរបស់ពួកគេ។
លោក ជុំ សុន្ទរី បានសរសេរថា៖ «ខ្ញុំសូមជំរាបជូនថា ដោយមានការសម្របសម្រួលរបស់ “សមាគមអតីតនិស្សិតកម្ពុជាពីសូវៀតនិងរុស្សី” ខ្ញុំបានជួបសន្ទនាដោយផ្ទាល់ តាមប្រព័ន្ធតេលេក្រាម ជាមួយពលរដ្ឋខ្មែរយើងម្នាក់ដែលកំពុងរស់នៅក្នុងប្រទេសអ៊ុយក្រែន ហើយទទួលបានព័ត៌មានថា បច្ចុប្បន្ន មានអតីតនិស្សិតដែលបានទៅសិក្សាក្នុងជំនាន់អតីតសហភាពសូវៀត ចំនួន ២៣នាក់ ដែលកំពុងរស់នៅជាមួយគ្រួសាររបស់ពួកគេ នៅ Kharkov ចំនួន ៧នាក់ នៅតំបន់ Kyiv ១១នាក់ និងនៅ Odessa ៥នាក់។ ពួកគាត់ទាំងអស់គ្នាមានទំនាក់ទំនងជាមួយគ្នាជាប់ជាប្រចាំតាមក្រុមតេលេក្រាម»។
បើតាមការឱ្យដឹងពីលោក ជុំ សុន្ទរី ទោះបីជាចាប់ផ្តើមជួបការលំបាកខ្លះៗ ក្នុងជីវភាពរស់នៅ ជាពិសេសសំរាប់តំបន់ Kyiv តែពួកគាត់ទាំងអស់គ្នាមានសុវត្ថិភាពជាធម្មតាទេ។ ប៉ុន្តែទន្ទឹមនឹងនោះក៏មានការព្រួយបារម្ភចំពោះអនាគតទៅមុខ។
អ្នកនាំពាក្យក្រសួងការបរទេសបានឱ្យដឹងដែរថា ក្រសួងការបរទេសកម្ពុជា រួមនិងស្ថានទូតកម្ពុជាប្រចាំនៅប្រទេសរុស្ស៊ី កំពុងបន្តទំនាក់ទំនងជាមួយពលរដ្ឋខ្មែរទាំងអស់នោះដើម្បីទទួលបានព័ត៌មានអំពីស្ថានភាពរបស់ពួកគាត់។
បើតាមប្រភពដដែលថា រហូតពេលនេះការវាយប្រយុទ្ធគ្នា នៅមិនទាន់រាលដាលដល់តំបន់ដែលពលរដ្ឋខ្មែរទាំង ២៣ នាក់រស់នៅនៅឡើយទេ។
គួរជម្រាបជូនថា ប្រទេសរុស្ស៊ីបានបើកការវាយប្រហារទៅលើអ៊ុយក្រែនតាមផ្លូវគោក ផ្លូវអាកាស និងសមុទ្រ កាលពីថ្ងៃព្រហស្បតិ៍ ទី២៤ ខែកុម្ភៈ ពោលគឺបន្ទាប់ពីការប្រកាសសង្រ្គាមមួយដែលធ្វើឡើងដោយប្រធានាធិបតីរុស្ស៊ី លោក វ្លាឌីមៀរ ពូទីន ដែលក្នុងនោះមនុស្សប្រមាណជា១០ម៉ឺននាក់ក៏បានព្យាយាមភៀសខ្លួនចេញ ស្របពេលដែលមានការផ្ទុះ និងស្នូរកាំភ្លើងក្នុងទីក្រុងធំៗមួយចំនួន។
សេចក្តីរាយការណ៍ចុងក្រោយបានឱ្យដឹងថា កងទ័ពរុស្ស៊ីបានវាយចូលដល់ទីក្រុង កៀវ (Kyiv) នៅព្រឹកថ្ងៃសៅរ៍នេះ ខណៈប្រធានាធិបតីអ៊ុយក្រែន លោក Volodymyr Zelensky បានប្ដេជ្ញាមិនចាកចេញពីទីក្រុងនេះឡើយ ហើយលោកនឹងនៅទីនេះដើម្បីប្រយុទ្ធ៕