ប្រធានាធិបតីតៃវ៉ាន់ លោកស្រី សៃ អ៊ីងវេន (Tsai Ing-wen) បានឱ្យដឹងនៅថ្ងៃពុធនេះថា រូបលោកស្រី អនុប្រធានាធិបតី លោក William Lai និងនាយករដ្ឋមន្ត្រី លោក Su Tseng-chang នឹងបរិច្ចាគប្រាក់បៀវត្សចំនួនមួយខែរបស់ពួកគេរៀងៗខ្លួន ដើម្បីជួយដល់ប្រទេសអ៊ុយក្រែនក្នុងការទប់ទល់ការឈ្លានពានរបស់រុស្ស៊ី។
ទីភ្នាក់ងារសារព័ត៌មាន Reuters បានស្រង់សម្ដីប្រធានាធិបតីតៃវ៉ាន់ដែលបានថ្លែងប្រាប់កិច្ចប្រជុំមួយក្នុងបក្សរបស់លោកស្រី ថាអ្វីដែលប្រជាជនអ៊ុយក្រែនជួបប្រទះនៅពេលនេះបានធ្វើឱ្យពិភពលោក រួមនឹងប្រជាជនតៃវ៉ាន់ផងដែរនោះ មានការសោកសង្វេគយ៉ាងខ្លាំង។
រុស្ស៊ីបានបើកការឈ្លានពានទ្រង់ទ្រាយធំរបស់ខ្លួនទៅលើអ៊ុយក្រែនតាមផ្លូវគោក ផ្លូវអាកាស និងសមុទ្ រកាលពីថ្ងៃព្រហស្បតិ៍សប្ដាហ៍មុន ដោយពួកគេចាត់ទុកសកម្មភាពរបស់ខ្លួននៅអ៊ុយក្រែននេះថាជា «ប្រតិបត្តិការពិសេស» មួយ។
ទោះជាយ៉ាងណា លោកស្រី សៃ អ៊ីងវេន បន្ថែមថា កម្លាំងនៃលទ្ធិប្រជាធិបតេយ្យសកលដែលគាំទ្រអ៊ុយក្រែនកំពុងតែមានការកើនឡើងខ្លាំង។
លោកស្រីថា៖ «ក្នុងនាមជាសមាជិកមួយនៃដៃគូសកលនៃលទ្ធិប្រជាធិបតេយ្យ តៃវ៉ាន់មិននៅស្ងៀមនោះទេ ហើយយើងគាំទ្រអ៊ុយក្រែនយ៉ាងពេញទំហឹង»។
គួរបញ្ជាក់ថា តៃវ៉ាន់កាលពីសប្ដាហ៍មុន ក៏បានប្រកាសថា ខ្លួនបានចូលរួមក្នុងការដាក់ទណ្ឌកម្មដែលដឹកនាំដោយលោកខាងលិចលើរុស្ស៊ីផងដែរ បើទោះបីជាពាណិជ្ជកម្មផ្ទាល់របស់ខ្លួនជាមួយប្រទេសនេះស្ថិតក្នុងទំហំតិចតួចក៏ដោយ។
ទាក់ទិននឹងករណីនេះ លោកស្រី សៃ អ៊ីងវេន ថ្លែងថា៖ «ខ្ញុំសង្ឃឹមថាជនរួមជាតិរបស់យើង ក៏ដូចជាដៃគូគណបក្សរបស់យើងទាំងអស់នៅក្នុងការិយាល័យសាធារណៈ អាចឆ្លើយតបយ៉ាងពេញលេញចំពោះសកម្មភាពនេះ និងបង្ហាញឱ្យបានច្បាស់ទៅកាន់ពិភពលោកថា តៃវ៉ាន់ឈរជាមួយអ៊ុយក្រែន ហើយតៃវ៉ាន់ក៏ឈរជាមួយនឹងលទ្ធិប្រជាធិបតេយ្យនិងសេរីភាពផងដែរ»៕
