នាវាកងកម្លាំងស្វ័យការពារជើងទឹកជប៉ុនចំនួន២គ្រឿង បានចូលចតនិងធ្វើទស្សនកិច្ចនៅកំពង់ផែស្វយ័តក្រុងព្រះសីហនុ នៅថ្ងៃអង្គារនេះ ដើម្បីហឹ្វកហ្វឺនពង្រឹងកិច្ចសហប្រតិបត្តិការ និងលើកកម្ពស់សមត្ថភាពកងទ័ពជើងទឹកទាំងពីរ។
រដ្ឋមន្ត្រីក្រសួងការពារជាតិ លោក ទៀ បាញ់ បានថ្លែងក្នុងពិធីសំណេះសំណាលជាមួយនាយ នាយរង និងពលនាវិកកងស្វ័យការពារជើងទឹកជប៉ុន នាព្រឹកថ្ងៃអង្គារនេះថា កងស្វ័យការពារជើងទឹកជប៉ុនបានចូលចតកំពង់ផែស្វយ័តក្រុងព្រះសីហនុ ដើម្បីធ្វើទស្សនកិច្ចនៅប្រទេសកម្ពុជាជាលើកដំបូង ក្នុងរយៈពេលបីឆ្នាំកន្លងមកនេះ ដោយចាប់ផ្ដើមពីថ្ងៃទី១៥ ដល់១៧ ខែមីនា ឆ្នាំ២០២២។
លោក ទៀ បាញ់ បន្តថា កម្ពុជា-ជប៉ុន នៅឆ្នាំនេះ គឺជាឆ្នាំគម្រប់ខួបលើកទី៣០ នៃការបញ្ជូនកងរក្សាសន្ដិភាពរបស់ជប៉ុនមកបំពេញបេសកកម្មនៅកម្ពុជា រួមទាំងបញ្ជូនកងរក្សាសន្ដិភាពរបស់ជប៉ុនចេញក្រៅប្រទេសជាលើកដំបូងបំផុតរបស់ខ្លួន។
បន្ថែមពីនេះ លោកថា ជប៉ុននឹងបង្កើនចំនួននាវាកងទ័ពស្វ័យការពារជើងទឹក សូមចូលចតកំពង់ផែស្វយ័តក្រុងព្រះសីហនុកាន់តែច្រើន ដើម្បីហ្វឹកហាត់រួមគ្នាលើកកម្ពស់សមត្ថភាព លើជំនាញជួយសង្គ្រោះគ្រោះមហន្ដរាយ ប្រយុទ្ធប្រឆាំងភេរវកម្ម និងវិស័យមនុស្សធម៌ រវាងប្រទេសទាំងពីរផងដែរ។
នាវាកងស្វ័យការពារជើងទឹកជប៉ុនមានចំនួន២គ្រឿង ដែលនាវាទីមួយមានឈ្មោះ URAGA មាននាវិកចំនួន១២៦នាក់ និងនាវា HIRADO មាននាវិកចំនួន៤៥នាក់។
ចាប់ពីឆ្នាំ២០០៨-២០២២ កងស្វ័យការពារជើងទឹកជប៉ុនចូលទស្សនកិច្ចនៅកំពង់ផែស្វយ័ត ក្រុងព្រះសីហនុ ចំនួន៩លើក ដោយមាននាវាសរុបចំនួន២៤គ្រឿង រួមទាំងលើកនេះ ដើម្បីពង្រឹងកិច្ចសហប្រតិបតិ្តការលើគ្រប់វិស័យរវាងកងទ័ពជើងទឹកប្រទេសទាំងពីរឱ្យកាន់តែប្រសើរឡើង និងរីកចម្រើនថែមទៀត៕