ប្រជាពលរដ្ឋមួយចំនួនយល់ឃើញថា ការចាក់វ៉ាក់សាំងដូសជំរុញ (ដូសទី៤) នៅតែសំខាន់ ទោះបីអ្នកនោះធ្លាប់ឆ្លងជំងឺកូវីដរួចហើយក្តី។
ពលរដ្ឋមួយរូបរស់នៅរាជធានីភ្នំពេញ លោក ធឿន សំណាង ជាអ្នកធ្លាប់ឆ្លងជំងឺកូវីដ-១៩ និងទើបព្យាបាលជាសះស្បើយកាលពីពេលថ្មីៗនេះ បានថ្លែងថា លោកធ្លាប់បានចាក់វ៉ាក់សាំងចំនួន៣ដូស រួចមកហើយ មុនពេលលោកឆ្លងជំងឺមួយនេះ។
លោកសង្កេតឃើញថា ទោះបីជាប្រពលរដ្ឋដែលបានចាក់វ៉ាក់សាំងការពារជំងឺកូវីដ-១៩ហើយក្តី តែលទ្ធភាពនៃការឆ្លងវីរុសនេះនៅតែមានដដែល ប្រសិនបើមិនបានការពារឱ្យបានត្រឹមត្រូវនោះទេ។
លោក សំណាង បាននិយាយថា៖ «ខ្ញុំនៅតែចង់ចាក់ដូសទី៤ទៀត ព្រោះនេះជាសម័យផ្ទុកដោយមេរោគកូវីដបំប្លែងថ្មីច្រើនជាបន្តបន្ទាប់ ចឹងដើម្បីរក្សាសុវត្ថិភាពសុខភាពរបស់ខ្លួនឯងផ្ទាល់ផង គ្រួសារ និងមនុស្សជុំវិញខ្លួនផង»។
ពលរដ្ឋរូបនេះបានលើកឡើងថា លោកបានចំណាយពេលព្យាបាលជំងឺកូវីដ-១៩ នៅផ្ទះត្រឹមតែមួយសប្តាហ៍ប៉ុណ្ណោះ។ លោកគិតថា ការណ៍ដែលលោកព្យាបាលជាសះស្បើយលឿនបែបនេះ ក៏ដោយសារលោកមានជំនួយពីវ៉ាក់សាំងដែលលោកបានចាក់កន្លងមក។
រីឯយុវជនម្នាក់ទៀត ដែលមានទីលំនៅស្ថិតក្នុងស្រុកស្រែអំបិល ខេត្តកោះកុង បានថ្លែងដោយសុំមិនបញ្ចេញឈ្មោះថា លោកធ្លាប់បានឆ្លងជំងឺកូវីដ-១៩ បើទោះបីជាលោកបានចាក់វ៉ាក់សាំងចំនួនពីរដងរួចមកហើយក្តី។ បើតាមយុវជនរូបនេះ មកទល់ពេលនេះលោកបានចាក់វ៉ាក់សាំងដូសជំរុញរួចមកហើយៗ នឹងទទួលវ៉ាក់សាំងដូសទី៤ ក្នុងពេលឆាប់ៗនេះផងដែរ។
យុវជនរូបនេះបាននិយាយថា៖ «ខ្ញុំនៅតែចង់ចាក់វ៉ាក់សាំងដូសជំរុញ ទោះបីចាក់ហើយនៅតែឆ្លងក៏ដោយ តែខ្ញុំជឿថា វានឹងជួយបង្កើតអង់ទីគ័របន្ថែមក្នុងខ្លួនខ្ញុំ»។
លោកបន្ថែមថា៖ «កាលដែលខ្ញុំកើតកូវីដ-១៩ហ្នឹង គឺស្ថិតក្នុងកម្រិតស្រាលទេ ប៉ុន្តែពេលនោះនៅតាមខេត្តមិនអនុញ្ញាតឱ្យមានការព្យាបាលខ្លួនឯងនៅតាមផ្ទះឡើយ ដូចនេះខ្ញុំត្រូវតែទៅមណ្ឌលសុខភាពព្យាបាលតាមទីតាំងដែលបានកំណត់»។
ផ្ទុយពីយុវជនខាងលើ ពលរដ្ឋមួយរូបនៅភ្នំពេញ លោក តាំង សុងហេង ដែលធ្លាប់វិជ្ជមានកូវីដ-១៩ចំនួនពីរលើករួចមកហើយនោះ លោកហាក់បីដូចជាអស់ជំនឿលើវ៉ាក់សាំងការពារជំងឺកូវីដ-១៩ទៅហើយ ព្រោះលោកបានចាក់វ៉ាក់សាំងរួចហើយ ប៉ុន្តែនៅតែឆ្លងម្ដងហើយម្ដងទៀត។
លោក សុង ហេង មានប្រសាសន៍ថា៖ «ខ្ញុំចាក់វ៉ាកសាំងបាន២ដូស កើតកូវីដម្តង ចាក់លើកទី៣ កើតកូវីដម្តងទៀត មើលទៅឥឡូវមិនបាច់ទៅចាក់ដូសទី៤ទេដឹង បើចាក់ហើយនៅតែកើតដដែលៗ»។
