ជប៉ុនបន្តគាំទ្រការផ្គត់ផ្គង់អគ្គិសនីប្រកបដោយនិរន្តរភាពនៅតាមតំបន់ជនបទដាច់ស្រយាលក្នុងប្រទេសកម្ពុជា ដើម្បីផ្ដល់អគ្គិសនីដល់ប្រជាជនចំនួន១ ៣០០គ្រួសារ ដែលវាជាគម្រោងរវាង UNDP និងក្រសួងរ៉ែ និងថាមពល។
សេចក្ដីប្រកាសព័ត៌មានរួមមួយកាលពីម្សិលមិញ បានឱ្យដឹងថា ស្ថានទូតជប៉ុន និងកម្មវិធីអភិវឌ្ឍន៍សហប្រជាជាតិ (UNDP) បានចុះហត្ថលេខាលើកិច្ចព្រមព្រៀងថ្មីមួយ ក្រោមវត្តមានលោកនាយករដ្ឋមន្ត្រី ហ៊ុន សែន និងលោក គីស៊ីដា ហ្វូមិអុ (Kishida Fumio) នាយករដ្ឋមន្ត្រីនៃប្រទេសជប៉ុន នៅឯវិមានសន្តិភាព លើគម្រោង “ការទទួលបានថាមពលកកើតឡើងវិញប្រកបដោយបរិយាបន្ននៅតំបន់ជនបទ” កាលពីថ្ងៃទី២០ ខែមីនា ឆ្នាំ២០២២។
គម្រោងនេះនឹងផ្ដល់អត្ថប្រយោជន៍ដល់ប្រជាជនចំនួន១ ៣០០គ្រួសារឱ្យទទួលបានដោយផ្ទាល់នូវការប្រើប្រាស់ថាមពលស្អាតដែលមានតម្លៃសមរម្យ និងអាចទុកចិត្តបាន ហើយគម្រោងនេះដែលមានគំនិតផ្ដួចផ្ដើមនិងត្រូវបានអនុវត្តដោយ UNDP និងក្រសួងរ៉ែ និងថាមពល។
ប្រភពដដែលបន្តថា សហគមន៍ដែលទទួលបានផលប្រយោជន៍ពីគម្រោងនេះ ស្ថិតនៅលើដីកោះដាច់ស្រយាលនៃផ្ទៃបឹងទន្លេសាប ខេត្តកំពង់ឆ្នាំង និងនៅលើទន្លេមេគង្គ នៃខេត្តក្រចេះ និងខេត្តស្ទឹងត្រែង ព្រមទាំងនៅទីជនបទដែលទើបតែសម្អាតមីនរួចនាពេលថ្មីៗនេះ ក្នុងខេត្តបាត់ដំបង បន្ទាយមានជ័យ ឧត្ដរមានជ័យ និងតំបន់ដាច់ស្រយាលរបស់ខេត្តរតនគិរី។
គួរកត់សម្គាល់ដែរថា ការប្រើប្រាស់ថាមពលនៅប្រទេសកម្ពុជាក្នុងរយៈពេលពីរទសវត្សរ៍កន្លងទៅនេះ គឺមានកំណើនការផ្គត់ផ្គង់អគ្គិសនីយ៉ាងខ្លាំងក្លា ដែលមានការកើនឡើងពី ៦,៦% នៅឆ្នាំ២០០០ ទៅ ៩៧,៥៣% នៅឆ្នាំ២០២១៕