ក្រសួងការបរទេសសហរដ្ឋអាមេរិក នៅថ្ងៃអាទិត្យម្សិលមិញ បានជំរុញពលរដ្ឋរបស់ខ្លួនគួរតែពិចារណាចាកចេញពីប្រទេសរុស្ស៊ីជាបន្ទាន់ តាមជើងហោះហើរពាណិជ្ជកម្មនានាដែលនៅសេសសល់ ស្របពេលដែលក្រុមហ៊ុនអាកាសចរណ៍ជាច្រើនបច្ចុប្បន្នកំពុងលុបចោលជើងហោះហើរ បន្ទាប់ពីរុស្ស៊ីឈ្លានពានអ៊ុយក្រែនក្នុងទ្រង់ទ្រាយធំ។
ទីភ្នាក់ងារសារព័ត៌មាន Reuters បានស្រង់សេចក្ដីជូនដំណឹងមួយចុះថ្ងៃទី២៧ ខែកុម្ភៈ ដែលបង្ហោះនៅលើគេហទំព័ររបស់ស្ថានទូតអាមេរិកប្រចាំទីក្រុងមូស្គូថា៖ «ប្រជាពលរដ្ឋអាមេរិកទាំងឡាយគួរតែពិចារណាចាកចេញពីប្រទេសរុស្ស៊ីជាបន្ទាន់ តាមជម្រើសជើងហោះហើរពាណិជ្ជកម្មនានាដែលមាន»។
សេចក្ដីជូនដំណឹងដដែលក៏បានស្នើឱ្យពលរដ្ឋអាមេរិករៀបចំផែនការត្រៀមទុកជាមុន ដោយមិនត្រូវពឹងផ្អែកតែលើជំនួយរបស់រដ្ឋាភិបាលសហរដ្ឋអាមេរិកនោះទេ។
ជាមួយគ្នានេះ សហរដ្ឋអាមេរិក កាលពីថ្ងៃអាទិត្យ ក៏បានជូនដំណឹងដល់ពលរដ្ឋរបស់ខ្លួនដែលព្យាយាមចាកចេញពីប្រទេសអ៊ុយក្រែន ឱ្យពិចារណាធ្វើសកម្មភាពនេះ តាមរយៈច្រកព្រំដែនផ្លូវគោកប្រទេសហុងគ្រី រូម៉ានី និងស្លូវ៉ាគី ខណៈដែលពួកគេអាចនឹងចំណាយពេលវេលារង់ចាំតិចជាងច្រកប្រទេសប៉ូឡូញ និងម៉ុលដូវ៉ា។
គួរបញ្ជាក់ថា រុស្ស៊ីបានបើកការឈ្លានពានរបស់ខ្លួនមកលើអ៊ុយក្រែនតាមផ្លូវគោក ផ្លូវអាកាស និងសមុទ្រ កាលពីថ្ងៃព្រហស្បតិ៍សប្ដាហ៍មុន បន្ទាប់ពីការប្រកាសសង្រ្គាមមួយដែលធ្វើឡើងដោយប្រធានាធិបតីរុស្ស៊ី លោក វ្លាឌីមៀរ ពូទីន ដែលក្នុងនោះមនុស្សរាប់ម៉ឺននាក់ក៏បានព្យាយាមភៀសខ្លួនចេញជាបន្តបន្ទាប់ស្របពេលដែលមានការផ្ទុះ និងស្នូរកាំភ្លើងក្នុងទីក្រុងធំៗមួយចំនួនផងដែរ៕