នាយករដ្ឋមន្ត្រីជំរុញឱ្យគ្រូពេទ្យកម្ពុជាបង្កើនកិច្ចសហការជាមួយអ្នកជំនាញវេជ្ជសាស្ត្របុរាណចិន ដើម្បីចាប់យកជំនាញផលិតឱសថបុរាណប្រឆាំងកូវីដ-១៩ ខណៈអ្នកជំនាញវេជ្ជសាស្ត្រចិនចំនួន១២នាក់ត្រូវបានបញ្ជូនមកជួយវិស័យសុខាភិបាលនៅកម្ពុជា ក្រោមជំនួយឥតសំណង។
ក្នុងពិធីសម្ពោធដាក់ឱ្យប្រើប្រាស់មន្ទីរពេទ្យកម្ពុជា-ចិន ព្រះកុសុមៈ ហៅពេទ្យលោកសង្ឃ នាថ្ងៃចន្ទនេះ លោកនាយករដ្ឋមន្ត្រី ហ៊ុន សែន ថ្លែងថា ចិនក្រៅពីផ្ដល់ជំនួយឥតសំណងជួយកសាងមន្ទីរពេទ្យនេះ ក៏បានបញ្ជូនអ្នកជំនាញផ្នែកឱសថបុរាណព្យាបាលជំងឺកូវីដ-១៩ ចំនួន១២នាក់ ដើម្បីមកជួយពង្រឹងសមត្ថភាពវិស័យសុខាភិបាលកម្ពុជាផងដែរ។
លោកថា៖ «ឥលូវក្រុមគ្រូពេទ្យបានមកដល់កម្ពុជា ត្រូវសហការជាមួយគាត់ ហើយគាត់អាចផ្ទេរបច្ចេកវិទ្យាសម្រាប់យើងទៅថ្ងៃក្រោយនៃការផលិត»។
លោកបញ្ជាក់ថា ឱសថបុរាណចិនប្រឆាំងជំងឺកូវីដ-១៩ ត្រូវបានគេប្រើប្រាស់យ៉ាងទូលំទូលាយនៅក្នុងប្រទេសចិន រួមទាំងប្រទេសដែលមានសេដ្ឋកិច្ចជឿនលឿន។
ក្រៅពីនេះ លោក ហ៊ុន សែន ក៏បានជំរុញឱ្យពន្លឿនការកសាងរោងចក្រផលិតវ៉ាក់សាំង តបតាមការសន្យារបស់ចិនកន្លងទៅផងដែរ។
បើតាមលោកនាយករដ្ឋមន្ត្រី ហ៊ុន សែន មន្ទីរពេទ្យកម្ពុជា-ចិន ព្រះកុសុមៈ ជាជំនួយឥតសំណងរបស់ចិនដែលមានទំហំទឹកប្រាក់៨៥លានដុល្លារ។
ក្រៅពីនេះ លោកថា ចិនក៏បានជួយកសាងមន្ទីរពេទ្យ កម្ពុជា-ចិន មួយទៀត នៅខេត្តត្បូងឃ្មុំ ជាប់ព្រំដែនវៀតណាម ដែលជាជំនួយឥតសំណងដូចគ្នា ក្នុងទំហំទឹកប្រាក់ប្រមាណជា៥០លានដុល្លារ៕