ជំនួបចរចារកដំណោះស្រាយរវាងកូដករនិងតំណាងក្រុមហ៊ុនណាហ្គាវើលដ៍ ក្រោមការសម្របសម្រួលពីមន្ត្រីក្រសួងការងារ នៅពុំទាន់មានលទ្ធផលជាវិជ្ជមាននៅឡើយ ខណៈនិយោជកបដិសេធពិចារណាលើជម្រើសដោះដូររវាងកម្មករដែលចង់លាឈប់ពីការងារជាមួយកម្មករដែលទាមទារចូលធ្វើការវិញ។
កាលពីល្ងាចថ្ងៃទី២១ ខែមីនា ឆ្នាំ២០២២ ម្សិលមិញ ក្រសួងការងារ និងបណ្ដុះបណ្ដាលវិជ្ជាជីវៈ បានចេញសេចក្ដីជូនដំណឹងពីវឌ្ឍនភាពនៃការដោះស្រាយវិវាទការងាររួមនៅក្រុមហ៊ុនណាហ្គាវើលដ៍ ក្រោយគូភាគីវិវាទ រួមមាន តំណាងភាគីកម្មករ និងតំណាងក្រុមហ៊ុនណាហ្គាវើលដ៍ បានមកជួបប្រជុំរកដំណោះស្រាយជាលើកទី៤។
បើតាមក្រសួងការងារ តំណាងភាគីកម្មករនិយោជិតបានស្នើក្រុមហ៊ុនល្បែងមួយនេះលើកយកចំណុចដែលបុគ្គលិកទាមទារចូលធ្វើការវិញ មកពិភាក្សាមុននឹងឈានទៅពិភាក្សាចំណុចវិវាទផ្សេងទៀត បើពុំនោះទេ ការចរចានឹងជាប់គាំង។
សេចក្ដីជូនដំណឹងដដែល បន្តថា រហូតមកដល់ពេលនេះ នៅសល់កម្មករនិយោជិតប្រហែល២០០នាក់ដែលបន្តទាមទារយកចូលធ្វើការវិញ។ ចំណែកកម្មករនិយោជិតដែលកំពុងធ្វើការប្រហែល៣០០នាក់យល់ព្រមលាឈប់ពីការងារ ដើម្បីធ្វើការដោះដូរជាមួយកម្មករនិយោជិតដែលទាមទារចូលធ្វើការវិញ។
ក្រសួងស្រង់ការលើកឡើងរបស់កម្មករថា៖ «ជម្រើសនេះអាចឱ្យនិយោជកសម្រេចគម្រោងកាត់បន្ថយបុគ្គលិករបស់ខ្លួនផង និងអាចឱ្យកម្មករនិយោជិតដែលទាមទារចូលធ្វើការវិញអាចចូលធ្វើការវិញផងដែរ ដូច្នេះ ស្នើឱ្យភាគីនិយោជកពិចារណាអំពីជម្រើសនៃការដោះដូរកម្មករនិយោជិតនេះ»។
ចំណែកតំណាងក្រុមហ៊ុនណាហ្គាវើលដ៍វិញ ត្រូវបានក្រសួងស្រង់សម្ដីមកថា ការលើកឡើងរបស់ភាគីតំណាងកម្មករនិយោជិត មានន័យហាក់ដូចជា សហជីពចង់ដើរតួជាអ្នកទទួលខុសត្រូវអំពីដំណើរការអាជីវកម្មជំនួសក្រុមហ៊ុនទៅវិញ។
ក្រសួងការងារស្រង់ការលើកឡើងរបស់ក្រុមហ៊ុន បន្តថា បច្ចុប្បន្ននេះ មានកម្មករនិយោជិតដែលកំពុងបម្រើការងារប្រហែល៦០០នាក់ ដែលចំនួននេះនៅតែលើសពីតម្រូវការជាក់ស្ដែង ដូច្នេះ ប្រសិនបើអ្នកទាំង៣០០នាក់ដែលចង់លាឈប់នោះអាចសម្រេចចិត្តដាក់ពាក្យលាឈប់បាន ហើយក្រុមហ៊ុននឹងទូទាត់ប្រាក់បំណាច់តាមការលាឈប់ពីការងារដោយស្ម័គ្រចិត្ត។
