អ្នកកាសែតម្នាក់បានស្នើពន្យារពេលចូលបំភ្លឺចំពោះមុខតុលាការ ក្រោយរងបណ្ដឹងពាក់ព័ន្ធនឹងការផ្សាយរឿងដឹកឈើនៅឃុំស្វាយប៉ោ ស្រុកសង្កែ ខេត្តបាត់ដំបង កាលពី២ខែមុន។
ព្រះរាជអាជ្ញារងនៃអយ្យការអមសាលាដំបូងខេត្តបាត់ដំបង លោក សេង ផានិត បានចេញដីកាកោះហៅលោក លឹម ផល្លី អ្នករាយការណ៍ព័ត៌មានឱ្យទូរទស្សន៍អនឡាញ អ៊ិលអេសអ៊ិន (LSN) ឱ្យចូលខ្លួនបំភ្លឺនៅថ្ងៃទី២២ ខែមីនានេះ ទៅតាមបណ្ដឹងរបស់ឈ្មោះ ហេង វណ្ណដា ក្រោមបទចោទ «បរិហារកេរ្តិ៍ជាសាធារណៈ និងផ្សាយព័ត៌មានមិនពិត»។
អ្នករាយការណ៍ព័ត៌មានឱ្យទូរទស្សន៍អនឡាញ អ៊ិលអេសអ៊ិន (LSN) លោក លឹម ផល្លី ប្រាប់ វីអូឌី នៅថ្ងៃអង្គារនេះថា លោកបានដាក់ពាក្យស្នើសុំពន្យារពេលចូលបំភ្លឺហើយ នៅថ្ងៃនេះ ដោយសារពេលវេលាកោះហៅឱ្យចូលបំភ្លឺនោះលឿនពេក ដែលធ្វើឱ្យលោកមិនទាន់បានត្រៀមខ្លួននៅឡើយ។
អ្នករាយការណ៍ព័ត៌មានរូបនេះ អះអាងថា រូបលោករងបណ្ដឹងនេះកើតឡើងក្រោយពីលោកបានផ្សាយផ្ទាល់អំពីការដឹកជញ្ជូនឈើនៅខេត្តបាត់ដំបង កាលពីថ្ងៃទី១៦ ខែមករា ឆ្នាំ២០២២ ដែលលោកអះអាងថា លោក ហេង វណ្ណដា ជាម្ចាស់អាជីវកម្ម និងជាឈ្មួញឈើ។
លោកបន្ថែមថា៖ «យើងឃើញគាត់ [លោក ហេង វណ្ណដា] អារឈើដឹកឈើចេញចូលយ៉ាងសកម្មរាល់ថ្ងៃ នៅក្នុងខេត្តបាត់ដំបង ដល់ពេលអ្នកសារព័ត៌មានយើងទៅផ្សាយ បែរជាគាត់ប្ដឹងយើង ដោយចោទយើងថា យើងបរិហារកេរ្តិ៍ និងផ្សព្វផ្សាយព័ត៌មានមិនពិតទៅវិញ ទាំងដែលខ្ញុំមានឯកសារវីដេអូ និងរូបថតដែលគាត់ដឹកឈើច្បាស់លាស់ថែមទៀត»។
ប្រធានលេខាធិការដ្ឋានរដ្ឋបាលនៃសាលាដំបូងខេត្តបាត់ដំបង លោកស្រី ជា ច័ន្ទរស្មី មានប្រសាសន៍ថា ខាងរដ្ឋបាលមិនទាន់បានទទួលលិខិតស្នើពន្យារពេលចូលបំភ្លឺរបស់អ្នកសារព័ត៌មានរូបនោះនៅឡើយ គិតត្រឹមរសៀលថ្ងៃអង្គារនេះ។
ក្នុងឃ្លីបវីដេអូដែលឡាយ (Live) លើបណ្ដាញសង្គមហ្វេសប៊ុក កាលពីថ្ងៃទី១៦ ខែមករា លោក លឹម ផល្លី បានទៅថតសកម្មភាពនៅកន្លែងរោងម៉ាស៊ីនសិប្បកម្មកែច្នៃឈើរបស់លោក ហេង វណ្ណដា និងបានធ្វើអត្ថាធិប្បាយថា ក្នុងរោងម៉ាស៊ីនកែច្នៃឈើនោះមានឈើប្រណិតជាច្រើនត្រូវបានដឹកចូល ដូចជា ប្រភេទឈើធ្នង់ បេង សុក្រំ នាងនួន និងឈើប្រណិតផ្សេងៗទៀត ដែលលោកថា ឈើទាំងនេះជាឈើខុសច្បាប់។
ក្នុងការឡាយនោះដែរ អ្នកសារព័ត៌មានរូបនេះបានអំពាវនាវដល់អាជ្ញាធរពាក់ព័ន្ធក្នុងខេត្តបាត់ដំបង ចុះស៊ើបអង្កេត និងទប់ស្កាត់បទល្មើសខុសច្បាប់ក្នុងរោងម៉ាស៊ីនកែច្នៃឈើមួយនេះផងដែរ។
