អង្គការទស្សនៈពិភពលោក (World Vision) បានរៀបចំកម្មវិធី«អំណានឮៗ» នៅព្រឹកថ្ងៃសៅរ៍នេះ ដើម្បីគាំទ្រទិវាអំណានជាតិ លើកកម្ពស់វប្បធម៌អានរបស់កុមារ និងដើម្បីកៀរគរថវិកាសម្រាប់ទិញសៀវភៅអាននិងកសាងបណ្ណាល័យនៅតាមសាលារៀនគោលដៅមួយចំនួនក្នុងស្រុកជាំក្សាន្ត ស្រុករវៀង និងស្រុកឆែប ខេត្តព្រះវិហារ។
ព្រឹត្តិការណ៍អំណានឮៗនេះ ធ្វើឡើងនៅ ODOM Garden នារាជធានីភ្នំពេញ ចាប់ពីម៉ោង៩ព្រឹក រហូតដល់ម៉ោង៥ល្ងាច ថ្ងៃទី២៦ ខែមីនា ឆ្នាំ២០២២។
ប្រធានក្រុមបច្ចេកទេសកម្មវិធីអប់រំ លោក វ៉ា សុរិន នៃអង្គការទស្សនៈពិភពលោក (World Vision) មានប្រសាសន៍ថា ការវិនិយោគលើការអានជាពិសេសសម្រាប់កុមារពិតជាមានសារៈសំខាន់ណាស់។
លោក សុរិន្ទ មានប្រសាសន៍ថា៖ «សៀវភៅ គឺជាឃ្លាំងផ្ទេរចំណេះដ៏សំខាន់បំផុតមួយសម្រាប់សិស្សានុសិស្សសិក្សាស្រាវជ្រាវ និងស្វែងយល់អំពីមុខវិជ្ជាផ្សេងៗ តាំងពី វប្បធម៌ និងមុខវិជ្ជាវិទ្យាសាស្ត្រផ្សេងទៀត។ សមត្ថភាពរបស់សិស្សានុសិស្សនៅតែពឹងផ្អែកយ៉ាងខ្លាំងក្លាលើការអាន និងមើលសៀវភៅដោយខ្លួនឯងនៅពេលទំនេរពីម៉ោងសិក្សា។ ការស្រាវជ្រាវបានរកឃើញថា ការអានសៀវភៅជាប្រចាំធ្វើឱ្យមានការចងចាំល្អ មានអារម្មណ៍តានតឹងតិច និងមានការផ្ចង់អារម្មណ៍ក្នុងការងារបានល្អ ជាងអ្នកដែលមិនអានសៀវភៅជាប្រចាំ»។
ប្រធានគ្រប់គ្រងថវិកាក្នុងស្រុក នៃអង្គការទស្សនៈពិភពលោក កញ្ញា ហៀម ចិត្រា មានប្រសាសន៍ថា តាមរយៈព្រឹត្តិការណ៍ អំណានឮៗ សាធារណៈជនអាចចូលរួមលើកកម្ពស់វប្បធម៌អាននៅកម្ពុជា។ កញ្ញាចង់ឃើញឪពុកម្តាយគ្រប់រូប ចាប់ផ្ដើមបណ្តុះបណ្តាលកុមារតូចៗ ឱ្យមានសមត្ថភាពអានប្រសើរឡើង និងបណ្តុះចំណេះពួកគេឱ្យក្លាយជាធនធានមនុស្សពោរពេញដោយសក្ដានុពល ដែលអាចជួយដល់ការអភិវឌ្ឍរបស់ប្រទេសជាតិ។
កញ្ញា ចិត្រា លើកឡើងថា៖ «ប្រជាពលរដ្ឋទាំងអស់គ្នាសុទ្ធតែអាចរួមចំណែកលើកស្ទួយបំណិនអំណានរបស់កុមារ។ លោកអ្នកអាចចាប់ផ្ដើមបណ្ដុះបំណិនអំណានដល់កុមារតូចៗជុំវិញខ្លួន ឬចូលរួមជាមួយអង្គការទស្សនៈពិភពលោក និងកម្មវិធីអំណានឮៗតាមរយៈការបរិច្ចាគជាថវិកា ឬសៀវភៅដើម្បីជាផ្នែកមួយជួយទៅដល់កុមារដែលកំពុងជួបភាពខ្វះខាតនៅតំបន់ ដែលអង្គការទស្សនៈពិភពលោកធ្វើការជាមួយ»។
កញ្ញា ចិត្រា បន្ថែមថា៖ «យើងសង្ឃឹមថា ថវិកានិងសម្ភារៈដែលយើងកៀរគរបានពីកម្មវិធីនេះ នឹងជួយដល់កុមារនៅតាមជនបទឱ្យមានឱកាសទទួលបានសៀវភៅអាន និងអភិវឌ្ឍបំណិនអានរបស់ខ្លួន»។
តាមសេចក្តីប្រកាសព័ត៌មានរបស់អង្គការទស្សនៈពិភពលោក (World Vision) កាលពីថ្ងៃទី២៥ មីនា ដោយអំពាវនាវឱ្យប្រជាពលរដ្ឋដែលចង់ចូលរួមបរិច្ចាគសៀវភៅ ឬជាថវិកា ចំនួន៣ដុល្លារ មកកាន់អង្គការទស្សៈពិភពលោក តាមរយៈគណនីលេខ ABA: 000 880 848 ដើម្បីជួយគាំទ្រដល់កម្មវិធីនេះ៕
