យោងតាមសារព័ត៌មាន Sputnik ក្នុងប្រទេសបេឡារុស បានរាយការណ៍ឱ្យដឹងថា គណៈប្រតិភូរុស្ស៊ីមួយក្រុមបានចេញដំណើរមកកាន់ប្រទេសបេឡារុស ជាកន្លែងដែលខ្លួននឹងជួបជាមួយក្រុមមន្រ្តីចរចាអ៊ុយក្រែន សម្រាប់កិច្ចចរចាលើកទី៣។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
កាលពីសប្ដាហ៍មុន ភាគីទាំងពីរបានយល់ព្រមគ្នាក្នុងបើកច្រករបៀងមនុស្សធម៌ ដើម្បីអនុញ្ញាតឱ្យជនស៊ីវិលចេញពីតំបន់ប្រយុទ្ធមួយចំនួនក្នុងប្រទេសអ៊ុយក្រែន ប៉ុន្តែគិតរហូតមកដល់ពេលនេះ គ្មានច្រកណាមួយអាចដំណើរការបាននោះទេ ដោយភាគីទាំង២បានចោទប្រកាន់គ្នាទៅវិញទៅមកថាបានរំលោភលើបទឈប់បាញ់ក្នុងតំបន់។
ទោះជាយ៉ាងណា ក្រសួងការពារជាតិរុស្ស៊ី បានឱ្យដឹងនៅថ្ងៃចន្ទនេះថា យោធារបស់ខ្លួននឹងផ្អាកការបាញ់ប្រហារ ហើយអនុញ្ញាតឱ្យមានច្រករបៀងមនុស្សធម៌នៅក្នុងទីក្រុងជាច្រើនរបស់អ៊ុយក្រែន រួមទាំងរដ្ឋធានីកៀវ (Kyiv) ផងដែរ។ រុស្ស៊ីបានបើកការឈ្លានពានទ្រង់ទ្រាយធំរបស់ខ្លួនមកលើអ៊ុយក្រែនតាមផ្លូវគោក ផ្លូវអាកាស និងសមុទ្រ ដែលធ្វើឡើងបន្ទាប់ពីការប្រកាសសង្រ្គាមមួយដោយប្រធានាធិបតីរុស្ស៊ី លោក វ្លាឌីមៀរ ពូទីន ហើយក្នុងនោះមនុស្សរាប់ម៉ឺននាក់ក៏បានព្យាយាមរត់ភៀសខ្លួនចេញជាបន្តបន្ទាប់ ស្របពេលដែលមានការផ្ទុះនិងស្នូរកាំភ្លើងក្នុងទីក្រុងធំៗមួយចំនួនផងដែរ៕