លោក លឹម ផល្លី បន្ថែមថា៖ «ម៉ាស៊ីននេះមានច្បាប់តែអារឈើស្រុកទេ ចំណែកឈើព្រៃ ដូចជា ផ្ចិក ធ្នង់ បេង នាងនួន គឺអត់មានច្បាប់ទេ! គឺបានដឹកចូលទាំងរ៉ឺម៉កៗ ជាឈើមានប្រភពមិនច្បាស់លាស់»។
ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តបាត់ដំបង លោក ឈឹម វជិរា មានប្រសាសន៍ថា រោងម៉ាស៊ីនកែច្នៃឈើរបស់លោក ហេង វណ្ណដា គឺមានច្បាប់អនុញ្ញាត ប៉ុន្តែសម្រាប់ប្រភេទឈើដែលនាំចូលវិញ លោកមិនទាន់ដឹងច្បាស់នៅឡើយ។
យ៉ាងណា លោកថា តាមការចុះពិនិត្យរបស់មន្ត្រីជំនាញកន្លងមក រាល់ឈើដែលដឹកចូលដេប៉ូ និងសិប្បកម្មកែច្នៃឈើក្នុងខេត្តបាត់ដំបង គឺមានលិខិតអនុញ្ញាតត្រឹមត្រូវ។
លោកបន្ថែមថា៖ «ខ្ញុំបានឱ្យជំនាញចុះពិនិត្យរួចហើយ ភាគច្រើនបើសិនជាអត់មានច្បាប់ គឺមិនអាចបើកដំណើរការបានទេ។ អ៊ីចឹងជាយោបល់ខ្ញុំ បើសិនជាអត់ច្បាប់ មិនអាចបើកកណ្ដាលក្រុងអ៊ីចឹងបានទេ»។
នាយកប្រតិបត្តិសម្ព័ន្ធអ្នកសារព័ត៌មានកម្ពុជា លោក ណុប វី មានប្រសាសន៍ថា មួយរយៈចុងក្រោយនេះ អ្នកសារព័ត៌មានបានជួបបញ្ហាប្រឈមច្រើន ទាំងអ្នករាយការណ៍រឿងទំនាស់ដីធ្លី រឿងព្រៃឈើ និងការគំរាមកំហែងលើអ្នកសារព័ត៌មានដែលរាយការណ៍អំពីការតវ៉ារបស់បុគ្គលក្រុមហ៊ុនណាហ្គាវើលដ៍ ជាដើម ខណៈកម្ពុជាកំពុងខ្វះខាតនូវយន្តការការពារដល់កិច្ចការរបស់អ្នកសារព័ត៌មាន។
ទោះយ៉ាងណា លោកថា ក្នុងករណីមានការប្ដឹងឬចោទប្រកាន់លើអ្នកសារព័ត៌មាន តុលាការគួរយកច្បាប់ស្ដីពីរបបសារព័ត៌មានមកជំនុំជម្រះ ឬកាត់ក្ដីលើសំណុំរឿងរបស់ពួកគេ។
លោកបន្ថែមថា៖ «បើករណីប្ដឹងផ្ដល់នេះ ដោយសារតែអ្នកសារព័ត៌មានបានផ្សព្វផ្សាយមានភាពខ្វះខាត យើងគួរតែស្នើឱ្យមានការកែតម្រូវជាជាងការដាក់ពាក្យបណ្ដឹងនេះ។ ដូចខ្ញុំបានលើកឡើងអ៊ីចឹង ការប្រើប្រាស់ច្បាប់ស្ដីពីរបបសារព័ត៌មាននេះ គឺរឿងសំខាន់ណាស់ ដើម្បីធានាអំពីសិទ្ធិ និងសេរីភាពរបស់អ្នកសារព័ត៌មាន ដែលពួកគាត់ធ្វើដោយពុំមានការបំភិតបំភ័យ ការប្ដឹងផ្ដល់ ឬការប្ដឹងពួកគាត់»។
កាលពីថ្ងៃទី៣០ ខែមករា ឆ្នាំ២០២២ សមាគមសម្ព័ន្ធអ្នកសារព័ត៌មានកម្ពុជា (ខេមបូចា) បានចេញរបាយការណ៍មួយដោយរកឃើញថា រយៈពេល៣ខែចុងឆ្នាំ២០២១ អ្នកសារព័ត៌មានចំនួន១២នាក់ នៅតាមបណ្ដារាជធានី-ខេត្តមួយចំនួន ដូចជា នៅរាជធានីភ្នំពេញ ខេត្តព្រះវិហារ កោះកុង និងកំពត ត្រូវបានតុលាការចោទប្រកាន់ពី «បទញុះញង់ឱ្យប្រព្រឹត្តបទឧក្រិដ្ឋជាអាទិ៍ និងបរិហារបង្កាច់កេរ្តិ៍»។
របាយការណ៍ដដែលនេះចាត់ទុកករណីនេះថា សិទ្ធិសេរីភាព និងការបញ្ចេញមតិរបស់អ្នកសារព័ត៌មាននៅតែបន្តរំលោភបំពានពីសំណាក់អ្នកមានលុយនិងមានអំណាច ស្របពេលវប្បធម៌និទណ្ឌភាពនៅតែបន្តកើតមាន៕