ទន្ទឹមនឹងនេះលោក សុង ហេង បានឱ្យដឹងថា ថ្មីៗនេះ លោកឧស្សាហ៍ជាប់ពាក់ព័ន្ធនឹងអ្នកវិជ្ជមានកូវីដ-១៩ដោយផ្ទាល់ ប៉ុន្តែនៅពេលដែលលោកធ្វើតេស្តរហ័ស (Rapid test) លើកណាក៏មិនដែរវិជ្ជមានទៀតឡើយ ជាហេតុធ្វើឲ្យលោកមានការងឿងឆ្ងល់ផងដែរ។
រដ្ឋលេខាធិការក្រសួងសុខាភិបាល លោកស្រី ឱ វណ្ណឌីន បានចេញមកបញ្ជាក់ជាថ្មី កាលពីថ្ងៃទី១០ ខែមីនាថា ចំពោះអ្នកដែលកំពុងឆ្លងវីរុសកូវីដ-១៩ មិនចាំបាច់ទៅចាក់វ៉ាក់សាំងភ្លាមៗទេ ប៉ុន្តែត្រូវចាក់ដូសជំរុញបន្ថែមទៀត បន្ទាប់ពីជាសះស្បើយបានយ៉ាងហោចណាស់ចំនួន ៤ខែឡើងទៅ។
លោកស្រី ឱ វណ្ណឌីន មានប្រសាសន៍ថា៖ «ឥឡូវបច្ចុប្បន្ននេះយើងសង្កេតឃើញថា បងប្អូនយើងមួយចំនួនដែលគាត់កំពុងតែឆ្លងឬក៏បានឆ្លងនូវវីរុសអូមីក្រុងនេះហើយ វាជាការពិតដែលពួកគាត់មិនមានភាពចាំបាច់អីនៅក្នុងការចាក់នៅដូសជំរុញទេ»។
លោកស្រីវេជ្ជបណ្ឌិតបន្តថា៖ «ប៉ុន្តែនៅពេលដែលបងប្អូនជា [ជំងឺកូវីដ-១៩] បានបួនខែឡើងលើ គឺជាពេលវេលាមួយដែលបងប្អូនចាំបាច់ត្រូវមកទទួលយកនូវវ៉ាក់សាំងកូវីដ-១៩នេះ»។
ផ្ទុយទៅវិញ ប្រធានសមាគមគ្រូពេទ្យគុណធម៌កម្ពុជា លោកវេជ្ជបណ្ឌិត អ៊ូច វុទ្ធី លើកឡើងថាចំពោះអ្នកដែលធ្លាប់វិជ្ជមានវីរុសកូវីដ-១៩ គួរណាត្រូវបានពិនិត្យអង់ទីគ័រជាមុនសិនមុននឹងទទួលនូវដូសជំរុញ។
លោកវេជ្ជបណ្ឌិត អ៊ូច វុទ្ធី បានមានប្រសាសន៏ថា៖ «ប្រសិនបើគាត់ជាពីជំងឺកូវីដ-១៩ ហើយទៅចាក់វ៉ាក់សាំងដូសជំរុញដោយមិនពិនិត្យអង់ទីគ័រទេ គាត់ក៏មិនមានហានិភ័យអីទេ តែវ៉ាក់សាំងនោះដូចជាទឹកអ៊ីចឹង ព្រោះអ្នកឈឺ [ជំងឺកូវីដ-១៩] ហើយជាវិញ គឺភាគច្រើនមានអង់ទីគ័រធម្មជាតិ»។
លោកវេជ្ជបណ្ឌិតបានកត់សម្គាល់ថា កន្លងមក លោកសង្កេតឃើញថា គ្រូពេទ្យចាក់វ៉ាក់សាំងនៅកន្លែងមួយចំនួនមិនមានការពិនិត្យ ឬសួរនាំអ្នកមកចាក់វ៉ាក់សាំងឲ្យបានត្រឹមត្រូវនោះទេ ពោលគឺចូលចាក់ៗតែម្ដង ដោយមិនមានការសួរនាំព័ត៌មានផ្ទាល់ខ្លួន ឬប្រវត្តិស្ថានភាពសុខភាពអ្វីទេ។
គួរបញ្ជាក់ផងដែរថា ការចាក់វ៉ាក់សាំងបង្ការជំងឺកូវីដ-១៩ បានក្លាយជាកាតព្វកិច្ចសម្រាប់ប្រជាពលរដ្ឋខ្មែរ ជាពិសេស គឺមន្ត្រីរាជការ និងបុគ្គលមួយចំនួនដែលមានការប្រឈមនឹងហានិភ័យខ្ពស់ ហើយគិតមកទល់ពេលនេះលទ្ធផលចាក់វ៉ាក់សាំងធៀបនឹងចំនួនប្រជាជនសរុប ១៦លាននាក់ មាន ៩២,២៧% ឯណោះ៕
