ការិយាល័យរបស់លោកនាយករដ្ឋមន្ត្រី បូរីស ចនសុន (Boris Johnson) បានឱ្យដឹងថា ចក្រភពអង់គ្លេសនឹងផ្ដល់ថវិកាចំនួន១០០លានដុល្លារអាមេរិក (ស្មើនឹង៧៥,៦លានផោន) តាមរយៈធនាគារពិភពលោកដល់អ៊ុយក្រែន ដើម្បីជួយកាត់បន្ថយសម្ពាធហិរញ្ញវត្ថុដែលប្រទេសមួយនេះជួបប្រទះ ដោយសារតែការឈ្លានពានរបស់រុស្ស៊ី។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
គួរបញ្ជាក់ថា ចក្រភពអង់គ្លេសបានខិតខំធ្វើសកម្មភាពជាច្រើនក្នុងការឆ្លើយតបជាអន្តរជាតិ ចំពោះការលុកលុយរបស់រុស្ស៊ីលើអ៊ុយក្រែន ដែលរួមមានការផ្ដល់ជំនួយផ្នែកយោធា ការជំរុញឱ្យមានការដាក់ទណ្ឌកម្មធ្ងន់ធ្ងរបន្ថែមទៀតលើរុស្ស៊ី និងផ្ដល់ការគាំទ្រផ្នែកហិរញ្ញវត្ថុផងដែរ។
យោងតាមអាជ្ញាធរអង់គ្លេស បានឱ្យដឹងថា ការផ្ដល់ជូននៅពេលនេះដែលបន្ថែមពីលើថវិកាចំនួន២៩០,៩៥លានដុល្លារអាមេរិក (ស្មើនឹង២២០លានផោន) ដែលត្រូវបានសន្យាកាលពីពេលកន្លងទៅរួចហើយនោះ អាចត្រូវបានប្រើប្រាស់ដើម្បីទូទាត់ដល់បុគ្គលិកក្នុងវិស័យសាធារណៈក្នុងប្រទេសអ៊ុយក្រែន ឬសម្រាប់ផ្នែកសន្តិសុខសង្គម។
ទាក់ទិននឹងករណីនេះ លោក បូរីស ចនសុន បានបន្ថែមថា៖ «ស្របពេលដែលប្រជាពលរដ្ឋក្នុងប្រទេសអ៊ុយក្រែនកំពុងតែរងនូវការឈឺចាប់ ការផ្ដល់មូលនិធិថ្មីនៅពេលនេះនឹងបន្តជួយដល់អ្នកដែលប្រឈមមុខនឹងស្ថានភាពមនុស្សធម៌កាន់តែធ្ងន់ធ្ងរនៅក្នុងប្រទេស»។
ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេះ បានចាប់ផ្ដើមកើនឡើងខ្លាំង ខណៈរុស្ស៊ីបន្តព្យាយាមដាក់សម្ពាធមកលើអ៊ុយក្រែន តាមរយៈការចលនាទ័ពរបស់ខ្លួនចូលមកកាន់ប្រទេសមួយនេះ។
ជាការឆ្លើយតប សហភាពអឺរ៉ុប និងបណ្ដាប្រទេសមួយចំនួនផ្សេងទៀត ក៏បានសម្រេចដាក់ទណ្ឌកម្មជាបន្តបន្ទាប់លើរុស្ស៊ីផងដែរ ពោលគឺបន្ទាប់ពីការប្រកាសសង្រ្គាមមួយដោយប្រធានាធិបតី លោក វ្លាឌីមៀរ ពូទីន៕
