កងកម្លាំងយោធារុស្ស៊ី បានចូលកាន់កាប់រោងចក្រ Zaporizhzhia ដែលជារោងចក្រថាមពលនុយក្លេអ៊ែរដ៏ធំបំផុតរបស់អឺរ៉ុបនៅភាគអាគ្នេយ៍នៃប្រទេសអ៊ុយក្រែន។ នេះបើតាមរដ្ឋបាលរដ្ឋក្នុងតំបន់ដែលបានឱ្យដឹងនៅថ្ងៃសុក្រនេះ។
ទីភ្នាក់ងារសារព័ត៌មាន Reuters បានស្រង់ការលើកឡើងរបស់អធិការកិច្ចនុយក្លេអ៊ែរអ៊ុយក្រែន តាមរយៈរដ្ឋបាលរដ្ឋក្នុងតំបន់នោះថា៖ «បុគ្គលិកប្រតិបត្តិការទាំងឡាយបច្ចុប្បន្ន កំពុងតែត្រួតពិនិត្យស្ថានភាពនៃថាមពលក្នុងរោងចក្រ»។
អ៊ុយក្រែនបានឱ្យដឹងថា រោងចក្រថាមពលមួយនេះ ដំបូងឡើយត្រូវបានវាយប្រហារដោយកងកម្លាំងរុស្ស៊ីនៅព្រឹកព្រលឹមថ្ងៃសុក្រ ដោយបានបង្កឱ្យទីតាំងហ្វឹកហាត់កម្ពស់៥ជាន់ដែលនៅជាប់នឹងរោងចក្រនេះមួយកន្លែងរងការឆាបឆេះ។
ជាមួយគ្នានេះ រដ្ឋមន្ត្រីក្រសួងថាមពលអាមេរិក អ្នកស្រី Jennifer Granholm ក៏បានឱ្យដឹងនៅថ្ងៃព្រហស្បតិ៍ម្សិលមិញថា រ៉េអាក់ទ័រនៅរោងចក្រថាមពល Zaporizhzhia គឺត្រូវបានការពារដោយរចនាសម្ព័ន្ធទប់ស្កាត់ដ៏រឹងមាំ ហើយក៏កំពុងតែត្រូវបានបិទដោយសុវត្ថិភាពផងដែរ។
អ្នកស្រីបន្ថែមថា ខ្លួនក៏បានជជែកជាមួយរដ្ឋមន្ត្រីថាមពលរបស់អ៊ុយក្រែន ដើម្បីធ្វើបច្ចុប្បន្នភាពអំពីស្ថានភាពនៅរោងចក្រនេះផងដែរ។
គួរបញ្ជាក់ថា ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេះ បានចាប់ផ្តើមកើនឡើងខ្លាំង ខណៈរុស្ស៊ីបន្តព្យាយាមដាក់សម្ពាធមកលើអ៊ុយក្រែនតាមរយៈការចលនាទ័ពរបស់ខ្លួនចូលមកឈ្លានពានប្រទេសមួយនេះ៕
