ប្រធានាធិបតីប្រទេសបេឡារុស លោក អេឡិចហ្សានដឺ លូកាហ្សិនកូ (Alexander Lukashenko) បានឱ្យដឹងតាមរយៈការស្រង់សម្ដីដោយទីភ្នាក់ងារព័ត៌មានរដ្ឋមួយនៅថ្ងៃអង្គារនេះថា ប្រទេសរបស់លោកមិនមានគម្រោងណាមួយក្នុងការចូលរួមប្រតិបត្តិការយោធារបស់រុស្ស៊ីនៅអ៊ុយក្រែនឡើយ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ជាមួយគ្នានេះ លោក អេឡិចហ្សានដឺ លូកាហ្សិនកូ ក៏បានធ្វើការបដិសេធការចោទប្រកាន់របស់ទីក្រុងកៀវ (Kyiv) ដែលបានលើកឡើងថា កងទ័ពរុស្ស៊ីបាននិងកំពុងវាយប្រហារអ៊ុយក្រែនពីទឹកដីនៃប្រទេសបេឡារុសផងដែរ។
គួរបញ្ជាក់ថា ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេះ បានចាប់ផ្តើមកើនឡើងខ្លាំង ខណៈរុស្ស៊ីបន្តព្យាយាមដាក់សម្ពាធមកលើអ៊ុយក្រែន តាមរយៈការចលនាទ័ពរបស់ខ្លួនចូលមកកាន់ប្រទេសមួយនេះ។
ទាក់ទិននឹងករណីនេះ ប្រធានាធិបតីរុស្ស៊ី លោក វ្លាឌីមៀរ ពូទីន ធ្លាប់បានលើកឡើងកាលពីពេលកន្លងទៅថា រុស្ស៊ីកំពុងតែអនុវត្ត «ប្រតិបត្តិការយោធាពិសេសមួយ» ដើម្បីបញ្ឈប់រដ្ឋាភិបាលអ៊ុយក្រែនពីការប្រព្រឹត្តអំពើប្រល័យពូជសាសន៍ប្រឆាំងនឹងប្រជាជនរបស់ខ្លួន ខណៈដែលការចោទប្រកាន់នេះ ត្រូវបានចាត់ទុកដោយលោកខាងលិចថាគ្មានមូលដ្ឋានច្បាស់លាស់៕
