អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានច្រានចោលទាំងស្រុងនូវព័ត៌មានដែលថាវ៉ាក់សាំងបង្ការជំងឺកូវីដ-១៩បណ្ដាលឱ្យកើតជំងឺមហារីក និងចាត់ទុកព័ត៌មានប្រតិដ្ឋនេះថាជាការរៀបចំឡើងដើម្បីបង្កឱ្យមានការយល់ច្រឡំ និងមានចេតនាបំពុលសង្គម។
ក្នុងពិធីប្រកាសបើកយុទ្ធនាការជាតិអប់រំសុខភាព ក្រោមប្រធានបទ «វីរុសកូវីដ-១៩ បំប្លែងថ្មី អូមីក្រុង ឆ្លងលឿនខ្លាំងជាងមុន អាចបង្កឱ្យមានហានិភ័យធ្ងន់ធ្ងរដល់អ្នកនិងគ្រួសារ» ដែលបានរៀបចំនៅសាលាខេត្តកំពង់ស្ពឺ កាលពីថ្ងៃទី២២ ខែមីនា ឆ្នាំ២០២២ លោកស្រី ឱ វណ្ណឌីន ថ្លែងថា ការដែលជនខិលខូចបំផុសបំផុលព័ត៌មានប្រតិដ្ឋបែបនេះ គឺមានគោលបំណងមិនចង់ឱ្យប្រជាពលរដ្ឋទៅចាក់វ៉ាក់សាំង ហើយវាជាការខុសឆ្គងធំធេងណាស់ ព្រោះអាចប៉ះពាល់ដល់សុខភាពសាធារណៈ។
លោកស្រី ឱ វណ្ណឌីន បានមានប្រសាសន៍ថា៖ «មានជនខិលខូច គាត់ដើរផ្សព្វផ្សាយថា ចាក់វ៉ាក់ទៅ វាបង្កើតទៅជាជំងឺមហារីកឈាម វាបង្កើតទៅជាមហារីកកោសិកា ដែលវាខុសពីលក្ខណៈបច្ចេកទេសត្រឹមត្រូវពិតប្រាកដ»។
លោកស្រីបន្តថា៖ «ការដែលមានពាក្យប្រតិដ្ឋបំផុសចលនាបន្តុះបង្អាប់មិនឱ្យបងប្អូនទៅចាក់វ៉ាក់សាំង គឺជាការខុសឆ្គងធំណាស់ គឺជាការបង្កឱ្យមានគ្រោះមហន្តរាយដល់បងប្អូនផ្ទាល់ខ្លួនផង បង្កមហាអន្តរាយទៅដល់សុខភាពសាធារណៈ ក៏ដូចជាបង្កមហន្តរាយដល់សង្គមជាតិរបស់យើង»។
លោកស្រី ឱ វណ្ណឌីន បានឱ្យដឹងទៀតថា តាមការតាមដានរបស់គណៈកម្មការចំពោះកិច្ចការចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស (គវក១៩) ជាទូទៅ គឺមានផលរំខានតិចតួចចំពោះមនុស្សមួយចំនួន ដូចជា ការឈឺដៃត្រង់កន្លែងចាក់ ការឈឺសាច់ដុំ និងការក្ដៅខ្លួន ជាដើម។
យុវនារីមួយរូបមានទីលំនៅស្ថិតក្នុងស្រុកស្រែអំបិល ខេត្តកោះកុង កញ្ញា សុខ គីមឡេង បានឱ្យដឹងថា កញ្ញាបានចាក់វ៉ាក់សាំងបង្ការជំងឺកូវីដ-១៩ ចំនួន៣ដូស រួចមកហើយ។ មកទល់ពេលនេះ កញ្ញាមានសុខភាពល្អជាធម្មតា រួមទាំងមិនធ្លាប់វិជ្ជមានកូវីដ-១៩ម្ដងណាឡើយ។
កញ្ញា សុខ គីមឡេង បាននិយាយថា៖ «ខ្ញុំបានចាក់វ៉ាក់សាំងចំនួន៣លើកមកហើយ ឃើញថាមានអាការឈឺក្បាល ក្ដៅខ្លួន និងអស់កម្លាំងនៅលើក ប៉ុន្តែត្រឹមមួយយប់ប៉ុណ្ណោះ។ ហើយមកទល់ពេលនេះ សុខភាពខ្ញុំល្អណាស់ មិនមានការប្រឈមនូវបញ្ហាប៉ះពាល់ដូចពាក្យប្រតិដ្ឋដែលអ្នកមួយចំនួនបានលើកឡើងឡើយ»។
ពលរដ្ឋមួយរូបរស់នៅរាជធានីភ្នំពេញ លោក ស៊ឹម ចាន់សំណាង បានលើកឡើងថា លោកបានចាក់វ៉ាក់សាំងចំនួន៤ដូសរួចមកហើយ ក្នុងនោះ ៣ដូសដំបូងមិនមានការធ្វើទុក្ខអ្វីសោះ ប៉ុន្តែដូសទី៤ ធ្វើឱ្យលោកមានអាការក្ដៅខ្លួនរយៈពេល៤ថ្ងៃជាប់ៗគ្នា ប៉ុន្តែវាក៏មិនមានផលប៉ះពាល់អ្វីធ្ងន់ធ្ងរជាងនេះ ឬបណ្ដាលឱ្យមានជំងឺអ្វីឡើយ។
លោកថា៖ «ការលើកឡើងថា វ៉ាក់សាំងបង្ការជំងឺកូវីដ-១៩ បណ្ដាលឱ្យកើតជំងឺមហារីកនេះ ខ្ញុំអត់ទទួលស្គាល់ទេ មិនមែនជាព័ត៌មានពិតទេ! ហើយការផ្ដល់ព័ត៌មានបែបនេះ គឺមានផលប៉ះពាល់ច្រើនដល់សង្គមជាតិ ធ្វើឱ្យប្រជាជនរបស់យើងមានការភ័យខ្លាចមិនចង់ទៅទទួលវ៉ាក់សាំង»។
គួរបញ្ជាក់ផងដែរថា នេះមិនមែនជាលើកទី១ទេដែលក្រសួងសុខាភិបាលបានចេញមកច្រានចោលនូវព័ត៌មានក្លែងក្លាយនេះ។
គិតត្រឹមថ្ងៃទី២២ ខែមីនា ឆ្នាំ២០២២ ការចាក់វ៉ាក់សាំងបង្ការជំងឺកូវីដ-១៩នៅកម្ពុជា ធៀបនឹងចំនួនប្រជាជនសរុប១៦លាននាក់ មាន ៩២,៤៦% ហើយ៕