រដ្ឋាភិបាលបាននិងកំពុងធ្វើវិសោធនកម្មច្បាប់ និងលិខិតបទដ្ឋានគតិយុត្តពាក់ព័ន្ធ ព្រមទាំងដាក់ចេញនូវវិធានការចាំបាច់មួយចំនួន ដើម្បីពង្រឹងការទប់ស្កាត់បទល្មើសធនធានធម្មជាតិ ក្នុងវិស័យព្រៃឈើ និងជលផល ខណៈបទល្មើសនេះនៅតែបន្តកើតមាន។
ក្នុងសេចក្ដីជូនដំណឹងរបស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងកាលពីថ្ងៃទី៥ ខែមេសានេះថា កន្លងមក ក្នុងដំណើរការកំណែទម្រង់ស៊ីជម្រៅគ្រប់គ្រងធនធានធម្មជាតិ ក្នុងវិស័យព្រៃឈើ និងជលផល រាជរដ្ឋាភិបាលបាននិងកំពុងជំរុញឱ្យមានការធ្វើវិសោធនកម្មច្បាប់ និងលិខិតបទដ្ឋានគតិយុត្តពាក់ព័ន្ធ ជាពិសេសការបែងចែកឡើងវិញនូវសមត្ថកិច្ចទទួលខុសត្រូវរវាងស្ថាប័នថ្នាក់ជាតិនិងថ្នាក់ក្រោមជាតិ ដើម្បីពង្រឹងការទប់ស្កាត់បទល្មើសធនធានធម្មជាតិក្នុងវិស័យព្រៃឈើឱ្យមានប្រសិទ្ធភាពខ្ពស់។
ជាមួយគ្នានេះដែរ ក្រសួងកសិកម្មក៏បានណែនាំដល់រដ្ឋបាលថ្នាក់ក្រោមជាតិ អនុវត្តវិធានការចាំបាច់មួយចំនួនដូចជា ត្រូវដឹកនាំនិងសម្របសម្រួលកម្លាំងមានសមត្ថកិច្ចពាក់ព័ន្ធ ដើម្បីការពារធនធានធម្មជាតិ និងទប់ស្កាត់បទល្មើសជលផល និងកាប់រុករាន ដុត ឈូសឆាយ និងហ៊ុមព័ន្ធដីព្រៃឈើនិងដីព្រៃលិចទឹកក្នុងដែនសមត្ថកិច្ចរបស់ខ្លួនឱ្យមានប្រសិទ្ធភាព។
សេចក្ដីជូនដំណឹងដដែលបន្តថា៖ «ក្នុងករណីប្រទះឃើញបទល្មើសជាក់ស្ដែង ត្រូវចាត់វិធានការទប់ស្កាត់និងបង្ក្រាបជាបន្ទាន់តាមដែនសមត្ថកិច្ចរៀងៗខ្លួន ចៀសវាងទុកឱ្យបទល្មើសទាំងនោះរីករាលដាលកាន់តែធំ និងពិបាកក្នុងការដោះស្រាយ។ ប្រសិនបើបទល្មើសមានទ្រង់ទ្រាយធំ ស្មុគស្មាញ ត្រូវរាយការណ៍និងសុំអន្តរាគមន៍ជាបន្ទាន់មកក្រសួងស្ថាប័នថ្នាក់ជាតិ ដើម្បីមានវិធានការ និងរួមគ្នាដោះស្រាយតាមនីតិវិធីជាធរមាន»។
នាយខណ្ឌរដ្ឋបាលជលផលខេត្តកំពង់ឆ្នាំង លោក លី ឡា មានប្រសាសន៍នៅថ្ងៃពុធនេះថា ការធ្វើវិសោធនកម្មច្បាប់ និងលិខិតបទដ្ឋានគតិយុត្តពាក់ព័ន្ធនឹងបទល្មើសធនធានធម្មជាតិ ដែលក្រសួងកសិកម្ម រុក្ខាប្រមាញ់ និងនេសាទ បានសហការជាមួយក្រសួងមហាផ្ទៃ និងស្ថាប័នពាក់ព័ន្ធ ធ្វើកន្លងមកនេះ ដើម្បីបង្កលក្ខណៈងាយស្រួលនិងកាន់តែល្អប្រសើរក្នុងសម័យកាលថ្មី និងងាយស្រួលយកទៅអនុវត្តលើបទល្មើសដែលកំពុងកើតមាននៅក្នុងប្រទេស។
