ក្រសួងការពារជាតិរបស់ចក្រភពអង់គ្លេស បានឱ្យដឹងនៅថ្ងៃអង្គារនេះថា កងកម្លាំងអ៊ុយក្រែនបានដណ្តើមយកបានមកវិញនូវតំបន់ភាគខាងជើងដ៏សំខាន់របស់ខ្លួន ដោយបានបង្ខំឱ្យកងកម្លាំងរបស់រុស្ស៊ីដកថយចេញពីតំបន់ជុំវិញទីក្រុង Chernihiv និងភាគខាងជើងនៃរដ្ឋធានីកៀវ (Kyiv) ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ទោះជាយ៉ាងណា ប្រភពដដែលបានបន្តឱ្យដឹងនៅលើបណ្តាញសង្គមធ្វីតធ័រ (Twitter) ថាការប្រយុទ្ធគ្នាក្នុងកម្រិតទាបទំនងជានឹងបន្តកើតឡើងនៅក្នុងតំបន់មួយចំនួន ដែលអ៊ុយក្រែនដណ្តើមបានមកវិញ ប៉ុន្តែនឹងត្រូវថមថយក្នុងសប្តាហ៍នេះ ស្របពេលដែលកងកម្លាំងរុស្ស៊ីដែលនៅសល់នានាដកថយ។
ក្រសួងបានបន្ថែមទៀតថា អង្គភាពយោធារបស់រុស្ស៊ីជាច្រើន ដែលដកថយនោះ ក៏ទំនងជានឹងត្រូវបំពាក់អាវុធ និងរៀបចំឡើងវិញផងដែរ មុនពេលដែលពួកគេអាចដាក់សម្រាប់ប្រតិបត្តិការយោធាផ្សេងទៀតនាពេលខាងមុខ។
គួរបញ្ជាក់ថា មន្ត្រីសហរដ្ឋអាមេរិកមួយរូប កាលពីសប្ដាហ៍មុន ក៏ធ្លាប់បានព្រមានថា រាល់ចលនានៃកងកម្លាំងរុស្ស៊ីចេញពីជុំវិញទីក្រុងកៀវ (Kyiv) គឺជាការរៀបចំទ័ពឡើងវិញ ដែលមិនមែនជាការដកថយនោះទេ។
ការអះអាងរបស់មន្ត្រីរូបនេះ ធ្វើឡើងបន្ទាប់ពីប្រទេសរុស្ស៊ីបានសន្យាថា នឹងកាត់បន្ថយប្រតិបត្តិការយោធាទាំងឡាយនៅជិតរដ្ឋធានីរបស់អ៊ុយក្រែន៕