អ្នកវិភាគមួយចំនួនមើលឃើញថា ការដែលក្រុមអ្នកនយោបាយជំទាស់បំបែកខ្លួនជាផ្នែកតូចៗមកបង្កើតគណបក្សថ្មីដើម្បីចូលរួមការបោះឆ្នោត អាចគ្រាន់តែជាការកំដរឆាកបក្សកាន់អំណាចប៉ុណ្ណោះ និងគ្មានឥទ្ធិពលជំរុញដល់ការស្ដារប្រព័ន្ធប្រជាធិបតេយ្យឱ្យប្រសើរឡើងវិញទេ បើពួកគេមិនរួបរួមគ្នាបង្កើតជាសំឡេងតែមួយទេនោះ។
សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណរ៉ា លើកឡើងថា ចរន្តនេះមិនមែនជាសញ្ញារីកចម្រើននៃការបើកលំហប្រជាធិបតេយ្យ ឬសេរីភាពនៃការបញ្ចេញមតិខាងនយោបាយទេ តែជាឱកាសពង្រឹងស្ថិរភាពអំណាចរបស់គណបក្សកាន់អំណាច។
លោកថា៖ «ដោយឡែក វាជាឱកាសរបស់គណបក្សប្រជាជនកម្ពុជាអាចបន្តពង្រឹងអំណាចរបស់ខ្លួន ហើយណាមួយរក្សានូវភាពឈ្នះលើអ្នកនយោបាយផ្សេងៗ ដែលជាស្ថិរភាពសម្រាប់អ្នកនយោបាយជំនាន់ថ្មីរបស់គណបក្សកាន់អំណាច»។
លោកថា ដើម្បីជំរុញឱ្យមានការស្ដារប្រព័ន្ធប្រជាធិបតេយ្យឡើងវិញ លុះណាតែអ្នកនយោបាយនៅក្រៅរដ្ឋាភិបាលទាំងនោះអាចរួមគ្នាជាសំឡេងតែមួយបាន ហើយទាមទារឱ្យធ្វើកំណែទម្រង់ប្រព័ន្ធបោះឆ្នោតជាមុន។
លោកថា៖ «បើគាត់គ្មានការស្រុះស្រួលគ្នាដាក់លក្ខខណ្ឌទៅរដ្ឋាភិបាល ឬគណៈកម្មាធិការជាតិរៀបចំការបោះឆ្នោត ឬសហគមន៍អន្តរជាតិ ឱ្យអន្តរាគមន៍ទៅលើប្រព័ន្ធបោះឆ្នោតទេ មានស្អីទៅប្រកួតជាមួយបក្សកាន់អំណាច? ហើយមានលទ្ធភាពស្អីទៅដណ្ដើមអាសនៈពីគណបក្សកាន់អំណាច? វាអត់មាន! បើយើងមើលតាមទិដ្ឋភាពហ្នឹង»។
អ្នកស្រាវជ្រាវនៅវិទ្យាស្ថានខ្មែរសម្រាប់ប្រតិបត្តិការនិងសន្តិភាព លោក វណ្ណ ប៊ុនណា ហៅចរន្តចាកចេញមកបង្កើតគណបក្សថ្មីរបស់ក្រុមអ្នកនយោបាយប្រឆាំងនេះ ជាសញ្ញាបែកបាក់មួយ ដើម្បីតែកំដរបក្សកាន់អំណាចនៅអាណត្តិខាងមុខទៀត បើពួកគេមិនអាចរួមគ្នាបាន។
លោកថា៖ «អ្វីដែលគណបក្សតូចៗដែលគាត់ចេញមកបង្កើតបក្សច្រើន ចូលរួមបោះឆ្នោតច្រើនសព្វថ្ងៃនេះ វាគ្រាន់តែកំដរគណបក្សប្រជាជនទេ។ ការបើកលំហប្រជាធិបតេយ្យ វាអាស្រ័យលើគណបក្សប្រជាជន ថាគាត់ត្រូវបើកប៉ុន្មានតាមយុទ្ធសាស្ត្ររបស់គាត់»។
