សមត្ថកិច្ចរាជធានីភ្នំពេញ បានចាប់ខ្លួនក្រុមកូដករណាហ្គាវើលដ៍ជិត២០០នាក់ដាក់ចូលរថយន្ត និងបញ្ជូនទៅទុកចោលនៅមណ្ឌលចត្តាឡីស័ក ក្នុងខណ្ឌព្រែកព្នៅ នៅរសៀលថ្ងៃចន្ទនេះ ខណៈពួកគេបន្តចេញធ្វើកូដកម្មជាថ្មីទៀតនៅមុខក្រុមហ៊ុន។
កូដករក្រុមហ៊ុនណាហ្គាវើលដ៍ កញ្ញា សៀក បញ្ញា និយាយថា ក្រោយពីក្រុមកូដករធ្វើចត្តាឡីស័កតាមការណែនាំរបស់ក្រសួងសុខាភិបាលប្រហែល១សប្ដាហ៍កន្លងទៅនេះ ពួកគេបាននាំគ្នាបន្តធ្វើកូដកម្មជាថ្មីទៀតនៅមុខក្រុមហ៊ុនណាហ្គាវើលដ៍ទី២ នៅប្រហែលម៉ោង១កន្លះ។ ប៉ុន្តែត្រូវបានសមត្ថកិច្ចនិងកងសន្តិសុខខណ្ឌ ចុះរារាំងនិងចាប់បញ្ជូនពួកគេជិត២០០នាក់ (១៧៩នាក់ ក្នុងនោះស្រី១៥២នាក់) ដាក់ក្នុងរថយន្តដឹកយកទៅទុកចោលនៅមណ្ឌលចត្តាឡីស័ក ក្នុងខណ្ឌព្រែកព្នៅ នារសៀលថ្ងៃទី៧ ខែមីនានេះ ខណៈពួកគេបន្តចេញធ្វើកូដកម្មជាថ្មីទៀតនៅមុខក្រុមហ៊ុន។
កញ្ញានិយាយថា៖ «ពួកខ្ញុំអត់មានខុសអីទេ ពួកខ្ញុំដើរតាមនីតិវិធីផ្លូវច្បាប់ ទាំងក្រសួងការងារ ទាំងក្រសួងសុខាភិបាល ខ្ញុំគោរពតាមទាំងអស់ ប៉ុន្តែដល់ពេលខ្ញុំចប់ធ្វើចត្តាឡីស័កហើយ ពួកខ្ញុំចេញមកទាមទារឱ្យក្រុមហ៊ុនណាហ្គាវើលដ៍ គាត់បែរជាប្រើអាជ្ញាធរមកចាប់ពួកខ្ញុំមកព្រែកព្នៅ។ សួរថាចាប់ពួកខ្ញុំធ្វើអ្វីទៀត? ហើយចាប់ពួកខ្ញុំយកមកទម្លាក់ចោលហាលក្ដៅ និយាយរួម ពួកគាត់ធ្វើមកលើ[យើង] យកព្រៃផ្សៃហ្មង»។
កូដករម្នាក់ទៀត អ្នកស្រី ម៉ៅ គឹមឡាយ មានប្រសាសន៍ថា ដើមចមដែលនាំឱ្យកូដករនាំគ្នាធ្វើកូដកម្មជាថ្មីទៀតនៅរសៀលថ្ងៃចន្ទនេះ ដោយសារតែពួកគេបានអនុវត្តវិធានសុខាភិបាលរួចហើយ។ ប៉ុន្តែអ្នកស្រីចាត់ទុកការចាប់ខ្លួនក្រុមកូដករថា ជាការបំបិទសិទ្ធិសេរីភាពក្នុងការជួបជុំដោយសន្តិវិធី ផ្ទុយនឹងច្បាប់ជាតិនិងសន្ធិសញ្ញាអន្តរជាតិ។
ទោះជាបែបនេះក្ដី កូដកររូបនោះបញ្ជាក់ថា ក្រុមកូដករមិនខ្លាចញញើតនឹងការចាប់ខ្លួននោះទេ ដោយសារពួកគេធ្វើកូដកម្មដោយសន្តិវីធីស្របតាមច្បាប់។
អ្នកស្រីមានប្រសាសន៍ថា៖ «ចេះតែចាប់ ហើយចង… ម៉េចមិនព្រមដោះស្រាយឱ្យគ្នា អត់អាណិតខ្មែរដូចគ្នាទេអី? គ្មានខ្លាចបន្តិចទេ បើខ្លាច គេមិនចេញពីផ្ទះទៅទេ។ យើងត្រូវតែទៅ ដើម្បីឆ្នាំងបាយយើង ធ្វើអ្វីដើម្បីយុត្តិធម៌»។
វីអូឌី មិនអាចសុំការបំភ្លឺពីស្នងការនគរបាលរាជធានីភ្នំពេញ លោក ស ថេត និងអ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា បានទេ នៅរសៀលថ្ងៃចន្ទនេះ។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត យល់ឃើញថា ការនាំខ្លួនកូដករក្នុងថ្ងៃចន្ទជាថ្មីទៀតនេះ គឺជាយុទ្ធសាស្រ្ដដដែលៗ។ ករណីនេះ លោកថា មិនអាចដោះស្រាយបញ្ចប់វិវាទរវាងក្រុមហ៊ុន និងក្រុមកូដករណាហ្គាវើលដ៍បាននោះទេ។
