ពលរដ្ឋប្រហែលជាង ១០០នាក់ មកពីសហគមន៍ចំនួន៣ នៃស្រុកបូទុមសាគរ និងស្រុកស្រែអំបិល ខេត្តកោះកុង បានប្រមូលផ្តុំគ្នាមុខក្រសួងមហាផ្ទៃ នៅថ្ងៃចន្ទនេះ ដើម្បីរកអន្តរាគមន៍ និងឆ្លើយបំភ្លឺពាក់ព័ន្ឋរឿងជម្លោះដីធ្លីជាមួយនឹង លោក ហេង ហ៊ុយ មន្ត្រីនគរបាលពាក់ផ្កាយពីរ និងជាមានងារជាឧកញ៉ា។
អ្នកស្រី ដេត ហួរ ដែលអះអាងថា តំណាងសហគមន៍១៩៧ បានឱ្យដឹងថា សហគមន៍ទាំង៣ដែលទៅប្រមូលផ្តុំនៅមុខក្រសួងនោះ រួមមាន សហគមន៍១៩៧ សហគមន៍ព្រលាន និងសហគន៍៧៦៦។ អ្នកស្រីបន្តថា តំណាង១៣នាក់របស់សហគមន៍១៩៧ ត្រូវឆ្លើយបំភ្លឺតាមនៅក្រសួងមហាផ្ទៃនៅថ្ងៃនេះ ជុំវិញបណ្តឹងរបស់ពលរដ្ឋដែលប្តឹងឧកញ៉ា ហេង ហ៊ុយ ពាក់ព័ន្ធជម្លោះដីធ្លី ស្ថិតក្នុងភូមិតានី និងភូមិឈូក ឃុំជីខលើ ស្រុកស្រែអំបិល ខេត្តកោះកុង ខណៈសហគមន៍ព្រលាន ទៅដាក់ញត្តិដើម្បីសុំអន្តរាគមន៍ឱ្យជួយដោះស្រាយដីធ្លី និងសហគមន៍ផ្សេងទៀតមកគាំទ្រអ្នករងគ្រោះដីធ្លីដូចគ្នា។
ចាប់តាំងពីពាក់កណ្ដាលឆ្នាំ២០១៩មក ក្រុមពលរដ្ឋ១៩៧គ្រួសារ បានឡើងមកតវ៉ានៅរាជធានីភ្នំពេញ ដើម្បីរកអន្តរាគមន៍ពីក្រសួងរៀបចំដែនដី ជួយដោះស្រាយវិវាទដីធ្លីរបស់ពួកគាត់ ដោយអះអាងថា ក្រុមហ៊ុន ហេង ហ៊ុយ បានរំលោភយកដីពួកគាត់តាំងពីឆ្នាំ២០០៧ ប៉ុន្តែការចោទនេះ ត្រូវបានលោក ហេង ហ៊ុយ ច្រានចោល និងបានប្តឹងតំណាងពលរដ្ឋទៅតុលាការផងដែរ។
គិតមកទល់ពេលនេះ មានតំណាងពលរដ្ឋ១០នាក់ហើយ ដែលជាប់បណ្តឹងនៅតុលាការ ក្រោមការប្តឹងរបស់លោក ហេង ហ៊ុយ ដោយពលរដ្ឋទាំងនោះរងការចោទពីបទ «បរិហារកេរ្តិ៍ និងញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»៕
