សហរដ្ឋអាមេរិកនៅថ្ងៃពុធម្សិលមិញ បានប្រកាសអបអរសាទរដល់លោក Yoon Suk-yeol ដែលត្រូវបានបោះឆ្នោតជ្រើសរើសជាប្រធានាធិបតីថ្មីរបស់កូរ៉េខាងត្បូង និងលើកឡើងថា ប្រធានាធិបតីរបស់ខ្លួន លោក ចូ បៃឌិន បានត្រៀមខ្លួនរួចជាស្រេចក្នុងការធ្វើការងាររួមគ្នា ដើម្បីពង្រីកកិច្ចសហប្រតិបត្តិការជិតស្និទ្ធរវាងប្រទេសទាំងពីរ។
ទីភ្នាក់ងារសារព័ត៌មាន Reuters បានស្រង់សម្ដីអ្នកនាំពាក្យសេតវិមានមួយរូបដែលបានថ្លែងថា៖ «យើងសូមធ្វើការអបអរសាទរដល់ប្រធានាធិបតីជាប់ឆ្នោតថ្មី លោក Yoon Suk-yeol។ សម្ព័ន្ធភាពរវាងសហរដ្ឋអាមេរិក និងកូរ៉េខាងត្បូង សេដ្ឋកិច្ច និងប្រជាជនរបស់យើង គឺពិតជាមានសារៈសំខាន់។ លោកប្រធានាធិបតី ចូ បៃឌិន ត្រៀមខ្លួនរួចជាស្រេចក្នុងការបន្តធ្វើការងារជាមួយប្រធានាធិបតីជាប់ឆ្នោតថ្មី ដើម្បីពង្រីកកិច្ចសហប្រតិបត្តិការជិតស្និទ្ធរបស់ប្រទេសទាំងពីរបន្ថែមទៀត»។
ប្រភពដដែលបន្តថា លោកប្រធានាធិបតី ចូ បៃឌិន ក៏ត្រូវបានរំពឹងថានឹងទាក់ទងទៅកាន់លោក Yoon Suk-yeol ដើម្បីផ្ដល់ការអបអរសាទររបស់ខ្លួនដោយផ្ទាល់ផងដែរ។
I spoke today with President-elect Yoon Suk-yeol of the Republic of Korea to congratulate him on his election. I look forward to working with him to continue to strengthen the U.S.-ROK Alliance and take on shared global challenges. pic.twitter.com/mJScMNK3Np
— President Biden (@POTUS) March 10, 2022
គួរបញ្ជាក់ថា លោក Yoon Suk-yeol ត្រូវបានជាប់ឆ្នោតជាប្រធានាធិបតីនៅក្នុងការបោះឆ្នោតជ្រើសរើសប្រធានាធិបតី នៅថ្ងៃពុធ ក្នុងប្រទេសកូរ៉េខាងត្បូង ខណៈដែលបេក្ខជនមកពីគណបក្សកាន់អំណាច លោក Lee Jae-myung ក៏បានទទួលស្គាល់នូវលទ្ធផលនេះ ហើយអបអរសាទរដល់គូប្រជែងរបស់ខ្លួនផងដែរ។
ទាក់ទិននឹងករណីនេះ អ្នកវិភាគនានារំពឹងថា ការជាប់ឆ្នោតជាប្រធានាធិបតីរបស់លោក Yoon Suk-yeol ក៏អាចនឹងពន្លឿនដំណោះស្រាយទាក់ទងនឹងការបន្តអភិវឌ្ឍមីស៊ីលផ្លោង និងអាវុធនុយក្លេអ៊ែររបស់កូរ៉េខាងជើង បន្ទាប់ពីអតីតប្រធានាធិបតី លោក Moon Jae-in លើកទឹកចិត្តឱ្យមានការសន្ទនាជាមួយទីក្រុងព្យុងយ៉ាង៕