ក្រសួងការងារស្រង់ការលើកឡើងរបស់តំណាងក្រុមហ៊ុនថា៖ «ជម្រើសនៃការដោះដូររវាងកម្មករនិយោជិតដែលចង់លាឈប់ពីការងារ និងកម្មករនិយោជិតដែលទាមទារចូលធ្វើការវិញ គឺភាគីនិយោជកនឹងមិនពិចារណាទេ»។
ក្រោយពីការពិភាក្សាគ្នា ភាគីទាំងពីរបានឯកភាពកំណត់កាលបរិច្ឆេទប្រជុំបន្ទាប់នៅថ្ងៃទី២៣ ខែមីនា ឆ្នាំ២០២២។
ក្រសួងការងារ ក៏បានស្នើឱ្យភាគីទាំងពីរមានការយោគយល់គ្នាក្នុងការចូលរួមដោះស្រាយបញ្ចប់វិវាទការងារនេះ។ ក្រសួងថា ប្រសិនបើការចរចានៅតែមិនអាចមានដំណោះស្រាយបាន នីតិវិធីបន្ទាប់ គឺភាគីទាំងពីរអាចដាក់ពាក្យបណ្ដឹងទៅតុលាការ ដើម្បីរកដំណោះស្រាយចុងក្រោយ។
យ៉ាងណា កម្មករបង្ហាញការខកចិត្តដែលភាគីនិយោជកមិនជជែកពីជម្រើសនៃការដោះដូរបុគ្គលិកដែលចង់លាឈប់ពីការងារ និងបុគ្គលិកដែលទាមទារចូលធ្វើការងារវិញ ក្នុងនោះ តំណាងកម្មករនិយោជិតអះអាងថា នឹងបន្តដាក់សំណើនេះជាលាយលក្ខណ៍អក្សរទៅភាគីនិយោជក ដើម្បីទទួលបានចម្លើយបន្ថែមទៀត។
តំណាងបុគ្គលិកក្រុមហ៊ុនណាហ្គា កញ្ញា ឈឹម ស៊ីថរ ប្រាប់អ្នកសារព័ត៌មាននៅក្រោយជំនួបចរចានោះថា ប្រសិនបើភាគីនិយោជកមិនមានដំណោះស្រាយទៅនឹងសំណើដោះដូរទេ ភាគីតំណាងកម្មករនឹងមិនអាចមកចូលរួមប្រជុំបន្តទៀតទេ។
វិវាទការងារនៅក្រុមហ៊ុនល្បែងដ៏ធំនៅចំកណ្ដាលរាជធានីភ្នំពេញនេះ បានអូសបន្លាយរយៈពេលជិត១ឆ្នាំមកហើយ។ ការអូសបន្លាយនេះឈានទៅដល់ការចាប់ខ្លួនថ្នាក់ដឹកនាំនិងសកម្មជនសហជីព១១នាក់ដាក់ពន្ធនាគារជាបន្តបន្ទាប់ចាប់តាំងពីយប់ឆ្លងឆ្នាំសកលមក ដោយចោទពីបទញុះញង់ និងល្មើសច្បាប់កូវីដ-១៩ ដោយគ្រាន់តែពួកគេប្រើប្រាស់សិទ្ធិស្របច្បាប់ ធ្វើកូដកម្មអហិង្សាទាមទារឱ្យក្រុមហ៊ុនណាហ្គាវើលដ៍គោរពសិទ្ធិកម្មករនិងសហជីព។
ក្រោយមក កាលពីពេលថ្មីៗនេះ តុលាការសម្រេចដោះលែងថ្នាក់ដឹកនាំនិងសកម្មជនសហជីព១១នាក់ជាបណ្ដោះអាសន្ន ដើម្បីឱ្យពួកគេមានសេរីភាពវិញ ដើម្បីចូលរួមតុចរចាបញ្ចប់វិវាទជាមួយក្រុមហ៊ុន។ ប៉ុន្តែដោយសារតែមិនទាន់ទម្លាក់បទចោទលើអ្នកទាំង១១នាក់នោះ ក្រុមកូដករនៅតែបន្តតវ៉ាជាថ្មីទៀត ដើម្បីទាមទារទម្លាក់ចោលបទចោទ ប៉ុន្តែរហូតមកដល់ថ្ងៃអាទិត្យទី២០ ខែមីនានេះ នៅមិនទាន់មានសេចក្ដីសម្រេចតាមការទាមទាររបស់ពួកគេនៅឡើយ៕