តុលាការខេត្តមណ្ឌលគិរី កោះហៅតំណាងនិងជនជាតិដើមភាគតិចពូនងចំនួន៤នាក់ដែលសកម្មក្នុងការងារការពារដីធ្លីនិងធនធានធម្មជាតិ ឱ្យចូលបំភ្លឺនៅចុងខែមេសា ឆ្នាំ២០២២ តាមបណ្ដឹងប្រធានក្រុមហ៊ុនឯកជនមួយ។
ក្នុងដីកាកោះហៅដែលចុះថ្ងៃទី២៩ ខែមីនា ឆ្នាំ២០២២ របស់តំណាងអយ្យការអមសាលាដំបូងខេត្តមណ្ឌលគិរី លោក អ៊ាង សុគន្ធ ដោយតម្រូវឱ្យឈ្មោះ គ្រឿង តុលា, ឈ្មោះ ផ្លឹក ភឹរុំ, ឈ្មោះ ផ្លឹក ណារី, ឈ្មោះ ខ្លើង ទុំ ដែលជាជនជាតិដើមភាគតិច ចូលបំភ្លឺនៅរសៀលថ្ងៃទី២៦ ខែមេសា ឆ្នាំ២០២២ ពីបទ «បទបរិហារកេរ្តិ៍ជាសាធារណៈ និងញុះញង់ឱ្យប្រព្រឹត្តបទល្មើសជាអាទិ៍» ដើម្បីសាកសួរ។
បើតាមដីកាបញ្ជាក់ថា ការកោះហៅតំណាងនិងជនជាតិដើមភាគតិចទាំង៤នាក់ឱ្យចូលបំភ្លឺ តាមបណ្ដឹងរបស់ឈ្មោះ កាក់ រតនា ដែលពលរដ្ឋជនជាតិដើមភាគតិចអះអាងថា ជានាយកក្រុមហ៊ុនវីឡា «ឌីវេឡុបមេន ខូអិលធីឌី»។
អ្នកប្រឹក្សាយោបល់បណ្ដាញជនជាតិដើមភាគតិចនៅខេត្តមណ្ឌលគិរី លោក គ្រឿង តុលា ប្រាប់វីអូឌីថា រូបលោកនឹងចូលបំភ្លឺ ដោយថាពួកគាត់មិនបាន «ញុះញង់ និងបរិហារកេរ្តិ៍» នោះទេ។
លោកបន្តថា អ្វីដែលលោកបានផ្សព្វផ្សាយកន្លងមក ពិតជាបានកើតឡើងពិតមែន។ មួយវិញទៀត លោកថា ពួកគាត់ក៏បានជូនដំណឹងទៅអាជ្ញាធរខេត្ត និងមន្ទីរបរិស្ថាន ឱ្យជួយកិច្ចអន្តរាគមន៍ដើម្បីទប់ស្កាត់ ដោយបារម្ភខ្លាចមានអំពើហិង្សា ក្រោយពលរដ្ឋនាំគ្នាតវ៉ានិងហាមឃាត់គ្រឿងចក្រក្រុមហ៊ុនមិនឱ្យចូលឈូសដីព្រៃសហគមន៍របស់ពួកគាត់។
កាលពីពាក់កណ្ដាលខែមីនា ឆ្នាំ២០២២ ពលរដ្ឋជនជាតិដើមភាគតិចពូនងប្រហែល៥០នាក់ បាននាំគ្នាតវ៉ាប្រឆាំងក្រុមហ៊ុនឯកជនមួយដែលមិនស្គាល់ឈ្មោះ ស្របពេលក្រុមហ៊ុននោះដាក់គ្រឿងចក្រឈូសឆាយនិងកាយក្រវាត់ព្រំដីរំលោភចូលដីព្រៃសហគមន៍ជនជាតិដើមភាគតិចជាច្រើនហិកតា នៅភូមិឡៅកា សង្កាត់សុខដុម ក្រុងសែនមនោរម្យ៕