ទោះជាយ៉ាងណា លោកបញ្ជាក់ថា ការធ្វើវិសោធនកម្មច្បាប់ថ្មីមិនទាន់ចេញជារូបរាង ប៉ុន្តែក្រុមការងាររបស់លោកនៅតែអនុវត្តច្បាប់ដែលមានស្រាប់ ដើម្បីទប់ស្កាត់បទល្មើសឱ្យមានប្រសិទ្ធភាពផងដែរ។
លោកថា៖ «កន្លងមក វិសោធនកម្មបានប៉ុន្មានមាត្រាហើយ សម្រាប់ធ្វើកំណែទម្រង់ឧបករណ៍នេសាទខ្លះៗ អ៊ីចឹងយើងនៅតែអនុវត្តច្បាប់ឱ្យបានតឹងរ៉ឹងដដែល ដើម្បីនិរន្តរភាព ដើម្បីការពារធនធានធម្មជាតិ ច្បាប់ហ្នឹងនៅតែបន្តអនុវត្ត ដើម្បីកុំឱ្យវាមានប៉ះពាល់ធនធានធម្មជាតិ។ យើងមិនមែនរង់ចាំតែច្បាប់វិសោធនកម្មរួចហើយទេ គឺយើងនៅតែធ្វើ[អនុវត្តច្បាប់ចាស់]បន្តបន្ទាប់»។
លោកនាយករដ្ឋមន្ត្រី ហ៊ុន សែន កាលពីថ្ងៃទី២៣ ខែមីនា បានចេញបទបញ្ជាផ្ទាល់មាត់ ឱ្យក្រសួងស្ថាប័នពាក់ព័ន្ធ អាជ្ញាធរខេត្ត រួមជាមួយកម្លាំងប្រដាប់អាវុធ ទប់ស្កាត់បទល្មើសធនធានធម្មជាតិ ជាពិសេសបទល្មើសជលផលនៅជុំវិញបឹងទន្លេសាប ក្នុងនោះ លោកក៏បានអនុញ្ញាតឱ្យកងទ័ព និងកងកម្លាំងនគរបាលប្រើប្រាស់ឧទ្ធម្ភាគចក្របាញ់ពីលើអាកាសផងដែរ ប្រសិនបើជនល្មើសតដៃ។
មន្ត្រីគម្រោងតស៊ូមតិនៃគម្រោងអ្នកការពារព្រៃឈើនៃសមាគមបណ្ដាញយុវជនកម្ពុជា លោក សាន់ ម៉ាឡា មានប្រសាសន៍ថា រដ្ឋាភិបាលគួរតែជំរុញទៅសមត្ថកិច្ចពាក់ព័ន្ធពង្រឹងការអនុវត្តច្បាប់ដែលមានស្រាប់ ដូចជា ច្បាប់ស្ដីពីព្រៃឈើ ច្បាប់ស្ដីពីជលផល និងច្បាប់ស្ដីពីតំបន់ការពារធម្មជាតិ ជាដើម ជាជាងធ្វើវិសោធនកម្មច្បាប់ដែលនាំឱ្យខាតពេលវេលានិងថវិកា។ លោកបន្តថា កន្លងមក រដ្ឋាភិបាលក៏ធ្លាប់បានបង្កើតគណៈកម្មាធិការជាតិមួយ ដើម្បីទប់ស្កាត់និងបង្ក្រាបបទល្មើសធនធានធម្មជាតិ ប៉ុន្តែបទល្មើសនៅតែមិនអាចទប់ស្កាត់បានប្រសើរនៅឡើយ។
លោកបន្តថា៖ «ដើម្បីឱ្យការអនុវត្តច្បាប់មិនមានស្តង់ដារពីរ ហើយប្រព្រឹត្តទៅដោយរលូន ហើយមានប្រសិទ្ធភាព ខ្ញុំនៅតែទទូចដដែលៗថា រដ្ឋគួរតែបញ្ឈប់នូវការរឹតត្បិតសិទ្ធិសេរីភាពមកលើអង្គការសង្គមស៊ីវិលនិងសហគមន៍ ហើយបើកទូលាយឱ្យយើងអាចអនុវត្តសិទ្ធិរបស់យើង ដូចមានចែងក្នុងមាត្រា២១ និងមាត្រា២៩ នៃច្បាប់ស្ដីពីការការពារធនធានធម្មជាតិ»។
កាលពីថ្ងៃទី២៩ ខែមីនា ឆ្នាំ២០២២នេះ ក្រុមអង្គការសង្គមស៊ីវិល និងសហគមន៍មូលដ្ឋានជាង២០ស្ថាប័ន ក៏បានស្នើទៅក្រសួងកសិកម្ម និងក្រសួងបរិស្ថាន ដោះស្រាយបញ្ហាមួយចំនួន ដើម្បីទប់ស្កាត់បទល្មើសធនធានធម្មជាតិឱ្យមានប្រសិទ្ធភាពផងដែរ៕