អង្គការសិទ្ធិមនុស្សលីកាដូ បានសំដែងការព្រួយបារម្ភចំពោះរដ្ឋាភិបាលកម្ពុជា ដែលបានបើកឱ្យមានដំណើរការស្មុំកូនអន្តរប្រទេសឡើងវិញ។
សេចក្តីថ្លែងការណ៍របស់អង្គការសិទ្ធិមនុស្សលីកាដូ នៅថ្ងៃទី២៩ ខែមីនានេះ បានលើកឡើងថា ការបើកឱ្យមានដំណើរការស្មុំកូនឡើងវិញនេះ នឹងនាំឱ្យគ្រួសារជាច្រើន ត្រូវបែកបាក់ និងមិនអាចជួបជុំគ្នាវិញបាន ដោយសារប្រព័ន្ធគ្រប់គ្រងនៅទន់ខ្សោយ និងមិនទាន់បានការពារផលប្រយោជន៍ល្អបំផុតរបស់កុមារកន្លងមក។
សេចក្តីថ្លែងការណ៍បានសរសេរថា៖ «យើងខ្ញុំមានការព្រួយបារម្ភយ៉ាងខ្លាំង ចំពោះរាជរដ្ឋាភិបាលដែលបើកដំណើរការស្មុំកូនអន្តរប្រទេសឡើងវិញ និងការបង្ហាញច្បាស់ៗពីរដ្ឋាភិបាលប្រទេសអ៊ីតាលីថា ការស្មុំកូនពីប្រទេសកម្ពុជាយ៉ាងតិចចំនួនប្រាំបួន ដែលអាចកើតមានឡើង គឺកំពុងត្រូវបានដំណើរការដោយទីភ្នាក់ងារស្មុំកូនជនជាតិអ៊ីតាលី។ យើងខ្ញុំព្រួយបារម្ភថា ការសម្រេចចិត្តទាំងនេះ នឹងនាំឱ្យគ្រួសារជាច្រើនទៀត ត្រូវបែកបាក់មិនអាចជួបជុំគ្នាវិញបាន ដោយប្រព័ន្ធគ្រប់គ្រងនៅទន់ខ្សោយនេះ ដែលមិនទាន់បានការពារផលប្រយោជន៍ល្អបំផុតរបស់កុមារកន្លងមក»។
កុមារកម្ពុជាចំនួន ៣ ៦៩៦នាក់ ត្រូវបានរដ្ឋាភិបាលរាយការណ៍ថា បានបញ្ជូនទៅក្រៅប្រទេសសម្រាប់ការស្មុំកូននៅចន្លោះពីឆ្នាំ១៩៩៨ ដល់ឆ្នាំ២០១១។ ប៉ុន្តែក្រោយមក រដ្ឋាភិបាលកម្ពុជាបានផ្អាកកម្មវិធីស្មុំកូនអន្តរប្រទេសនេះវិញ បន្ទាប់ពីមានភស្តុតាងបង្ហាញថា មានការក្លែងបន្លំឯកសារ និងអំពើពុករលួយ ដែលប្រព្រឹត្តដោយមន្ត្រីរដ្ឋាភិបាល ដើម្បីប្តូរឈ្មោះ ឬអាយុកុមារមួយចំនួន ឬអះអាងថា ពួកគេជាក្មេងកំព្រា ឬត្រូវបានបោះបង់ចោល មុនពេលកុមារទាំងនោះត្រូវបានគេយកទៅចិញ្ចឹមនៅក្រៅប្រទេស ដោយពុំមានការដឹងឮ ឬការយល់ព្រមពីឪពុកម្តាយរបស់ពួកគេឡើយ។
ប្រភពដដែលបន្តថា បច្ចុប្បន្ននេះ រដ្ឋាភិបាលនៅតែខ្វះប្រព័ន្ធការពារកុមារ ប្រព័ន្ធតុលាការ និងវិធានការប្រឆាំងអំពើពុករលួយគ្រប់គ្រាន់ ដើម្បីធានាថា ការស្មុំកូន នឹងដំណើរការទៅស្របតាមផ្លូវច្បាប់ និងក្រមសីលធម៌។
លីកាដូបានផ្តល់យោបល់ថា មធ្យោបាយតែមួយគត់ដើម្បីធានាថា កុមារមិនត្រូវបានគេយកចេញពីគ្រួសាររបស់ពួកគេទៅដោយមិនត្រឹមត្រូវ និងដោយបោកបញ្ឆោតម្តងទៀតនោះ គឺត្រូវបញ្ឈប់ជាបន្ទាន់នូវរាល់ការស្មុំកូនអន្តរប្រទេសទាំងអស់ពីប្រទេសកម្ពុជាដែលកំពុងដំណើរការ។
សេចក្តីថ្លែងការណ៍ដដែលថា រដ្ឋាភិបាលកម្ពុជា និងរដ្ឋដែលទទួលយកកុមារ គួរតែបង្កើតយន្តការសម្រាប់អ្នកដែលបានរងគ្រោះពីការស្មុំកូនអន្តរប្រទេសរួចមកហើយនោះ រួមមាន ទាំងកូនចិញ្ចឹម ឪពុកម្ដាយបង្កើត និងឪពុកម្ដាយចិញ្ចឹម ដើម្បីស្វែងរកការពិត និងយុត្តិធម៌ ក៏ដូចជាភ្ជាប់ទំនាក់ទំនងជាមួយមនុស្សជាទីស្រលាញ់ឡើងវិញ ប្រសិនបើពួកគេជ្រើសរើសដូច្នេះ។
បន្ថែមលើនេះ លីកាដូបានព្រមានថា ការបញ្ជូនកុមារជាច្រើនទៀតទៅក្រៅប្រទេស អាចនឹងបង្កឱ្យមានគ្រោះថ្នាក់ដែលមិនអាចស្រោចស្រង់បានជាច្រើនបន្ថែមទៀត ប្រសិនបើធ្វើឡើងមុនពេលកំហុសកន្លងមកទាំងនេះត្រូវបានដោះស្រាយ និងមុនពេលមានវិធានការប្រកបដោយសុវត្ថិភាព និងតម្លាភាព ដើម្បីធានាផលប្រយោជន៍ល្អបំផុតសម្រាប់កុមារ៕