លោកមើលឃើញថា បើទោះបីគណបក្សភ្លើងទៀន ដែលជាអតីតគណបក្សសមរង្ស៊ី ហាក់មានកម្លាំងគាំទ្រច្រើននៅមូលដ្ឋានក៏ពិតមែន ប៉ុន្តែថាសំឡេងនេះមិនអាចប្ដូរគោលនយោបាយបក្សកាន់អំណាចបានទេ ។
លោកថា៖ «ព្រោះគណបក្សប្រជាជនគាត់គិតថា អាហ្នឹងជាការបើកឱ្យមានលំហប្រជាធិបតេយ្យ ដែលធ្វើឱ្យគេមើលឃើញថាកម្ពុជាមានការបោះឆ្នោតដោយត្រឹមត្រូវ [..] បើទោះបីគណបក្សភ្លើងទៀនមានប្រជាប្រិយភាពមែន តែវាមិនទាន់ដល់កម្រិតប្រកួតប្រជែង ឬគ្រោះថ្នាក់ដល់អំណាចគណបក្សប្រជាជនទេ»។
យ៉ាងណា អ្នកនាំពាក្យគណបក្សភ្លើងទៀន លោក ថាច់ សេដ្ឋា ច្រានចោលការលើកឡើងនេះ។
លោកថា៖ «អ្នកដែលធ្វើទេ ដែលគេបម្រើរាស្ត្រពិតប្រាកដ គេនៅជាមួយប្រជាពលរដ្ឋពិតប្រាកដ ត្រឹមតែមេឃុំចៅសង្កាត់ហ្នឹងក៏គេអាចជួយប្រជាពលរដ្ឋបានដែរ។ ហើយអ្នកដែលអត់បានធ្វើអីសោះ ហើយលើកឡើងថាគ្រាន់តែជាអ្នកកំដរ អ្នកហ្នឹងឯងដែលកំដរ»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ចាត់ទុកការចេញមកបង្កើតគណបក្សថ្មីរបស់អតីតមន្ត្រីបក្សប្រឆាំង ជាសិទ្ធិដែលមានធានាដោយរដ្ឋធម្មនុញ្ញ។
នាយកប្រតិបត្តិអង្គការអភិវឌ្ឍន៍ផ្នត់គំនិត លោកបណ្ឌិត សេក សុជាតិ មើលឃើញថា បើអ្នកនយោបាយអះអាងថាជាអ្នកប្រជាធិបតេយ្យដូចគ្នា តែបែរជាធ្វើការមិនចុះសម្រុងគ្នានោះ ជាសារបង្ហាញថា ពួកគេខ្វះភាពគំរូក្នុងការផ្ដល់ទំនុចចិត្តដល់ប្រជាពលដ្ឋដែលចង់បានលទ្ធិប្រជាធិបតេយ្យពិតប្រាកដនៅកម្ពុជា។
បើតាមសេចក្ដីប្រកាសរបស់ក្រសួងមហាផ្ទៃជាបន្តបន្ទាប់ បច្ចុប្បន្នមានគណបក្សថ្មីចំនួន៨ដែលកើតចេញពីស្ថាបនិកអតីតមន្ត្រីបក្សប្រឆាំង ក្នុងនោះមាន គណបក្សខ្មែរស្រឡាញ់ជាតិ គណបក្សកែទម្រង់កម្ពុជា និងគណបក្សភ្លើងទៀន ជាដើម ខណៈគណបក្សសង្គ្រោះជាតិត្រូវបានបន្តបិទខ្ទប់ដោយសាលដីកាតុលាការកំពូល ចាប់ពីថ្ងៃទី១៦ ខែវិឆ្ឆិកា ឆ្នាំ២០១៧មក៕