លោកបានបន្តទៀតថា៖ «រឿងនេះកើតឡើងដោយសារវិវាទការងារ អ៊ីចឹងក្រសួងការងារនិងស្ថាប័នពាក់ព័ន្ធត្រូវធ្វើអន្តរាគមន៍យ៉ាងម៉េច ដើម្បីឱ្យក្រុមហ៊ុនណាហ្គាវើលដ៍ជាមួយក្រុមកូដករចរចាគ្នា ដើម្បីបញ្ចប់វិវាទការងារហ្នឹង បានបញ្ចប់រឿងហ្នឹងបាន»។
កាលពីថ្ងៃ២៤ ខែកុម្ភៈ អង្គការសមាគមចំនួន៥១ស្ថាប័នដែលចេញសេចក្ដីថ្លែងការណ៍រួម លើកឡើងថា មួយរយៈមកនេះ កូដករណាហ្គាវើលដ៍ ដែលភាគច្រើនជាស្ត្រី បានរងនូវអំពើហិង្សា ការបៀតបៀនផ្លូវភេទ រួមទាំងការប្រើវិធានសុខាភិបាលមិនត្រឹមត្រូវពីសំណាក់អាជ្ញាធរដែលចុះទប់ស្កាត់ការធ្វើកូដកម្មដោយអហិង្សា។
ពួកគេចាត់ទុកទង្វើរបស់អាជ្ញាធរថា បានអនុវត្តផ្ទុយទៅនឹងអនុវត្តអនុសញ្ញា ស៊ី-ដ ដែលតម្រូវឱ្យរដ្ឋជាសមាជិកធានាពេញលេញនូវសិទិ្ធសេរីភាពជួបជុំ ការបញ្ចេញមតិ គ្មានការរំលោភបំពាន និងតាមដានត្រួតពិនិត្យ ឬចាប់ពិរុទ្ធ។ ប៉ុន្តែត្រូវបានរដ្ឋបាលរាជធានីភ្នំពេញច្រានចោលការចោទប្រកាន់នេះ។
ក្រោយមក នៅថ្ងៃទី២៥ ខែកុម្ភៈ អង្គការឃ្លាំមើលសិទ្ធិមនុស្សអន្តរជាតិ (Human Rights Watch) បានចេញសេចក្ដីថ្លែងការណ៍ថា កន្លងមក ក្រុមកូដករជាច្រើននាក់ដែលចូលរួមកូដកម្មបានអនុវត្តតាមវិធានការសុខាភិបាលត្រឹមត្រូវ ដោយពាក់ម៉ាស់ រក្សាគម្លាតពីគ្នា និងបានធ្វើតេស្ត កូវីដ-១៩ ថែមទៀត។ តែអាជ្ញាធរបានរុញច្រាននិងចាប់ខ្លួនកូដករបញ្ចូលក្នុងរថយន្តក្រុងទាំងបង្ខំ ដើម្បីយកទៅធ្វើតេស្តរកជំងឺកូវីដ-១៩ ក្រោមហេតុផលថា បំពានវិធានសុខាភិបាល ហើយបានឃុំខ្លួនពួកគេនៅកន្លែងមណ្ឌលចត្តាឡីស័កដោយគ្មានអនាម័យសមរម្យ និងមិនបានផ្ដល់ទឹកសម្រាប់ឱ្យពួកគេបរិភោគ ជាដើម។
អង្គការឃ្លាំមើលសិទ្ធិមនុស្សចាត់ទុកការចោទប្រកាន់របស់អាជ្ញាធរទៅលើក្រុមកូដករថាបានបំពានវិធានការកូវីដ-១៩នោះថា ធ្វើឡើងដោយមិនសមហេតុផលឡើយ ហើយករណីនេះគ្រាន់តែជារឿងបិទបាំងចំពោះការបញ្ឈប់កូដកម្មរបស់កូដករក្រុមហ៊ុនណាហ្គាវើលដ៍ពីសំណាក់អាជ្ញាធរតែប៉ុណ្ណោះ។
កូដករណាហ្គាវើលដ៍បានចេញតវ៉ាជាថ្មីទៀតចាប់ពីថ្ងៃទី២៨ ខែធ្នូ ឆ្នាំ២០២១មក ក្រោយពីថៅកែរបស់ខ្លួនបានបញ្ឈប់បុគ្គលិកជាង១ ៣០០នាក់ ដែលភាគច្រើនពួកគេជាថ្នាក់ដឹកនាំសហជីព។ ក្រុមកូដករទាំងនោះអះអាងថា ការបញ្ឈប់នេះ ថៅកែធ្វើឡើងដោយមិនអនុលោមតាមច្បាប់ស្តីពីការងារនោះទេ។ ប៉ុន្តែវិវាទដែលបានអូសបន្លាយជាង២ខែមកនេះ ជំរុញឱ្យថ្នាក់ដឹកនាំសហជីពជាច្រើននាក់ត្រូវបានចាប់ឃាត់ខ្លួន ក្នុងនោះមេដឹកនាំនិងសកម្មជនសហជីព ១១នាក់កំពុងជាប់ពន្ធនាគារ៕