លោក កឹម សុខា ប្រធានគណបក្សសង្គ្រោះជាតិដែលត្រូវបានតុលាការរំលាយ បានអំពាវនាវជាថ្មីម្ដងទៀតឱ្យតុលាការទម្លាក់ចោលការចោទប្រកាន់មកលើរូបលោកពីបទ «សន្ទិដ្ឋិភាព» ឬគប់គិតជាមួយរដ្ឋបរទេសដើម្បីផ្ដួលរំលំរដ្ឋាភិបាលកម្ពុជា។
មុនពេលចេញដំណើរទៅចូលរួមសវនាការនៅព្រឹកថ្ងៃទី២ ខែមីនានេះ លោក កឹម សុខា បានថ្លែងថា រហូតមកដល់ពេលនេះ (៤ឆ្នាំ) ភាគីដើមចោទមិនមានភស្តុតាងណាមួយដើម្បីចោទប្រកាន់លោកពីបទ«គប់គិតជាមួយរដ្ឋបរទេសដើម្បីផ្តួលរំលំរដ្ឋាភិបាលកម្ពុជា»នោះទេ។ លោកថា មេធាវីរបស់លោកបានចោទសំណួរថា តើបរទេសណា?
លោកបានថ្លែងថា៖ «ដំណើរការសវនាការអស់រយៈពេលរហូតលើកទី៣១កន្លងមកនេះ គឺមិនមានភស្តុតាងរឹងមាំដើម្បីដាក់បន្ទុកថាខ្ញុំបានប្រព្រឹត្តដូចបទចោទនោះទេ។ អ្វីដែលយើងមើលទៅលើបទចោទហ្នឹង ទីមួយគឺពីបទសន្ទិដ្ឋិភាពជាមួយបរទេស ហើយរហូតមកដល់ថ្ងៃនេះ អ្នកចោទហ្នឹងអត់ទាន់ឃើញបង្ហាញថាបរទេសណា? មេធាវីយើងសួររកបរទេសណា? គាត់អត់មាន»។
លោក កឹម សុខា ចង់បានដំណោះស្រាយឆាប់ៗ ហើយថាការពន្យារពេលសំណុំរឿងរបស់លោកមកទល់ពេលនេះ គឺអាចជាចេតនាមួយមិនចង់ឱ្យមេដឹកនាំគណបក្សនយោបាយមួយដែលជាគូប្រជែងចូលរួមបោះឆ្នោតនោះទេ។
លោកបន្ថែមថា៖ «ខ្ញុំគិតថា វាគ្រប់គ្រាន់ល្មម ដែលពេលវេលានេះ វាហួសពេលហើយ វាច្រើនពេកទៅហើយ ដើម្បីទម្លាក់ចោលបទចោទមកលើខ្ញុំហើយ។ ព្រោះអ្វី? បើយើងគិតមើល ទាំងអស់គ្នាដឹងថា ខ្ញុំជាមេដឹកនាំគណបក្សប្រឆាំងដ៏ធំនៅកម្ពុជាដែលមានសក្ដានុពលក្នុងការប្រកួតប្រជែងគ្នាតាមគោលការណ៍ប្រជាធិបតេយ្យសេរីពហុបក្ស ហើយការបោះឆ្នោតឃុំ-សង្កាត់ ការចុះឈ្មោះគណបក្សចូលក្នុងបញ្ជីចាប់ផ្ដើមហើយ ហើយមកដល់ថ្ងៃនេះ ហើយអត់ទាន់មានដំណោះស្រាយ? ប្រសិនបើអត់មានដំណោះស្រាយ គឺបង្ហាញច្បាស់ណាស់ គឺមានចេតនាមិនចង់ឱ្យមេដឹកនាំឬគណបក្សដែលជាគូប្រកួតពិត ជម្រើសពិតរបស់ប្រជាពលរដ្ឋក្នុងការបោះឆ្នោតចូលរួមបោះឆ្នោត។ អ៊ីចឹងការបោះឆ្នោតហ្នឹង គឺពិបាកហ្នឹងទទួលស្គាល់ ពិបាកនឹងថាជាការបោះឆ្នោតដោយសេរី ត្រឹមត្រូវ និងយុត្តិធម៌ ពិបាកណាស់»។
គួរជម្រាបជូនថា គិតត្រឹមសវនាការនៅថ្ងៃទី២ ខែមីនា ឆ្នាំ២០២២នេះ គឺជាសវនាការគម្រប់លើកទី៣២ហើយក្នុងសំណុំរឿងរបស់លោក កឹម សុខា។ ប៉ុន្តែតំណាងអយ្យការ និងភាគីដើមបណ្ដឹងមិនមានភស្តុតាងរឹងមាំណាមួយបញ្ជាក់ថា លោក កឹម សុខា បានគប់គិតជាមួយរដ្ឋបរទេសដើម្បីផ្ដួលរំលំរដ្ឋាភិបាលកម្ពុជានោះទេ ក្រៅតែពីភស្តុតាងជារូបថត ជាវីដេអូ ដែលជាសកម្មភាពរបស់លោក កឹម សុខា ក្នុងពេលចុះជួបប្រជាពលរដ្ឋនិងអ្នកគាំទ្រនៅក្នុងនិងក្រៅប្រទេសតែប៉ុណ្ណោះ៕
