ប្រជាពលរដ្ឋក្នុងតំបន់ Mae Sariang តាមដងទន្លេ Salween ក្នុងខេត្ត Mae Hong Son ប្រទេសថៃ ដែលមានព្រំប្រទល់ជាប់ប្រទេសមីយ៉ាន់ម៉ា បាននិងកំពុងចែករំលែករឿងរ៉ាវដ៏រន្ធត់របស់ពួកគេដែលកើតឡើង បន្ទាប់ពីមានរដ្ឋប្រហារយោធានៅមីយ៉ាន់ម៉ាគិតចាប់តាំងពីខែកុម្ភៈ ឆ្នាំ២០២១។
Salween គឺជាទន្លេតូចមួយដែលកាត់ផ្ដាច់តំបន់ខាងលើនេះពីមីយ៉ាន់ម៉ាដែលមានការប្រយុទ្ធគ្នា។
ទោះជាយ៉ាងណា សហគមន៍មូលដ្ឋាននៅតាមបណ្ដោយព្រំដែននេះ ត្រូវបានរាយការណ៍ថា នៅតែត្រូវរងផលប៉ះពាល់ដោយការប្រយុទ្ធគ្នា ខណៈដែលការរាយការណ៍ពីបញ្ហាសុខភាពផ្លូវចិត្តរបស់ប្រជាជនក៏បានកើនឡើងគួរឱ្យកត់សម្គាល់ផងដែរ។
អ្នកភូមិទាំងឡាយមានការភ្ញាក់ផ្អើលជាខ្លាំង នៅពេលដែលខ្លួនឃើញទ្រព្យសម្បត្តិនិងផ្ទះសម្បែងរបស់ពួកគេរងការវាប្រហារដោយគ្រាប់កាំភ្លើង ខណៈដែលអ្នកខ្លះទៀតហាក់ទម្លាប់ទៅនឹងការចំណាយពេលពេញមួយថ្ងៃរស់នៅក្រោមដីទៅហើយ រាល់ពេលដែលពួកគេឮសំឡេងនៃការប្រយុទ្ធគ្នា។
ជាមួយគ្នានេះ អ្នកភូមិមួយចំនួនដែលកាន់សាសនាគ្រិស្ត ក៏បានប្រើប្រាស់វិធីសាស្រ្តក្នុងការរក្សាចិត្តឱ្យស្ងប់និងសន្តិភាពនៅក្នុងព្រះវិហារ ដោយគេចចេញពីការពិតនិងភាពមិនច្បាស់លាស់ដែលពួកគេរស់នៅផងដែរ។
នៅក្នុងបទសម្ភាសន៍ជាមួយសារព័ត៌មាន A24 News ម្ចាស់ផ្ទះមួយរូប លោកស្រី Masaw ដែលរស់នៅក្នុងសហគមន៍ Tha Ta Fung ថ្លែងថា៖ «មានពេលមួយនោះ ខ្ញុំបានរត់ទៅលាក់ខ្លួននៅក្នុងព្រៃ ដើម្បីរង់ចាំឱ្យការប្រយុទ្ធគ្នាបញ្ចប់ទៅ។ បន្ទាប់មក ខ្ញុំត្រលប់មកផ្ទះវិញ ដោយឃើញជញ្ជាំងផ្ទះរបស់ខ្ញុំរងការធ្លុះធ្លាយដោយគ្រាប់កាំភ្លើងជាច្រើនកន្លែង។ វាអាចនិយាយបានថា ខ្ញុំមានសំណាងដែរនៅពេលនោះ ព្រោះថាប្រសិនបើគ្រាប់កាំភ្លើងបាញ់ត្រូវចំធុងសាំងដែលខ្ញុំដាក់នៅក្បែរទ្វារ នោះផ្ទះរបស់ខ្ញុំនឹងត្រូវឆាបឆេះអស់ជាក់ជាមិនខាន»។
ស្រ្តីម្នាក់រស់នៅក្នុងសហគមន៍ដូចគ្នានេះ ដែលមានបញ្ហាសុខភាពផ្លូវចិត្ត អ្នកស្រី Masaba បានលើកឡើងថា៖ «ចាប់តាំងពីមានការរំខានដែលបានកើតមានឡើងនៅតាមព្រំដែនថៃ-មីយ៉ាន់ម៉ាមក ខ្ញុំមានអារម្មណ៍ថា ខ្លួនដូចជាកំពុងរស់នៅក្នុងស្ថានភាពមិនច្បាស់លាស់មួយ។ ខ្ញុំត្រូវតែមានការប្រុងប្រយ័ត្នជាប់ជានិច្ច ដោយត្រូវបើកភ្នែកចាំតាមដានស្ថានការណ៍២៤ម៉ោងក្នុងមួយថ្ងៃ»។
អ្នកស្រីបន្ថែមថា៖ «ខ្ញុំត្រូវមានការប្រយ័ត្នប្រយែងរាល់ពេលដែលដើរនៅក្នុងភូមិ ឬសូម្បីតែនៅពេលដែលកំពុងដេកនៅក្នុងផ្ទះរបស់ខ្ញុំក៏ដោយ។ នៅពេលមួយដែលខ្ញុំបានឮសំឡេងគ្រាប់បែក រូបខ្ញុំ រួមនឹងសមាជិកគ្រួសារទាំងអស់របស់ខ្ញុំនៅពេលនោះ ត្រូវប្រញាប់ចូលទៅកាន់ទីតាំងក្រោមដីដើម្បីសុវត្ថិភាព»។
ជាមួយគ្នានេះ ស្ត្រីចំណាស់មួយរូប លោកស្រី Siri Samajitarporn ដែលជាទីប្រឹក្សារបស់ព្រះវិហារសាសនាគ្រិស្តក្នុងសហគមន៍ Tha Ta Fung ដែលប្រើប្រាស់ជំនឿដើម្បីរំងាប់ចិត្ត និងរក្សាសតិស្មារតីរបស់ខ្លួន បានលើកឡើងថា៖ «ដោយសារតែយើងដឹងថា ព្រះនឹងជួយយើងយ៉ាងពិតប្រាកដ។ យើងជឿលើព្រះគម្ពីរ ដែលក្នុងនោះមានផ្នែកមួយបានចែងថា ប្រសិនបើយើងរងទុក្ខ នោះព្រះនឹងជួយដល់យើង។ ដូច្នេះហើយ យើងកសាងទំនុកចិត្តនៅក្នុងចិត្តរបស់យើង។ រាល់ពេលដែលយើងមានអារម្មណ៍ថាភ័យខ្លាច យើងធ្វើការអធិដ្ឋាន ហើយអានគម្ពីរ ដើម្បីធ្វើឱ្យចិត្តយើងស្ងប់»៕